Da Verona

Za che te si mojo…

El Museo Civico di Scienze Naturali de Verona.

La me amiga Italia la s’à fato catar bela e pronta su la porta de la Casa de Riposo. Informada la responsabile che la starà fora con mi un bel tòco, tirada a malta fina, la soride come un butin indrìo a vèrzar i regali de Santa Lussia.
“Seto” la me bisbìa “qua le me guarda con un’invidia che non te digo. Non ghe n’è mia tante che pol andar in volta come mi. Grassie.”
Avemo deciso de andar al Museo de Storia Natural, ansi, l’è stà proprio ela a volerlo: “Così, vissin a quele robe che ga milioni de ani, me sento ’na s-cianta più zóene.”
El Museo l’è uno de i più bei e conpleti del nostro Paese. La meto zo davanti a la porta e mi vago a çercar un posto indove lassar la màchina. Le sale, splendide, le ne lassa imagade; ne piase soratuto quele con le farfale, de le bestioline inbalsamade, de i fonghi – spece quei velenosi che i è anche quei che fa più cioco, ma anca i panaroti e le zinzale ga la so belessa. Gira che te gira è passà in pressia piassè de do ore e andemo fora, prometéndose de tornar a védar quel che non avemo fato in tenpo a guardar. Ma, eco che piove. Córo, soto un’aqua a seci roersi, a tór la màchina e dopo fasso montar la siora Italia.
“Za che semo moje andemo par aqua!” ghe digo e ela la sganassa de gusto. Capitemo in de una pisserìa che fa anca altre robe bone da mangiar e se cavemo tute le voje, infis-ciandose del colesterolo e de altre miserie. Ma la piova la continua e mi ripeto con ela “Za che semo moje.”

… ne piase soratuto le sale con le farfale…

“Ma la seto la storia?” la me domanda.
“Che storia?”
“Ben”, la me dise intanto che la se còmoda aspetando el cafè. “Ghera un contadin che l’avéa sapà tuto el giorno adrìo i canpi e l’era straco morto. No ’l vedéa l’ora de arivar a casa par sponsarse. Ma eco che scominsia a pióvar e l’aqua la par un fiume. Lu l’è mojo fin drento la mìola e le scarpe le ghe fa cic-ciac da tanta aqua l’à ciapà. Arivà su la porta de casa, el vede la mojer che lo speta e el pensa: “Che dona! La ga za pronti i sugamani par cavarme via un poco de aqua. Senti che bon odor de polenta col ragù.” Ma, proprio intanto che el sta par métar piè dentro la porta, la mojer la ghe slonga do seci e la ghe dise: “Bepi, za che te si mojo, va par aqua.”
Alora Bepi, sensa dir né ai né bai, el tol sù i do seci e al va al posso a tor l’aqua. Quando che el torna indrìo el par proprio un pulsin negà. El va in cusina, con la mojer adrìo, el brinca prima un secio e dopo l’altro e el ghe le rosersa indosso. Dopo, tuto chieto e soridente, el dise a la dona:
“Za che te si moja, va par aqua.”
Ghe tachemo una sganassada che fa girar tuti i altri clienti.
“Non so dirte dopo come che la sia finida. Me informarò e forsi te lo savarò dir la prossima volta.”
Quando se saludemo la me dise: “Ciao, te speto, ma ti vien quando te pol” e la sparisse drento la porta automatica de la Casa de Riposo.

[torna sopra]