| de Vittorio Ingegneri Dinerio |
|
Le storie de Dinerio
Amicissia desquajà
 | | … go ’ncora el me bancheto da savatin… |
– Scolta, barba, sta registrassion rancurà stamatina co ’l me trapelo. Senti, senti: “Gut morghen... bondì, Aldo, come steo?”
– Mi stago ben, anca massa! Ma ti chi sito?
– Boja dina! No me conossìo più? Va ben ca manco te sta borgada, ormai da calche lustro, però o mi so’ deventà vecio come el cuco, o vu gavì desquajà n’amicissia da le orbarole ca gavì in vetrina.
– Ben, me piasarìa assè saere chi che te si. Co’ quei du mustaci bianchi ’fà ’l pelo d’un articioco e chel capelasso foresto a bandinela larga fracà su le rece, scùsame seto, te me pari un taradài ca vien qua a vèndare buganse da la todescarìa.
– Come gavìo fato a indovinare? Rivo giusto da la Germania. Go fato un scapon, ’profitando del ponte de Pentecoste. So’ vegnesto basso soratuto par fare na visitina a i parenti e magari par saludare un caro amigo come vu, visto che se gavemo incontrà. Ricordo ’ncora che me pòro nono, de studio poco ma de sagessa tanta, el diséa: “A far un amigo basta un goto in man, a pèrdarlo basta ’nar stare lontan.” Me despiasarìa ca fusse capità sta rogna propio co’ vu, Aldo Bordin. Mi ve cato senpre preciso, si restà ’ncora chel sgnanfo co ’i vostri ocialeti in ponta a la canopia. Par vu el tenpo se xe fermà. Quante ghe n’avemo conbinàe tel fare mafia insieme có gèrimo in vareso? Ve ricordèo có gavì ciapà la velada da la Nori del Portelo e mi la go rancurà co ’l me bel sestin par fàrmela cascare in brasso? Me so’ chinà chel tanto da farghe asio bon, come ca se pol cuciarse par tirar sù da tera un strasso mojo. Capémose, la mia no xe stà na sgnèsola da la muta a la sorda. Me so’ tacà co’ ela a la garibaldina, no, savìo, par farve un torto, ma par consolarla, poareta, savendo che no gera po’ cossì fadiga descartossare chela caramelina da la so cartaciucia. La gera na squinsi-squinsi, la gavì ciucià prima de mi, vu. Sta pèpola inroscà de morbin, mai de pati a inpegnare na sera a canpanon co’ st’altre bigarele de la so età, ca saltava su i quarèi segnà de calse bianca soto el volto de la ponpa.
– Sacramen, gnancora no te figuro co’ i me oci strachi, ma da come te la cunti taco vegnere in sì.
– Manco male, caro vu. Donca sarà ben ca me palesa mèjo. Mi so’ Dario Fanton, zerman de Otello Toso, l’atore ch’à fato del cine, come “El ponte dei sospiri” e ca ga ressità la parte mèjo ne “La Cittadella”, uno de i primi rebeloti trasmissi da la television, na pelìcola d’amore che da pòri temelechi se gavemo inboressà un pasto.
– Va’ ramengo tuo, valà! Te ghè rason: perdóname, so’ un fià stagnoto de mèmini. La to vescoleta me ga cavà le scarpìe dal conprendonio al bueldrito e taco ’nare de canéo ’fà i ochi, sensa tore la vermolina.
– Eh sì, no gavì tuti i torti gnanca vu, parché “fora dal giro, amigo mio, deventè propio dessavìo” e bonanote sonaduri.
– Ben, da quanti ani gheto molà la nostra marùgola? Propio no me ricordo parché ’pena fenìo el ’viamento so’ nà stare a Stra, a fare el scalda-cola soto le sgrinfe de me barba Ànzolo, un calegaro de la Riviera ca diséa: “Sensa baston no se doma garzon”. Me mare ga volesto ca inpara sto mestiero. Xe da ’lora che noaltri no se gavemo più visti.
– Medigo che da lì a poco, so’ partìo anca per la Germania, dopo ’ver trabatà squasi oto misi come bocia de botega drento la Bira Itala Pilsen in piassa Spàlato, gnonde me pare faséa el foghista.
– No te vorè mia darme da intèndare che te si nà là a fare el mastro biraro...
– Ghe ga mancà poco! Serto a la Pilsen, inboconando le caldaje de carbon ca me sofegava da la pólvare, calche segreto su le biscote de vena e segàla lo go tarmà e a Monaco, fadigando parlare in sbrisso cruco, go inparà fare el resto. Siché ’desso in birarìa soto la me capela go na ventena de todescati ca me vien drio a bacheta.
– Oramai che se gavemo cavà i vermi ciapà in cuna, démoghe un tajo a sto tinghe-tonga (botta e risposta) e vegnì qua ca se ciavemo n’onbra de moro come a i tenpi bei.
– Volentiera! Però no pensare che stenta far tachia co’ ti; me maravejo assè che te piasa ’ncora un bon bicer de vin, sentendo che te manisi bira de marca foresta.
– Serto, un bon goto de cheno lo bevo anca là. Me lo fasso rivare da na càneva seria de Pramajore. E vu alora gavìo ciapà el lavoro de vostro barba?
– Sì, però el destin m’à tirà contro, drento e fora da la fameja. No cade che me despiega mèjo. So’ restà solo come un can e go ’ncora el me bancheto da savatin, ma el xe deventà un mestierolo magro. Forse so’ uno de i ultimi che sgualiva tachi de scarpe co la raspa e inbroca semensete a man. La zente no se fa più métare sù le meze sòle.
– Dato che si restà vita sola, vegnì via co’ mi ca ve fasso voltare pagina, anca se no si più un zovanoto da le balde speranse.
– Dal vostro zagolare capisso che in Germania se sta mèjo de qua.
– Parto doman oto, vegnì via co’ mi e vedarì che calche euro in più ve lo farò ciapare de sicuro.
– No sta’ ingolosirme par gnente. So’ vegnù a Monaco co’ me neodo, l’altr’ano, a la festa de la bira e go capìo che par mi là no ghe sarìa laoro, parché go incontrà pareci calegari vestìi co la petorina de curame, cofà quela che dopro mi có giusto scarpe.
– Va ben, go capìo, volì stare su le vostre e me despiase. Alora sarà mèjo ca se introsemo da veci amissi come ca se gavemo ’pena porporinà.
– Gheto sentìo che strana storia, barba! L’ò robà fresca fresca co ’l registratore al Bar Centrale, dove me so’ fermà a tòre un cafè.
– Caro fiosso, da sto ‘cava e miti’ te dovarissi aver intuìo che “l’amicissia xe na musina: se te la perdi te va in rovina”. E me parmeto de zontarte che “l’amicissia se desquaja ’nando in vaca quando el saltarelo de la càneva se spaca”.
– Urca, s’a te ghè rason, barba!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Auguri… ché passarà anca questa!
“Chi vivrà, vedrà” ga dito chel tale in punto de morte, prometendo eredità par tuti. Anca noaltri zercaremo de vìvare par védare cossa ne tocarà in eredità… dopo trent’ani de “bon servizio” a favore del dialeto e de la cultura veneta
de Mario Klein
Da Rovigo
El garase de Milio
de Gianni Sparapan
Da Verona
Origini del Carneval veronese
de Wanda Girardi Castellani
|
