Robe de Ciósa

I ortolani “marinanti” visti da Comisso

Panoramica su i orti de Marina.

Ormai i ze restà in pochi e in gran parte i à tuti ’na sèrta età. I zóvani no à seguìo – come se usa dire in italian – le “orme paterne” e i s’à dà a fare mistieri manco fadigosi, più seguri e… pi nobili… Su che parlo de i ortolani de Marina. Adesso chi vien in spiagia a Sotomarina (e me riferisso in ispèssie a i padovani, che ze la magioransa) no i imàgine gnanca lontanamente come che gera la vita de i “marinanti” fin a dopo l’ultima guera.
No ghe gera turismo alora, o, mègio, no ghe gera tanti alberghi, pension, locande, negossi, vie, viali… come adesso. Ghe gera solo quela che ancùo i ciame “Sotomarina vècia”, quela, per capirse, fata de case lònghe e strete (adesso quasi tute restaurà o rifate), divisa in tante calesèle, indove quasi tute le famege aveva davanti a casa el so ortesèlo a uso familiare, i animali da cortile ruspanti, el galeto che cantèva a l’alba, e perfin el so bravo porseleto che vegniva massà prima de la festa del patrono, San Martin, al prinsipio de l’autuno. Co i ani, a levante, verso el mare, sarìa nata la Sotomarina de adesso, quela che i ciame “Sotomarina nova”. La Sotomarina “turistica”. E i ortolani? L’ò za dito, la ze deventà ormai ’na rassa in via d’estinsion.
Volemo fare, come che se dize in gergo cinematografico, un flash-back, cioè volemo tornare indrìo esatamente da otantatré ani, al 1929? In quel’ano el scritore de Treviso, Giovanni Comisso (1895-1969), el cantore de Ciósa, vinsèva col so libro “Gente di mare”, ambientà in massima parte a Ciósa e Marina, el premio nassionale Bagutta. Vorìa provare a tradure in dialéto ciosòto un brano de ’sto libro, quelo dove Comisso descrive da par soo i ortolani de Marina (e su sicuro che Comisso me perdonarà per averme tolto ’sta “licensa”…).
«Assiduo e fadigoso ze el lavoro ne i orti. Sèrti xe su la riva del mare fin a la foce de l’Adige. I sta subito dopo la larga spiagia, riparà co un spalto de sabion da i venti de tramontana e pi spesso da siève de cane. Altri se stende verso la laguna de Ciósa e el vecio forte de Brondolo. La tera se alterne a le aque de i canài e de la laguna, se alse ponti, alti àlbari lìmite a trati l’orizonte, ma ragi de sole iùumine oltre le case de Ciósa lontane e le vele che score sul Brenta e su la laguna.

Uno de i prodoti tipici de i orti “marinanti”: la famosa goldoniana “suca baruca”.

I casoni dove i ortolani méte al riparo la verdura, i so atressi e i so corpi strachi ne le curte soste, ìndiche inumerevoli i orti. Per andarghe se segue streti passagi de tera tra canài e fossi, se passe sóto a portài de matoni rovinà e subito al de sóra de le siève de cane spunte i capèi de pagia de i ortolani cufài su le gambe o i fiori de seòle scopianti o quei bianchi de i bisi. Le piante de artriciòchi azurastre ne i fruti e decorative ne le fògie a forma de lancia, sigile la tera. Un muro vien dopo l’orto, se crede che dadrìo ghe sia altri orti, invesse, verta ’na porta sconquassà, se vede la laguna e l’alternarse de le case de Sotomarina oltre le aque. El lavoro de i orti no ze come el lavoro de i campi che lassa de i riposi. La tera fertile ze svelta nel produre e perché la produsa tanto la dev’èssare vigilà sempre. I ortolani ze sempre sóra a spianare, co le so man a curare, a sapare, a racòliare. Cresse la so fadiga col créssare de la forsa del sole. D’istà per lori no esiste la note, i parte da le case qualche ora prima de l’alba per èssare a le prime luse del giorno sul posto, marìo, mugère, fiòi e quei apena nati che i vien messi nel cason tra i pomidori e le melansane. Se vien zo poca piova i porte aqua dolse co le barche che la va a tiòre al Brenta. I magne de fuga quelo che i s’à portà da casa, i fa un reposin dopo magnà, e dopo i tache ancora a lavorare. Lenti i passi descalsi sul teren de sénare che scòte al sole, lento el vigilare de lo “sguardo” a l’ombra del gran capèlo de pagia nera, lento e continuo el mòvarse de i brassi. Se impenisse le séste e el cason ze tuto pien e luminoso de colori solari ne l’ombra, vien zo la sera e resprende le aque de la laguna e de i canài, e co l’ultima luse, caregà la barca, i aprode al mercà, dove se sènte l’odore acre de le seòle missià co quelo dólse de i pomidori.
Nel poco spassio de la penisola tra la laguna e el mare, la popolassion co le so famege numerose à ne le strete calesèle case alte de dó stanse per piano. (…) Vissin a ’ste case che pare gratacieli in miniatura ghe ne ze altre che ze restà al pianotera e le ze quele de quei che à desperso i vadagni in matessi de vita. La casa che avarìa dovesto alsarse, la ze restà anichilìa e dopo èssare stà vendùa, la ze deventà magazin per altre famege restàe salde ne la so richessa.
In‘’ste case amodernà se vede in t’un canton tutavia o el vecio capo famegia o la vedova, o tuti dó, vestìi a la maniera de quando i andèva a conquistare la tera a le sabie butà da le maree e dal vento. Ela col so capèlo de pagia nero e la larga còtola e élo co la camisa a righe nere che alora a tegniva fòra de le braghe. I sta in parte siti siti e pensierosi, contenti de i schèi muciài, lavorando giorno e note a trasportare aqua dólse co le barche dal Brenta a i so orti arsi da la sé, a sapare, a tiòre sù patate e seòle e melansane e pomidori e le grandi suche.»
Altri tempi! Altra vita! Altra zente! Ma che bravo Comisso! A n’à lassà un quadreto de ’na Sotomarina che ormai no esiste più!…

[torna sopra]