Editoriale

… E ghe xe anca chi sta pezo!
Propio in sti tenpi, no xe permesso èssare curti de vista; no basta pi vardare solo la nostra situazion, bisogna pensare che pol èssarghe chi sta pezo de noantri

El Coro La Valle, davanti al Municipio de Câmpulung.

Ormai no se pole pi dire “Mi no savéa”: le ocasion par farse na idea de come va le robe te ’l mondo le xe tante: la television, i giornài, i discorsi dal barbiere, quelo che ne conta qualchedun che se xe ’lontanà da casa e ga visto co i so oci de le robe che no ’l pensava che le fusse cussì brute…
Sta volta la ne xe capità propio a noantri de fare on pìcolo viajo fora del Veneto, dove no se gavarìa dito che la se fusse fata cussì crìtica.
Insieme con Luigi Frosi e i amissi del Coro La Valle de Padova, ghemo partecipà al 28° Festivalul International de Muzică Corala a Piteşti, ne la Contea de Arges in Romania, invità dal Coro romeno “D.G. Kiriac”.
El programa de i vari concerti, che ne ga fato traversare in longo e in largo el teritorio romeno, n’à fato védare loghi, incontrare persone, parlare e cantare par i “Belunesi e i Veronesi nel Mondo” de Câmpulung, ma soratuto spalancare i oci, restare colpìi da imàgini de miseria nera che parla ciaro su le condizion de vita de sta gente, costreta a fare i conti, da na parte co la situazion che xe saltà fora dopo tanti ani passà soto on regime totalitario, e da st’altra co la crisi in corso che ga fato el resto. Par farse on’idea: le paghe xe stà scurzà del 25%; on professore el ciapa el corispondente de 250 euro; l’afito costa su i 200-250 euro; in agricoltura on salarià el laora 8 ore e el ciapa 10 euro.

I oci tristi de ste putene… i parla da soli.

La tera da coltivare la sarìa tanta, el laoro no ’l mancarìa, ma no ghe xe i schei par pagarlo. E ’lora chi ga corajo el parte, el va in Spagna o in Italia a fare laori che i altri no vole pi fare.
Chi resta a casa, varda senpre in alto, anca parché la xe gente religiosa, e la spera che riva i schei da l’èstero. Ghemo visto le robe che da noantri le ghe jera in tenpo de guera. Casete de la misericordia, tute in fila drio la strada come tanti poareti che speta el passajo de qualche turista: do camarete e on desbrigo, co ratatuje de ogni gènare, qualche galina, on fiore, tanti cani; pi de la metà le xe sarà, bandonà, dirocà, come on vecio senza pi nissun che ghe vaga drio.
Có riva sera e a la festa, te vedi ste creature, veci co putini, sentà so na piera davanti casa: e i speta… e i speta…
Ghemo parlà con Veneti de seconda generazion, emigrà in Romania te ’l dopoguera. I xe delusi, i se sente desmentegà da na nostra Region Veneto, inpegnà in altre direzion. Ghemo tentà de dirghe, visto che i parlava dialeto belunese, che in sto momento la xe dura par tuti, ma in cuor nostro, dopo quelo che ghemo visto, gèrimo e semo convinti che lori i sta tanto pezo.
Ghemo promesso de contarlo in giro. E cussì ghemo fato!

Una de le tante casete vode…

[torna sopra]