Tradission a ris-cio

Bàcaro

Bàcaro ’a xe na definission che no se sa de sicuro ’a so origine. Co un poca de fantasia qualchedun la fa derivar da Baco, el dio del vin, o anca da na frase dita da un gondolier che beveva e se intendeva de vin bon, e quando che el ghe ne trovava de particolarmente pregià el diseva che el gera proprio un vin de bache, fato proprio co i raspi de ua.
Da questo xe nato el bàcaro, ostarìa particoeare dove co i amighi se se trovava e se beveva vin pregià conpagnà da i cicheti. I cicheti i xe nati par inpenir un poco el stómago prima de bévar. I cicheti degni de sto nome, par esenpio, i xe mezo vovo co na aciuga, o na segoeta, un tòco de pan co un fià de bacaeà mantecato, na aciuga co un càparo. Insoma, no un pasto conpleto, ma un spunciar calcossa da magnar.
Anca al tenpo nostro i bàcari i esiste ancora anca se poco numerosi. I xe locài che i someja a ostarìe e i cicheti, oltre a i tradissionài, i xe stai aumentài de quantità fin a rivar a pìcoi piati de pietanse. A Venessia, me ricordo, che ghe ne gera tanti fin a na trentina de ani fà, bei, storici, cavài fora dal resto de i locài. Al giorno de ancùo quei che xe riussì a vìvar i xe senpre pieni de turisti e de i pochi venessiani restài.
’A xe na tradission che ’a dovarìa èssar conservada par lege, invesse qualchedun de questi no i xe né carne, né pesse e i buta caigo su ’a so storia originàe. Comunque quando che ghe ne vedé uno che ve ispira, ’ndè dentro a gustarve na onbra de vin bon e un cicheto. No sarà inpossìbie trovar anca qualche scritor che col tacuin in man el scrive ’e so sensassion che i bàcari ancora fa nàssar.

[torna sopra]