|
Memoria euganea
El marcà de Mossélese
 |
| El marcà de na volta a Mossélese, in Piaza Vittorio Emanuele II. |
El marcà de Mossélese el xe de luni, (par via de i barbieri e de i scarpari) e se sa che ste do categorìe le faséa festa al luni, e cussì xe senpre ’ndà ’vanti par darghe a tuti la possibilà de ’ndare a vèndare e conprare.
Ma ai nostri tenpi calcossa xe canbià: prima de tuto la merce no la xe quela de na volta, che alora la jera inpostà solo sol scanbio de la merce, e disemo pure che ’l jera on marcà e de merce de i canpi, ma on poco a la volta el mondo el xe canbià, la merce la xe deventà pi varia, e on poco a la volta xe stà ocupà tute le strade del centro, e avendo schei, se poe conprare de tuto.
Ma mi par parlare del marcà la xe na storia de ’desso, par via de i Cinesi che i ga squasi ocupà na bona parte de le zone de ’desso. A stare là a vardare de ’e volte te vien anca da rìdare! Te vedi ste done che le remùsena la merce par catare quelo che ghe fa comodo, (e dopo magari no le conpra gnente) e sti Cinesi che ghe toca métare a posto, e a dire el vero el marcà de Mossélese ’desso el xe deventà inmenso, ghe xe tanta de chea roba che la fa paura, e có xe verso le diese ghe xe na marèa de zente che la fa belo védare, e i banchi co ste tende moderne che basta on boton par vèrsare sti tendoni che i xe na vera belessa.
Solo purtropo el marcà che ’l jera de i barbieri e de i scarpari ’desso medigo che de ste categorìe no ghe xe gnanca pi l'odore, anca par via che ’desso pi nissun fa solare scarpe; a tajarse i caveji romai ghe xe solo calche vecioto come mi che a se tajemo i caveji on paro de volte a l'ano, (e che che ’l fa sto mestiere el sopravive parché romai i xe resta pocheti).
Però bisogna dire che la zente la xe oncora tacà a le tradission, e se vede che la zente (anca se no la conpra gnente) al luni se va al marcà e spece i pensionati che i se cata in te de i posti fissi come na volta a contàrsea, tanto par non ’ndare a casa bonora a far conbatare la fémena, cussi se va a casa a ora de disnare, on pocheto sodisfà par èssare ’ndà al marcà al luni.
Mossélese el xe anca nominà par la so Fiera de i Santi, che na volta la jera inportantissima, se vendeva bestie de tute le rasse, ma soratuto se conprava i porsèi par l'ano dopo, se scanbiava usi come i mussi che i jera tanto nominà, ma se vendéa anca fen e paja, e anca biave; se conprava piati e goti, che se sa che durante l'ano i se ronpéa, e anca atressi da laoro, e par la cànava, ma altra merce par la casa come aghi, filo, lana, e dopo le fémene co i feri le faséa calseti e roba da inverno: tuto a jera bon da rancurare.
Quando ca vedo el camion de i "ingonbranti" tanta roba oncora in bona condission, el spreco el xe grando, se dòpara e se buta via, ’desso no se giusta pi oreoji, scarpe, calseti, roba da vestire, television, frighi, careghe, bicicrete, motorini, mòbili, tece, piati, damigiane e anca legna da brusare, che na volta la jera merce da strassari – anca sto mestiere el xe ’ndà perso – co i tenpi de ’desso quelo che intriga se buta in strada e passa el camion co la forca automatica, el carga sù tuto e dopo i ghe da on strucon par fare posto. Poaro mondo de na volta ’ndove sito ’ndà?
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
L’ora de religion a scola che dà cussì tanto fastidio
La sentenza n. 7076 del Tar del Lazio, che esclude, ne i scrutini de fine ano, la valutazion par i studenti che frequenta l’ora de religion, xe l’ùltimo colpo gobo par scancelare l’insegnamento de la religion catòlica ne la scola
de Mario Klein
Memoria viva
El martire Ugo Bassi a Padova
’Na interessante conversassion co ’l Papà durante la guera. Le storie conplesse de la Republica Romana de ’l 1849. La ritirata de Garibaldi in mezo a la Italia co’ i garibaldini, Ugo Bassi e Ciceruacchio
de Gigi Vasoin
Da Adria
Là ’ndó coreva el Canalin...
de Sergio Bedetti
Da Thiene (VI)
El me paese: Sarsedo
... La parte alta del teritorio la gera tuta un’onda dolse de colinete e montesèi...
de Bepin Daecarbonare
|
