|
Da Lendinara (RO)
Fracando el farsoro
 |
| Bepo el goernava la stala, el monzéa la vaca… (foto da Candiana nei miei ricordi de S. Manfrin) |
Bepo Manzo jera uno de quìi de na volta, ligà a le tradission e ai costumi de i tenpi indrìo, che gavéa obedìo a so pare fin che quelo, par na disgrassia so ’l canpo, no ’l ga tirà le ache. Chel poro vecio se gavéa voltavìa fin che ’l fracava el farsoro, arando on canpo na matina bonora, prima che se alsasse el sole. Bisognava farli i mistieri, a ogni costo, anca de note, parché ne la so fameja, i Manzo, da senpre la tera mantegnéa ma anca la comandava e la frustava.
Fin che ’l vecio chela matina arava con do cubie de bo, Bepo goernava la stala. Col scagnelo a na ganba ligà in vita e la secia streta tra i zanoci el monzéa le vache; el le parava a l’albio bastonàndoghe la gropa col cornale, el ghe rifaséa la latiera, el scoava el socale e l’andio e, par finire, el spassava el pòrtego. No ’l pensava serto a so pare so ’l canpo, indafarà come el jera.
Quando la sposa co la sporta de paja la se ga portà par la marenda al vecio so ’l canpo, la se ga catà soto i oci la disgrassia. El paron, voltavìa seco, jera stà strassinà da i bo lungo mèsa macia de tera. Po’ i bo, no sentendo pi tirare la cavessa e la vosse del vecio, gnanca che i gavesse capìo, i se ga blocà, ansimando. El vecio i lo gavéa assà trenta metri pi indrìo sol solco che fumava al briseghin de la matina. La sposa xe corsa indrìo sigando, co le ma su i caviji. “To pare xe morto” la ga butà in facia al marìo. “’Sa dìsito, scroa” ga risposto elo, tirando quatro sarache. E tuti du insieme i xe cursi so ’l canpo.
Anca Bepo, ’desso inpalidìo, el ga ligà i bo a la pianta pi vissina e el ga ciapà so na brassà so pare, za stenco, e i xe cursi verso casa. Bepo in chei mominti el ga perso anca el lume del servelo, el ga fato quelo che no ’l dovéa perméterse, ma quelo jera so pare. E, sensa rajonare el ga portà el morto soto el portego e ’l lo ga butà so on mucio de fen che jera lì so on canton e coerto co on nessolo che la sposa jera corsa a cavare da la cassa de la biancherìa in càmara.
Intorno intanto se gavéa fato i quatro boce che i pianzéa disperà parché, come tuti i nevudi, jera tanto tacà a so nono. Bepo ga comandà al pi vecio de córere a ciamare el mèdego e al secondo toso de ciamare el prete. El morto el gavéa ancora le man, le braghe e la jacheta sporche de tera. El gavéa perso el capelo frusto e la melona tuta pelà la jera coerta da gosse de sudore. El viso, con la barba lunga, el jera bianco ’fà na pèssa da lissia.
La sèna jera strassiante: tusi e spusi che pianzéa, inzanocià ’torno el paron de casa che, dopo tanto strussiare, el jera partìo cussita in freta. El dotore, costatà la morte, el diséa: “Beato lu che no ’l ga soferto e no ’l se ga acorto de morire!” El prete, drito in piè, col spersorio lo ga benedìo e dopo, incuciàndose, el ghe ga sarà i oci che i jera ancora meso verti e el ga dito: “Ciao, vecio, te si partìo prima, ma anca mi, da poro vecio, me manca ancora poco. Parècieme su là on postesin mancomale!”
Adesso tuti jera su i pastissi: el fiolo, catando so pare morto el dovéa assarlo so ’l solco de tera su i canpi e no mòvarlo sensa el permesso del maressialo de i carabinieri e so mojere parché la lo gavéa coerto, magari desfàndoghe i conotati. Ma el fato e la considerassion che i Manzo i jera per i porican in afito, tute chele autorità le ga assà da parte el dovere e savendo che i ga catà el morto ancora caldo, i ga verbalisà che ’l jera ’pena morto soto el pòrtego, intrabucàndose so on restelo e rabaltàndose so chel mucio de fen.
Qualche volta anca na busìa ben dita, pol solevare la miseria.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
… E ghe xe anca chi sta pezo!
Propio in sti tenpi, no xe permesso èssare curti de vista; no basta pi vardare solo la nostra situazion, bisogna pensare che pol èssarghe chi sta pezo de noantri
de Mario Klein
Da Verona
El Galelito
de Wanda Girardi Castellani
|
