|
Tradission
’Arda che xe rivà le giostre!
 | | E ghe xe anca la “Ruota gigante” che te vedi la sagra da l’alto… |
Riva la festa del Santo Patrono e xe sagra in paese. Un paro de dì prima la piassa se inpiena de carovane, i putèi i xe tuti contenti: xe rivà le giostre e doménega xe gran festa. Gran movimento in paese parché le giostre, se da na parte le porta festa, le fa anca na s-cianta de paura parché, i giostrari i vien ciapài come sìngani co’ tuti i pregiudissi: i xe onti, i porta via i putèi, i frega i schei, i va robare par le case… Me ricordo co’ jero putèo e ’ndavo casa onto dopo ’ver zugà tuto el dì; la mama me mandava subito a lavarme disendo: “Varda là, a te si onto cofà un sìngano!...” e sto fato te fa ’vere senpre na serta paura de sta zente. Co’ le giostre, riva anca le carovane dove drento ghe vive i sìngani, senpre onti par el lavoro che i fa, pólvare co i se distira par tera a sistemare cavi de la luce e pedane de ’egno par rivare a livelo de le giostre.
Però, par ’ndare in giostra, a ghe vole i schei, alora via, farse pi braveti, obedienti e jutare in casa la mama e la nona par ciapare qualche palanca. Par l’ocasion a se spaca anca la musina, el porseleto de teracota tignùo là proprio par le feste. A se taca alora anca a curiosare in meso a le giostre, se se informa quanti schei se spende par fare un giro e, da bravi matematichi, calcolare in base a le risorse, quanti giri se podarà fare su le giostre che ne piase de pi. No ghe xe solo le giostre, ghe xe anca i baraconi co tute le atrassion, prove da fare e premi da ciapare. Ghe xe quela de i bussoloti da butare zo co le bale de pèssa, el tiro a segno dove se spara col fusile a aria conpressa a de i balonsini che se sposta col vento e a de i gesseti che gira ’torno, sinò ghe xe el bancon de butilie dove se tira de i anèi e se porta casa la butilia che te riessi a inaneare. La pi bela de tute però el xe el lagheto co le ochete: su na bacheta a xe ligà un spago che soto finisse co un anelo e questo te ghè da inpirarlo sul colo de l’ocheta che te ghè sielto. Le ochete però, le se move su l’aqua, le se dóndola parché le xe de celuloide e pararìa fàssile inpirarghe l’anelo al colo. Se te riessi, dopo tanta passiensa ciapàrghine una, te credi de ’vère in premio chissà cossa, invesse, el giostraro el ghe dà na ociada soto al culo de la ocheta e, el te dà par premio un strafanto de plastegon, made in Cina, che ’l dura sì e nò fin che te rivi casa. Pensare che de premi a ghin’é na carga messi in bela mostra, chissà quala ocheta bisogna ciapare par vìnsare el s-ciopo o el pupasso gigante…, de serto la sarà la ocheta diversa de colore, quela che se moesta pi de tute e che no se riesse a ciaparla mai. Ghe xe pi in là i banchi de i ciuci, i bagigi e le màndole, l’ometo che vende el zùcaro filà, la parona che vende le frìtole calde e i crafen, el tiramola e i crocanti.
No manca le giostrine par i putéi: el trenin co la vaporiera, co l’inmancabile canpanela da far sonare al putèo pi fortunà che ciapa par primo el posto e, le mame che gira ’torno anca lore par chietare i putèi spaventài dal rumore… Eco la giostra a cavài che va su e zo e senpre le mame che gira ’torno par tigner sù el putèo, ché no ’l casca basso e ché no ’l se spaenta pi de tanto. Pi ’vanti ghe xe le giostre par i tosati pi grandeti e coragiosi: le astronavi e i mostri che gira ’torno e che le va su e zo tirando na leva; su queste se pol montare in do e le tosete le siga e le urla ogni volta che le se alsa o che le gira pi forte. Finalmente se riva a le giostre de i grandi: le gabie, dove se monta in do o tri tosati, se taca spénsare in ’vanti e indrìo fin che la gabia no la fa el giro ’torno, bravure da brivido dove i tosati mete in mostra la bravura e el corajo.
No parlemo, dopo, del ”Taboga”, anca questa na bruta bestia, un gran quercio roersà che gira senpre pi forte e che ogni tanto el fa un salto, faséndote trovare par tera senza spetàrtelo. I pi coragiosi o incossienti i serca de stare in piè nel centro, ma la gran parte i ciapa de quele smoltonade da far rónpare anca qualche dente… Quela però che atira tuti, grandi e pìcoli, xe la giostra de i autoscontri. Sta giostra la xe piena de colori, dove casca na gran piova de sintile e de luci sora le teste de la zente da na rete dove le machinete ciapa corente par caminare. Sta giostra la xe anca in parte seria, bisogna córare ’ndando co un serto criterio: intanto bisogna tore i getoni a la cassa, dopo bisogna védare ben quale machineta la xe pi veloce e scatante, no tute le core conpagno. Quando che sona la canpanela del via, tuti in pista, spintoni e lote par ciapare la machineta preselta, e de solito te resti deluso quando quelo che xe sora el te dise che ’l ga ’n altro giro da fare. No te resta altro che ciapare quela che resta voda, che de solito la xe quela pi scarcassona e che va pi pianelo de tute. Al secondo sono de la canpana, tuti parte, e par istinto tuti gira tignendo la man drita e guai a chi se sogna de partire da la parte contraria, el vien suito ciapà de mira e incantonà in parte, ma che gran divertimento, smoltonare e vignere smoltonà.
La sagra la xe par tuti un momento de la vita che ricordemo co nostalgia, le xe serate che ne fa desmentegare i pensieri de ogni dì e gòdare del momento che semo drio vìvare come tocasana del diman!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Ghemo paura che…
Par festejare i trent’ani de vita, xe stà fate tante bele manifestazion de cultura, tante iniziative par raforzare l’inpegno portà ’vanti dal nostro mensile. Xe stà, però, tegnù sconta la preocupazion che, dopo la festa, ghe sia boconi amari
de Mario Klein
Tradission
’Arda che xe rivà le giostre!
de Luigi Frosi
Da Thiene (VI)
L’emigrassion a pìe
Emigrare deventarà, presto, un mestiere...
de Bepin Daecarbonare
Da Verona
Za che te si mojo…
de Lucia Cozzolino Masotto
Da Verona
I 200 ani de l’Istituto Leonardi
de Lucia Beltrame Menini
|
