|
Da Isola Vicentina (VI)
Có riva chel tenpo
 | | Eco ’ndove sto poro toso ga petà l’ocio, rabaltàndose ’ndrioschena, saludando par senpre la so caseta soto i du pissi lì tacà. |
25 Aprile. Có riva de novo chel tenpo, la mente ’a va in sofarensa, pensando a chel tanto dolore che on dì ’a guera la ga semenà. Mirando ’e tenere coline e spassiando so chea interminàbie distesa ghe xe ancora tuto intiero l’antico profumo che i nostri veci co’ tante fadighe ga saesto tramandar, fasendo de ’a canpagna ’n vero giardin. La mente ricorda che proprio ’lora so chel santo paradiso de ogni ben la guera ga fato senpio, no’ solo contro chi jera nemico, ma anca co’ chi se diséa fradèo, doprando chel vecio dito “Ocio par ocio, dente par dente”. Pensare che ’a parola guera no’ se dovarìa gnanca nominarla, sta bruta bestia, vero mostro de cativeria; invesse da che xe nato l’omo la guera xe stà senpre ’a so conpagna.
I primi ricordi che ’a mente la sforna li vedo come na vision, che dopo tanto ’a torna catarme. Penso da aver ’vudo 4, 5 ani có me xe passà par la mente de èssare fortunà a nàssare in meso a i mii de casa, tanto da acòrsarme che ’l popà, siben ’l fusse bastansa severo, par lu provavo na spece de venerassion, tanto da pensare, có lo vedéa partire co’ tuti i so atressi da laoro, ’l me paréa ‘l fusse ’n eroe a la conquista de calcossa de beo che faséa contenta ’a so fameja. A far risaltare ancor de pi la beessa del nostro gnareto xe bastà el primo dì de scola.
Jera l’autuno del 1944, co’ tuti i me conpagni se ghemo catà so ’a gran sala de l’ostarìa de Fagin. Prima de nar ’vanti xe mèjo far savere che ’tel paese de Isola Vicentina ’tel 1938 jèrimo nati in 99, 52 tose e 47 tusi. La confusion che girava ’torno so sta sala jera cossì fastidiosa da far star male, anca parché a far tanto bacan jera le do mestre ciamà “pevarine”: no’ par gnente le distribuìa pelà sol dedrìo a i tusi che no’ staséa fermi, e a le pore tose le ghe desfava le dresse a forsa de tiràrghele, faséndoghe briscolar la testa de qua e de là da far on vèro e proprio suplissio.
Finìa ’a guera, na doménega matina dopo messa granda, i partigiani i ga tirà for de casa tose e spose de scarsa moraità e i le ga portà in piassa davanti al Comune, in meso a tanta jente, tajàndoghe i caviji e tosàndole come piègore. Tra queste ghe jera anca le do maestre “pevarine” che noantri tusi ghe ghemo batù ’e man e, tolta sù na corsa, semo scapà casa, senténdose in colpa come ghìssimo fato na marachèa.
I gera tenpi magri par tuti, voltàndoghe ’e spale a la guera se sperava solo che rivasse... i ’Mericani.
Cossì el pensava quea matina Severino, tornando da ’a canpagna, sentà insima a la careta tirà da a pulierina grisa macetà de bianco. Ma có ’l xe rivà casa ghe gera tri tedeschi che lo spetava e, saltando insima la so careta col fusìe puntà ’dosso i ghe ga dito: “Snell, snell, senò caput” e i lo ga portà verso el confin.
Quando dopo tri dì, la jente pensava al pèso, tuto avilìo Severino xe tornà casa, contando che i tri tedeschi i lo ghea senpre tegnù ’n mèso luri, usàndolo come protession, fin quando, rivà al Pian de ’e Fugasse, i lo ga fato saltar zo da ’a careta, faséndolo scapar verso casa, pien de paura co’ du sbari che lo ghea risigà.
E par capir cossa jera quei tenpi, basta lèsare la poesia che meto qua soto:
L’ARDITO… PARTIGIAN
El jera poco pi de on tosato, sto partigian,
forte de i so vint’ani che rento ghe bojéa;
spavaldo, sensa paura,
’ndaséa pa ’e contrà ris-ciando
de scontrarse co fassisti e podestà.
Co ’l so s-ciopeto soto el pastran
sognava za de scrìvare ’a storia,
e sventolar in alto el tricolore
che desse lustro e gloria al so valore.
Savesto che insima ’n monteselo
’na patulia de tedeschi jera lì postà,
ardito, co ’l so s-ciopeto in man:
“Fermi tuti, alto là!”
Al rabunbiar de i sbari zo pa ’a vale
ga streto i denti a i crepi de ’e case
smorsàndose pianelo so rìgoli de i prà.
Al se ga rabaltà indrioschena
so fiuri siapi e l’erba seca ingrovejà.
’Na sbrancà de foje lo ga caressà
rodolàndoselo ’torno ’l so destin;
foje zale, ’l peto rosso, i brassi slargà,
somejava ’n oseleto
’pena dopo ’na s-ciopetà.
In te ’e sere chiete al tenpo d’istà
có la goba de ’a luna xe bela ciara
’na bianca colonba zola
a sercar on respirar de pace
che l’omo no ga ’ncor catà.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
La sfida de Papa Francesco
Con Papa Francesco tornemo indrìo de dumile ani. Quelo che predicava Cristo,
sostegnù con forza, a metà strada (tra XII e XIII secolo), dal “poverello d’Assisi”,
xe de grande atualità: “povertà, semplicità, servizio e rispetto della creazione
per far risplendere la stella della speranza”.
de Mario Klein
|
