Da Vicenza

Quaranta cenacolini a Ciòsa

Foto ricordo de alcuni cenacolini con la Presidente Guidina Borella (1ª a destra).

Quaranta cenacolini, la matina del 18 febraro, sensa gnanca na scarpìa de nùvola in celo, xe partìi par Ciòsa a ricanbiar l'incontro de amicissia e de poesia, ricevudo a fine otobre 2008.
’Vanti del Munissìpio, ne spetava la Presidente del "Gruppo Poeti Città di Chioggia", la carissima amica Guidina Borella Lando, che la se gavéa fata in coatro, in chéi ùltimi dì, par acòliarne 'tel modo miliòre, otegnendo parfina el permesso da i vigili de portar la coriera fin 'n sentro sità. I pi sgaji, ga scominsià el giro co la Guidina e qualche altro, fermàndose prima de tuto a S. Giacomo, indove se ga amirà la pressiosa icona de la "Madonna della Marina"; el gireto panoràmico ga continoà, beàndose del celestin trasparente del celo e de la chiète del mare, de la belessa de i palassi, de la vita del porto e... del famoso "gato-leon" de Ciòsa che, so l'alta colona in Piassa Vigo, propio in riva al mare, el spetava i visentini co 'n fià de suponensa... "Mi, gato? No sia mai dito! Mi son el leon de la Serenissima solo che, l'artista che me ga scolpìo, el ga laorà on fià de stramanon e... scolpelo de coa, scolpelo de là... a son vegnù fora on leonsin, ansi, a sentire quéi de mala creansa, on gato...". Me son emossionà on mondo, imajnando i so stranbèssi, parché me xe vegnù inamente la cara Maestra e Poetessa Roma Boscolo che, ani fà, al "Burchielo" in Scoleta S. Zaccaria a Venessia, la ga contà lejende e curiosità propio so sto sinpàtico monumento.

Guidina e Ines... drio spetar che riva la magnativa.

A jera on mèrcore, ma a Ciòsa te paréa ca fusse festa par el viavài de jente e le ciàcole che deventava musica in ogni canton. On delissioso profumin de pésse vegnéa sù da le cale, pareciàndone el stòmego. "Al Porto" ne spetava el sior Gianni, pramoso de farne tastar le so specialità. A le tre, ciosoti e visentini ga cavà i pìe da soto 'a tòla pa 'ndare a l'Auditorium S. Nicolò. A se trata de l'edificio religioso pì antico de Ciòsa, tirà sù 'tel 1322 so 'e fondamenta de na cesa conventuale del 1211 e passà 'te man private 'tel 1772. 'Vendo n'acustica parfeta, el xe stà rimesso a novo 'te i ani '80; el vien doparà par concerti, conferense, leture e rapresentassion teatrali. So 'l palco, la Presidente Guidina, Maria Teresa Rossi Aprile, Nico Cogo, mi e 'l poeta Giuliano Rossettini, che 'te i ani '50 ga vissudo e laorà a Ciòsa, indove 'l xe stà co-fondatore del "Piccolo Teatro".

El tavolo de i responsabili de i do Grupi.

Guidina Borella Lando ne ga acolto co spontanea generosità e sinpatia, parlando de l'inportansa de sti incontri fra grupi culturài che porta vanti l'amore par la poesia e par el dialeto. No podéa mancar do' paròe de ricordo par el professor Cortelazzo, mancà da poco e che, so "Quatro Ciàcoe", ne ga conpagnà par ani co sugerimenti e curiosità so la lengua de le nostre radise.
Do' splèndidi massi de fiori, omagio del Grupo Ciosoto, ga portà na magica inpiturada 'te sto anbiente dal saòr quasi francescan. Ne xe stà anca regalà de i libri magnifici e da parte nostra, xe stà ricanbià co libri de poesie e raconti de i nostri cenacolini e co 'l volume "L'oro di Vicenza". On masseto de timidi bucaneve, portà da la Gemma Bellotto, xe stà parò el dono che pi ga emossionà la Guidina, che fin 'lora la gavéa visto sto fioreto solo so 'l sussidiario de scola...

Un momento de "El garòfolo rosso".

Co la Conpagnia Amatoriale "I Rosegoti", fondà da Maria Penello, e la rapresentassion de l'ato unico de Antonio Fogazzaro "El garòfolo rosso", se ga dà el via a l'incontro vero e propio. Rossettini ga introdoto co qualche notissia storica so 'l Palasso Proti-Vajenti-Malacarne, contando anche che el laòro teatrale el xe stà adatà par el Cenacolo da Rosalinda Masera, 'ncora 'te i ani '80. Ga interpretà la parte de la Contessa Marieta la bravissima Maria Penello, a far la camariera Tonina xe stà la Manuela Moretto e 'l custode xe stà inprovisà da on convinsénte Gianni Simonato, dato che l'interprete fisso mancava. I batiman no xe serto mancà, come che no i xe mancà quando, uno a la volta, niantri visentini ghemo leto co emossion i nostri versi dal fassìcolo "Mare e coline se incontra in poesia". Ma la sireseta finàe, xe stà le "Barufe ciosote" che la Chetty Buseghin e la Maria Varagnolo, vestìe co costumi originài, ne ga ressità con "voce narrante", Maria Luisa Baldo: na roba da restar lì, boca verta, inmagà.
In "Una barufa tra niòra e Madona" e "Una baruffa in calle", le do atrici ga tegnù palco co 'l dialeto de Ciosa, unico par la so cantilena e teatralità.E a sto punto, se se gà spelà le man! El sole parò magnava le ore e 'l nostro bel otista spetava, co la coriera, poco distante. Tolèndo sù la borsetina piena de robe bele che a oniun de nantri l'Azienda Turistica de Ciòsa gavéa destinà, se se ga saludà, l'ànema siòra de n'amicissia fata 'ncor più salda. A ravédarse, amissi, e grassie!

[torna sopra]