|
Da i Coli Euganei
Le do sartorèe
 |
| Sto abito bianco… pi de na volta gavéa cunà el sogno che ’l fusse mio, de portarlo mi… |
Chel dì la me amiga gera vegnù a trovarme dopo tanto tenpo che non se se vedéa. E proprio par questo ghe gera par aria tante robe da contarse. Par prima la ga scumissià a contarme del beo e del bruto de sto tenpo passà sensa védarse. Mi scoltava atenta, pregàndola de andare adasio par capire ben. Qualcossa de interessante ghe gera e par questo mi gavéa pensà a vose alta, diséndoghe: “Parché no se podarìa scrìvarli sti ricordi, in modo che no i vaga desmentegà?” L’amiga quasi no ghe credéa, rispondendo subito: “Ma pènsito che valga la pena?” Però sensa spetare la me risposta, ècola scumissiare a contarme de foga, piena de contentessa. Eco qua el so raconto.
– Fin da picenina me piaseva vestire le bànboe co de i tochetini de stofa. I gera ritaji de tanti coluri, e le prime bànboe, no podendo avérghene una de vera, le gera de sasso. Sì, proprio cussì. Rancurava i sassi ben sagomà e par mi i diventava bànboe. Me sentava soto el moraro grande in te l’ora che i altri dormìa e inventava de i vestitini. Po’ na pesseta ligà la gera la traversa, una triangolare so la testa gera el fassoeto. E la bànbola pi bea del mondo gera fata.
Pi avanti gera rivà el tenpo de scola e me gera proprio inamorà de la scola. Lì, sentà su chei banchi, me pareva de stare andando a la conquista del mondo. Ma col passare del tenpo, no esséndoghe pi schei, gnanca par conprare i libri, pur provando on gran dispiassere, me ga tocà lassare la scola e, tuti d’acordo in fameja, andar a inparare a cusire par diventare na sarta, ansi in dialeto i ghe ciamava sartora.
Ghe gera za anca la scola de l’“Avviamento Professionale”, ma a on serto punto eco là me mama so la porta de la sarta pi brava del paese a domandarghe se la podéa tore la so toseta come “apprendista”, che alora se diséa “fare pratica”.
Partìa ogni matina co la me bicicreta a on freno solo e via, zo pa la dissesa. Par rivare là ghe gera du chilometri de strada. Par le prime volte gera on pocheto emossionà, no conossendo sto anbiente, ma dopo me so’ ciapà sinpatìa invesse e anca amore par el novo lavoro. Eco, anca lì se dovéa scumissiare da l’abici. Par prima cosa inparare a tegnere ben in tel déo el deale, tegnere giusto l’ago, infilarlo ben, cioè inpirare ben el filo ne la cruna e tegnere in modo forte e giusto le fòrbese. A sto punto eco i punti da inparare, scumissiando dal sorafilo, al sotoponto, el punto in crose e la inbastidura, che la dovéa riussire bea drita, on punto dopo l’altro a la stessa distansa. Dopo ghe gera el punto indrìo e, el pi difìssile de tuti, el punto buseta. Con queo se faseva le busete (occhielli) e na volta inparà a far le busete, se podeva scumissiare a doparare la màchina da cusire, che alora la funzionava a pedale, no la gavéa motore.
Quanti sogni in chel tenpo, spenzendo chel pedàe. Quante canson cantà co la mente, fin che la màchina coreva ricamando punti sora la stofa. La gera na canson vecia quea che me piaseva de pi e la faséa cussì: “Primavera baciata dal sole / c’è nell’aria profumo di viole. / Soto il pesco tuto in fior / si sussurrano l’amore / lo studente e la sartina birichina…”
“Me par che el titolo fusse ‘Lo studente passa’.”
“Sì, proprio cussì, te ricòrdito?” la me dise alegra, vardàndome. Ma sensa spetar risposta, eco che la ga za ripreso el so raconto.
– Có ’ndavo a inparare a cusire, in bicicreta, rivavo tuta giassà. La siora Maria, mama de la sarta che me insegnava a lavorare, la me voleva on gran ben, come na mama. Có la me vedéa rivare cussì giassà, la me tirava arente, disendo: “Vien qua, parsimolina (prezzemolina)” e intanto la me metéa in man na patatina americana (la me passion), bea calda, parché la me scaldasse, prima de magnarla, le man.
Chel periodo xe stà proprio beo, inportante par mi. Dopo xe rivà quel de la scola de tajo, fato ’ndasendo a on corso, in te na sità pi arente. Na volta avù tra le man el me diploma da sta scola, eco che mi gera na sarta conpleta. Ansi, in chel tenpo se usava dire “na sarta finita”. On bel vestito podeva farlo a modo mio, originàe, proprio inventà da mi, con na piega de qua, nantra de là, co le grespe o le alsete. Podeva rotondare el colo, o farlo pi a ponta, difarente insoma de i àbiti normai che se vedeva ’torno in te i figurini. Anca i vestiti, o mèjo, i àbiti da sposa, bianchi, lunghi e col “strassino” me piaseva tanto farli. Le spose le gera senpre agità, preocupà, ma in fondo contente. Mi po’, có me lo trovava pronto beo stirà sto abito bianco, me dava na gran contentessa e pi de na volta gavéa cunà el sogno che ’l fusse mio, de portarlo mi…
E qua, eco che la me amiga se ferma, ronpendo el discorso e mi fasso finta de no acòrsarme de i so oci lustri. “Gheto finìo el raconto?”, ghe digo, canbiando discorso e parlando de come xe canbià i tinpi da alora. Ma ela la continua disendo:
– On pochetin a la volta la gente no se ricordarà pi del valore e de l’inportansa de le stofe; par esenpio, za adesso i le conosse poco. No i podarà savere distinguere na stofa da on’antra. La pura seda dal coton, da la lana pura. Me mama, par dirte, la brusava co on fuminante on tochetin picenin de stofa par sentire se questa la gera lana pura. E da l’odore ghe vegneva la sicuressa. E el lin? Te ricòrdito che el se semenava in tel canpo, de i trami intieri e se ’ndava a védarlo quando che ’l fiorìa, e gera proprio na meraveja sto semenò de fioriti color del ceo. Al dì de ancò i dòpara tanta plastica che se ciama sintetico. De busete i ghe ne fa poche, parché xe pi còmode le ciarniere, cussì i dise. Tuto canbia col tenpo. Se sa.
– Le mode no se discute – la dise, vardando do tose che le passa co le braghe de tela a vita bassa. – Te ricòrdito –, la me dise ancora – i abiti a saco, a trapessio, a paloncino e la minigona? Te ricòrdito che confusion alora? Quel che conta sarìa de no pèrdare el gusto de le robe ben fate da l’artigian, fate co amore.
La me amiga me varda soridendo: adesso la se ga ’legerìo dal peso de i so ricordi, vegnù fora come on geto de aqua ciara. Pì tardi, eco che la conpagno al porton e punto i oci sol so vestitin tuto fato a man.
Se ghemo lassà co on saludo pien de afeto e de na amicissia restà drento, come na roba pressiosa, che gavéa l’odore dolse de la nostra beata giovinessa.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
… E ghe xe anca chi sta pezo!
Propio in sti tenpi, no xe permesso èssare curti de vista; no basta pi vardare solo la nostra situazion, bisogna pensare che pol èssarghe chi sta pezo de noantri
de Mario Klein
Da Verona
El Galelito
de Wanda Girardi Castellani
|
