Memoria viva

Sperone Speroni
in difesa de la casa de ’l Petrarca
’Na bea passejata in te le riviere. El raconto de un prete su la casa de ’l Petrarca. La vita e le òpare de ’l grande leterato e filosofo padovan

El grande leterato Sperone Speroni, consiliere de do Papi, che ga conbatudo par la salvessa de la casa padovana del Petrarca.

Gèrimo in te ’l setenbre de ’l ’45 mi, i me amissi Ferruccio, Raffaele e Dario in conpagnìa de ’l prete, insegnante, che ne contava tanta storia e arte de Padova. Gèrimo partìi verso le quatro e meza de ’l dopopranso da ’l Pedrocchi.
Gavévimo fato piassa de i Fruti, piassa de i Signori, piassa Capitaniato e inbocà via Patriarcato. Qua el nostro amigo prete ne ga contà ’na storia che no’ savévimo: in te i primi vint’ani de ’l 1200, el Comune de Padova gaveva onorà Bertoldo, el Patriarca de Aquileia, che gera vignù a stare par poco tenpo ne la nostra sità, dàndoghe la sitadinanza onoraria. Bertoldo, par riconossensa, gaveva donà tanti schei pa costruire in quea strada ’na diezina de case par bisognosi. Più tardi gera stà dà el nome de Patriarcato a quea strada.
Gavévimo continuà la nostra passejata, sbocando in Riviera Albertino Mussato che ghemo fato a drita e a sanca. Se divertìvimo un mondo a fermarse e vardare i tòchi de mure duecentesche. Pur rispetando le esigense de quei che se gaveva fato la casa butando zo tòchi de mure, no’ podévimo far de manco de considerare quanto bea sarìa stà la riviera co’ la cinta intata de mure.
Naturalmente el prete ne ga contà de Albertino Mussato e no’ lo ripeto parché za dito in un me raconto de ani fà, e de i tre giri de mure de la nostra sità: queo comunale, queo trecentesco carrarese, queo cinquecentesco venessian dopo el assedio de la Lega di Cambrai. Mi ghe go messo in te ’l discorso orgoliosamente la pèssa, parché ricordavo ben la maravejosa lession de ’l prof. Scapolo in tersa ginasio su l’argomento. Anca questo, scrito su ’sta rivista almanco vint’ani fà. Alora xe saltà fora ’na grande discussion su le sità che invesse ga salvà in tuto o gran parte de la cinta muraria: par esenpio Lucca, Ferrara, Montagnana, Este, Castelfranco, Cittadella e altre ancora, che gode proprio par questo de un aflusso turistico. Se la ghemo messa via par no’ rovinarse el figà.
Semo ’ndà ’vanti fin al ponte Tadi e, ciapà la strada de ’l stesso nome, la ghemo fata pian pianin, fermàndose a vardare i bei palassi, in particolare, ’ndando verso el Domo, su la drita el palasso Malvestio co ’l bel portale e la scrita latina, e su la sanca el palasso Montesi e queo Lugli.

La bea Riviera Albertino Mussato, fra el Bacchiglione e tòchi de mure comunali del 1200.

’Rivà a el incrozo co’ via Accademia, el nostro amigo prete se ga direto verso la "abside" de ’l Domo. Su el muro esterno de ’l "transetto" el ne ga indicà la làpide de i "Antenorei Lares" che dize: "Qui vicino vi fu la casa canonicale di Francesco Petrarca".
"De la casa padovana de ’l Poeta, ’ndà distruta in ocasion de i lavori de ’l coro de ’l Domo, ghe ne gavemo za parlà n’altra volta. Ma mi vorìa ciapare la ocasion par parlarve de un ilustre padovan poco ricordà: Sperone Speroni!"
"Ma cossa ghe èntreo co’ la casa de ’l Petrarca e i lavori de ’l Domo?" ghemo dito in coro noialtri.
"El ghe entra! El ghe entra!" ga risposto soridendo el vecio prete. E el se ga messo a contare: "Sperone Speroni ga scaenà co’ i so scriti ’na lota furibonda contro i canonici de la Cattedrale che voleva un coro grande cofà queo de San Pietro a Roma e, co’ sto lavoro, butare zo la casa de ’l Petrarca. El Vescovo de Padova, el Cardinale Pisani, voleva fare i lavori de restauro e de ingrandimento del Domo, ma no voleva butare zo la storica casa. Ghe xe stà tre progeti: queo de el Da Valle, queo de ’l Sansovino, queo de Michelangelo. Sperone Speroni ghe la ga messa tuta, tirando fora la so grande cultura umanistica, parlando de gravissima colpa verso un Poeta che gaveva onorà l’Italia ne ’l mondo. Xe vignù fora anca un scrito in pavan curioso e incredibile che tanti ga credudo de ’l Ruzzante. Po’, vardando la data de ’l 1550, i se ga acorti che el grande comediogrado gera morto oto ani prima."
El nostro amigo prete ga continuà, contàndone che el scrito in pavan dizeva che ’l gastaldo de la proprietà che gera stà de ’l Petrarca gaveva ’vudo de note in sogno la aparission de ’l Poeta che lo gaveva comandà de ’ndare da ’l Vescovo Pisani par minaciarlo che, se ’l gavesse fato butare zo la so casa, durante le noti el sarìa ’ndà a tirarghe le coverte. Da seno curiosa e incredibile. Nonostante ’sto s-ciantizo de discussion, xe stà sielto el primo progeto, queo de ’l Da Valle e la casa de ’l Petrarca xe ’ndà distruta.
"Pecà – ga dito el nostro amigo – parché tra quea casa e la vissina Reggia Carrarese ghe gera anca sentimento de stima e afeto. A la sera, prima de ’ndare in leto, el Petrarca e el Principe Jacopo II da Carrara, anca se a distansa, i se saludava."
Come el solito, noialtri lo gavévimo scoltà, se poe dire, a boca verta, parché a scola gavévimo sentìo el fàssino de ’l grande Poeta, avendo ’vudo boni professori che ne lo gaveva spiegà. Ma ne gera restà un pulze in ’na recia e ghe ghemo dito: "Ma, in sostansa, chi gèrelo ’sto Sperone Speroni, che a scola no’ i ne lo ga nominà?"

El esterno de la abside del Domo, dove che se credeva fosse stà distruta la casa del Petrarca, ma ’desso se sa che ghe ne esiste oncora on tòco in via Dietro Duomo.

Ghemo capìo che la nostra domanda el prete se la spetava e la ghe gaveva fato piassere. Soridendo bonariamente el ne ga dito:
"Sperone Speroni xe stà uno fra i più ilustri leterati italiani. Padovan, el xe stà poco ricordà anca da la so sità. Penseve che Torquato Tasso, quando che ’l vigneva a Padova, el gera ospite a casa sua e el ga lassà scritto che lo considerava el so maestro. El xe nato a Padova in te ’l 1500; el ga studià filosofia a Bologna soto el Pomponazzi, ma el se ga laureà ne la nostra Università. No ’l ga fato in tenpo de cònpiare ventisinque ani che ’l xe stà ciamà da la Università de Bologna a ciapare la catedra de ’l so maestro Pomponazzi, ’pena morto. Questo no’ ghe inpediva de fare qualche viajo a Venezia, parché el Senato de la Serenissima lo ciamava par consultarlo su grossi problemi politici e legislativi. Presentà al Papa Boncompagni, Gregorio XIII, el xe stà invità da questo a restare presso la Corte Vaticana come consigliere personale. Dieze ani prima el gera restà par un ano a la Corte de Papa Pio IV."
El vecio prete xe ’ndà ‘vanti co ’l discorso, contàndone che el Speroni xe deventà ilustre in tuto el mondo leterario italian, scrivendo el famoso "Dialoghi di messer Sperone Speroni" che ciapa dentro el sagio "Dialogo delle lingue" che continua el discorso de ’l Bembo su ’l volgare. El ga ’vudo fama in tuta Europa co’ la tragedia "Canace".
"Tuto questo – ga dito el nostro amigo – lo ga fato andare dentro a la ‘Accademia degli Infiammati’ che xe stà la prima a Padova e forse in te ’l Veneto. Fin che ’l gera stà a Roma a la Corte de Gregorio XIII, el xe stà processà da ’l Tribunale de l’Inquisizione che gaveva trovà i so scriti in parte contrari al pensiero catòlico. Ma, un poco par la protession de ’l Papa che in sostansa lo stimava, e tanto par la difesa piena de argomenti, el xe stà assolto. El xe tornà a Padova."
El prete ga concluso dizendo che el grande leterato e filosofo ga fato ’na bruta morte a otantoto ani par el spavento che ’l ga ciapà quando che de i briganti ’na note xe ’ndà a casa sua, i lo ga inbavalià, ligà, robàndoghe tuto queo che el gaveva.
Come el solito, semo ’ndà a fare un spuntin par sena in ostarìa.
El beo xe stà quando che ne i ani ’80 stavo pensando e scrivendo el me libro su i Carraresi, el esperto storico-artistico de la Curia Vescovile, mons. Bellinati, partindo da un documento de ’l 1502 e altri in caena, ga scrito dizendo de avere le prove che un tòco de la casa padovana de ’l Petrarca esiste ancora in via Dietro Duomo ai nùmari 26 e 28.

[torna sopra]