|
Editoriale
Comunque… Bon Nadale!
Anca se, dopo de sto nùmaro de la rivista, no savemo come la ’ndarà a finire… saldi ne le nostre idée de bona volontà, de inpegno, de prospetive e de fede, ghe femo i nostri mèjo auguri a… A chi?
Na domanda cussì no la xe gnanca da fare… A chi vuto che ghe li femo i nostri mèjo auguri?
Con viva riconossenza, a tuti i nostri letori che par trent’ani i ne ga fato capire che Quatro Ciàcoe la xe na iniziativa ùtile, inteligente, onesta e necessaria par mantegnere vivo l’amore pa ’l nostro passato.
L’àlbaro del presente e del futuro no ’l pole stare in piè senza le raise che lo liga a la tera del tenpo lassà a le spale. Difati, i progeti de oncò, le prospetive, i slanci in avanti i ga senpre bisogno de na rincorsa ciapà da qualche passo indrìo.
El sentimento, l’amicizia, l’amore, le tradizion, le usanze, el senso de la fede, de la festa e de i boni propòsiti… i xe i valori che ghe auguremo a tuti de ritrovare, spece in ocasion del Nadale. Par vìvare mèjo la vita de oncò!
Ma, on augurio par on sereno Nadale, ghe lo femo anca a Enti, Istitussion pùbliche e Sponsor; semo ne la stessa bufera: se i ne slonga na man, a se salvemo anca noaltri…
Al Gesù Banbin che ’riva ghe disemo: “TE VOLEMO BEN” e, se ’l se adata, lo invitemo a vegnere te la nostra pìcola grupia, anca se no podemo ’sicurarghe el fen pa ’l bo e pa ’l so musseto.
A chiunque ne leze, la Fameja de Quatro Ciàcoe ghe augura: Bon Nadale… comunque!
[torna sopra]
|
