|
Da Bovolon (VR)
Te ricòrdito, nona?
 |
| Valentina e la trisavola (nonna Giulia). |
La càmara la par inmusonà, s-ciarà ’pena da na luce fiapa, regolà cossita par no’ stracarte i oci: un mezo leto co’ le spondine come che te fussi ritornà butina, la Madona tacà de sora la te guarda con amor e par che la gavia pressia de ciaparte in brazo par cunar i to ultimi sospiri. Tra i nizói, bianchi come el ricordo de la lissia, se ponsa la to vita custodìa nel nial de la to fameja come un uselin che speta goze de tenerezza: te carezo i cavéi e ti te seri i oci, ma mi no’ voi che te dormi, voi strucar ancora le poche parole che te riessi a dirme con un fil de oze.
"Cónteme, nona, dài cónteme da novo quando, sentè insieme su i scalini de la porta che daséa su l’orto, te desfava el cucugnel par misurar la treza longa de cavéi che se postava sora la schena e dopo te guardava i recini de oro fati come na balina: quanto che ghe moréa sora! Ogni sera te domandava se te mi ’e regalavi e la promessa l’era sempre quela: i sarìa stà el regal de la Prima Comunion... Te ricòrdito nona?"
Ti te me guardi e, quasi par contentarme, te me fe moto de sì co i oci che ogni tanto se sbassa, persi nel silenzio de i to pensieri... ma mi no voi che te dormi.
"Nona, dime ancora chela preghiera de quando vegnéa a dormir con ti, chela cantilena del Signor e la Madona, intonà al quadro de gesso de la Sacra Fameja, che ne guardava da de sora el leto: cóntemela dài, dime le giaculatorie de alora, te ricòrdito de chel giorno che t’è dito i sequeri, parché no te catavi più na roba de valor?"
Ti te me fissi co i oci persi, come te fussi invià desbrojar grovéi de ricordi par poder mastegar insieme le parole de le vece orazion.
"Nona, cónteme de chela olta che è vegnù na zìngala a çercar la carità e ti t’è tirà fora dal casson de legno carolà, na sèssola de farina giala e te ghe l’è udà nel saco, carezando la testolina del butin che la gavéa in brazo...Te ricòrdito, nona?..."
Ti me fe sì col moto de la testa, ma mi vorìa de più, no voi che vaga perso gnente da la valisa de la to vita.
"Nona, scólteme, te ricòrdito de la sporta de paja par ’ndar a botega, de la moscarola soto la scala de legno, lustrà co la brognolina, de la porta che te seravi a la sera col cadenazo? Dime, nona, te ricòrdito? E de la quertina de lana giala e bianca che t’è fato a ucineto quando è nato el me butin... ghe l’ò ancora seto!"
Con un fil de oze par che te ricami i to ricordi e te me disi: "Butina, staséa mèjo alora..." E dopo te caschi ancora ne la nebia de i to silenzi, ma mi me par de sentir ancora la to man fra i me cavéi quando te me diséi:
"Sèntete qua vezin, fame compagnia fin che riva el nono."
Adesso na careza tra i cavéi te la fago mi, te giro la foreta par farte sentir più fresca, te sistemo la piega del nizol, te baso sora la fronte par darte sicurezza.
"Nona, dài che disemo el Rosario, ti tegni la corona, ma se te perdi el conto, ai grani ghe tendo mi..."
Ela la guarda la corona, la dise pian qualche Ave Maria, dopo la passa via... chieta. Mi continuo a pregar parché el Signor el me le lassa almanco ’n altro pochetin, par baratar quel che me ghe vorìa par imbrojar el tempo e domandarghe ancora: "Te ricòrdito, nona?"
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
L’ora de religion a scola che dà cussì tanto fastidio
La sentenza n. 7076 del Tar del Lazio, che esclude, ne i scrutini de fine ano, la valutazion par i studenti che frequenta l’ora de religion, xe l’ùltimo colpo gobo par scancelare l’insegnamento de la religion catòlica ne la scola
de Mario Klein
Memoria viva
El martire Ugo Bassi a Padova
’Na interessante conversassion co ’l Papà durante la guera. Le storie conplesse de la Republica Romana de ’l 1849. La ritirata de Garibaldi in mezo a la Italia co’ i garibaldini, Ugo Bassi e Ciceruacchio
de Gigi Vasoin
Da Adria
Là ’ndó coreva el Canalin...
de Sergio Bedetti
Da Thiene (VI)
El me paese: Sarsedo
... La parte alta del teritorio la gera tuta un’onda dolse de colinete e montesèi...
de Bepin Daecarbonare
|
