|
Editoriale
Auguri… ché passarà anca questa!
“Chi vivrà, vedrà” ga dito chel tale in punto de morte, prometendo eredità par tuti. Anca noaltri zercaremo de vìvare par védare cossa ne tocarà in eredità… dopo trent’ani de “bon servizio” a favore del dialeto e de la cultura veneta
Xe propio vero che la speranza ga da èssare l’ultima a morire. No credévino de védare oncora vegner fora la nostra rivista e inveze ècone qua, magari pieni de ceroti e co le cròssole, a continuare el viajo tra le conbine del “parlar veneto”, par no desmentegarse mai de le nostre raise e de tuto quelo che gavemo eredità da la vita de i nostri avi.
El grande Albert Einstein el ga dito: “È meglio essere ottimisti ed avere torto, piuttosto che èssere pessimisti ed avere ragione”.
Anca questo ne dise che no bisogna mai pèrdarse de ànimo: ne la vita de tuti i giorni, ne la musina, ne la pegnata, nel laoro, ne la politica, ne le bone usanze, ne le tradizion, ne le bone parole…
Co sto spirito e sto pensiero positivo, afrontemo el novo ano co tuto quelo che ghe ’ndarà drio, e se femo i mèjo auguri de BON 2013.
[torna sopra]
|
