|
Da la Bassa Veronese
Santina Beltrame la ne conta
 | | Qua so sta fotografia, mi éra za nuizza… |
Adesso la ga ben 87 primavere la Santina e, quando che vao a catarla in casa de Riposo a Isola Rizza, la se gode tornare indrìo nel tenpo, cussì la me conta de ela, de quando che l’era butela…
A quindes’ani la laorava za come comessa, in botega co ’l forno da Giovanni Buratto, a San Piero de Morubio.
Ela la servéa al banco; l’era brava da tratar co la gente, senpre pronta a servire tuti. Se i ghe dimandava l’ojo, subito la le travasava ne la bozza che i se portava adrìo ne la sporta e co na straza la se premurava de sugar ben el col de la botilia, se ghe ne sbrissiava na calche gozza. Par el zùcaro, invezze, la doparava la carta celestona adata par sto scopo e l’era abilissima a incartarlo ben, rizolando streti i bordi de la carta co i dièi. Cussì la faséa co la carta oleata par la conserva, el butier, e via discorendo. El suo l’era on laoro che ghe piaséa assè, anca se la so aspirazion pi granda la sarìa stà de far la paruchiera; ma quando la ghe l’à dito a so bupà, in quatro e quatr’oto l’à dovù métarsela via parché: “No go mia schei par inpiantarte na botega” el ga risposto.
La Santina la ghe voléa ben a la gente e la gente se catava ben, piassè co ela che no fà co la Pia, la parona. Quelo che però la mandava in visibilio (anca par la fame che la gavéa a chel’età) l’era el forno e el sistema de laoro par fare el pan.
La me conta che i fornari, alora, i jera tanti: Papo (Rebonato), so fradel Danilo, Cirilo e on Retondini da Bonavicina. I fornari, a le sié de la sera i preparava el levà (inpasto col lievito), po’ i lo coerzéa co on telo e el restava là tuta la note.
De solito ela no l’andava gnanca a casa a dormire, par via che (l’era el periodo autarchico) la restava là a incolar fin tardi, co nantro butel, Manio, so amico, i bolini su le tèssare del pan. Siché la restava a dormire da la Pia. Prima però la conpagnava fin sul porton Manio. La se ricorda, comossa, che lu el ghe diséa: “Sogni d’oro, Santina!” Po’ el tirava fora da la scarsela na létera: “T’o scrito, ma no te la dao mia, senò to moroso, Virgilio…”
A le tre de la matina, a i fornari la ghe butava zo la ciave dal spionzin ch’i nesse drento, cussì lori i scominziava el laoro: i ciapava on po’ de levà a la olta, i ghe zontava aqua caldina, sale grosso; po’ i inpastava. I faséa varie forme de paneti: i fassisti, i fungheti, i montasù, i corneti, le rosete, de le spacatine col tajo in mezo, col stanpo, ec., po’ i le coséa in tel forno a legna. “Che bon che l’era…” la ghe zonta ela, “e che profumo caldo de pan che se sentéa!”
Tuti a la matina i ’ndava a tórselo; ghera presenpio Lucindo Beghini, dito Checai… che ’l voléa on par par sorte de paneti. Ghera i òmeni aposta che provedéa a portare in giro el pan; co la bicicleta, na cavagna davanti e una dedrìo, i ’ndava da i casolini in volta: a Ca’ del Lago, da Siro, a la Fossa de là, a Belbrolo, ec.
“L’era tuta farina genuina, no come adesso, che i sforza i canpi de formento a sfinimento…” Po’ la ghe zonta: “E mi me dimando fin quando podemo resìstare, fin quando…”
La ringrazio par averme contà i so ricordi e ’verme fato risentire el gusto del pan de na olta.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Auguri… ché passarà anca questa!
“Chi vivrà, vedrà” ga dito chel tale in punto de morte, prometendo eredità par tuti. Anca noaltri zercaremo de vìvare par védare cossa ne tocarà in eredità… dopo trent’ani de “bon servizio” a favore del dialeto e de la cultura veneta
de Mario Klein
Da Rovigo
El garase de Milio
de Gianni Sparapan
Da Verona
Origini del Carneval veronese
de Wanda Girardi Castellani
|
