|
Ultime o quasi da l’Altopiano
In ricordo de Mario Rigoni Stern
 |
| Un esenpio senza fine... par l’omo de i nostri giorni. E de quei che vegnarà. (foto L. Frosi) |
Da diversi ani, le ferie le passo sù so l’Altopiano, na tera naturalmente bela, piena de possibilità de svaghi, siora de storia e cultura. Ogni ano a son senpre meravejà de le atività culturài - e non – che Asiago e i Sete Comuni i propone ai foresti che passa le vacanze nel so teritorio. Purtropo se vien a savere cossa che i fa solo vegnendo sul posto e a volte xe massa tardi par èssare coinvolti in te le manifestassion.
Tante volte a go pensà che ghe vorìa calchedun de Asiago che scrivesse par el nostro Quatro Ciàcoe: basta pensare a quanti emigranti ga lassà ste tere, prima de sento ani indrìo, e come sarìa belo che i podesse vìvare anca da lontan quelo che càpita ne i so paesi de origine. Savemo come el nostro giornale, grassie a la Region – Uficio Cultura – el riva in ogni parte del mondo dove esiste Associassion de Veneti: da l’Australia a l’America, dal Brasile a l’Argentina, nel Messico e in tute le nassion europee. L’ano passà, par esenpio, ghemo savesto che jera morto el grande scritore Mario Rigoni Stern dopo che ’l jera stà sepeìo: va ben che jera stà un so desiderio a no avere tanta publicità, parché el jera un omo sènplice che no ga mai fato tanto ciasso, amante del Creato e convinto che anca la morte fa parte de la natura, tanto xe vero che ’l ga volesto èssare sepelìo par tera, nudo, cuerto solo da na strassa come quando che ’l xe nassesto.
Sto ano però, in tuto l’Altopiano, ogni manifestassion la xe stà fata in so onore e nel so ricordo. I ga scuminsià co un concorso leterario par i tosati de le scole, vinto da Stefania Carli, 16 ani, del Liceo Sientìfico de Asiago. La ga scrito che xe difìssie par de i tosati zóveni scrìvare e parlare del "Vecio nono altipianese", parché l’Altopiano de ancò no ’l xe paragonàbile a quelo de i tenpi del "Grande narratore". Lu ga savesto descrìvere le emossion, le sensassion e i pensieri del vero altopianese; el ga descrito la so tera col linguagio e le sensassion de uno che xe tacà al paese ’ndove el xe nato.
’N altro ricordo de M.R.S. xe stà inserìo nel IV Festival Cinbro – l’Hota Zait – organizà dal Comune de Roana. Un omagio tuto particolare: na serata de canti, co’ canson de guera e d’amore, ’ndove i testi i jera ispirà ai so scriti. Un grupeto de amissi, Maurizio Pagiaro, musicista, Alessandra Viola, scritrice e Giorgio Gobo interprete, aconpagnài da la chitara del stesso Maurizio, dal sassofonista Mauro Silvestrin e da so fradeo Franco, al flauto traverso. Canson de guera e d’amore par condanare ogni tipo de violenza e esaltare l’amore e l’amicissia come raporto tra le persone.
Senpre in ricordo del grande naratore, xe stà la mostra vossùa da la Region Veneto – Assessorato alle Politiche Faunistico-Venatorie – che ga volesto presentare l’imàgine de M.R.S. come "Uomo, Narratore e Cacciatore". Sta mostra la xe restà verta par tuto el mese de agosto, nel novo Palazzo del Turismo Millepini de Asiago; la ga presentà, co scriti e foto, un M.R.S. "ambientalista" che, ’traverso el so pensiero, el descrive el fàssino de la so tera, el ritorno de le stajon che guida la vita de l’omo e de le bestie. El dize anca come la cacia deventa na nobile passion umana, (che te fa gustare da vissin el respiro de la natura e de i animài) quando la xe guidà da l’inteligenza de chi la sa praticare nel rispeto de la natura, partecipando a mantegnere l’equilibrio che règola el Creato.
Ancora ’n’altra serata a lu dedicà, senpre al Teatro del novo Palazzo del Turismo, xe stà quando l’artista Pino Petruzzelli, nel spetàcolo "Con il cielo e la Selva", el ga declamà de i brani de M.R.S., faséndone passegiare pa i boschi, caminare in mezo a la neve, seguire un lièvore ferìo e tante altre sensassion, recitando a memoria co’ tanta passion, brani da "Il libro degli animali". Anca qua, dal tono de la vosse e da l’espression nel recitare, te pareva che a contare fusse proprio el "Grande Vecio", na sera de inverno, in un filò, al caldo de na stala.
Par finire no se pol desmentegare la 2ª Giornata dei Veneti nel Mondo, organisà da la Region Veneto – Flussi Migratori – par mantignere vivi i raporti co tute le persone che, da i sinque continenti, i continua a dare onore a l’Italia e i vole sentirse parte de la grande fameja che i ga lassà.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
L’ora de religion a scola che dà cussì tanto fastidio
La sentenza n. 7076 del Tar del Lazio, che esclude, ne i scrutini de fine ano, la valutazion par i studenti che frequenta l’ora de religion, xe l’ùltimo colpo gobo par scancelare l’insegnamento de la religion catòlica ne la scola
de Mario Klein
Memoria viva
El martire Ugo Bassi a Padova
’Na interessante conversassion co ’l Papà durante la guera. Le storie conplesse de la Republica Romana de ’l 1849. La ritirata de Garibaldi in mezo a la Italia co’ i garibaldini, Ugo Bassi e Ciceruacchio
de Gigi Vasoin
Da Adria
Là ’ndó coreva el Canalin...
de Sergio Bedetti
Da Thiene (VI)
El me paese: Sarsedo
... La parte alta del teritorio la gera tuta un’onda dolse de colinete e montesèi...
de Bepin Daecarbonare
|
