|
Da Vicenza
La me sità in cartoina
 | | Ponte degli Angeli (cartolina a colori degli anni Venti; collez. Antonio Rossato). |
Furegando qua e là inte de le vece scàtoe par fare on fià “repulisti”, a go catà on smejaro de cartoine co ilustrassion da tuta Italia: da Vicensa ma anca da l’Altopiano de i Sete Comuni, dal canpejo in Trentin, da Sotomarina, da Jesolo...
E quala emossion lèsarghe i saludi scriti par traverso co la biro o la stilogràfica: “Qua tuto ben... ve pensemo... a prestissimo... gninte fonghi ma, par fortuna, el bosco del Pierino xe pien de asarèle... fra on polejoto e ’n antro, da soto l’onbrelon, te mandemo on saludon...” Cartoine mandà tanto tenpo fà, da i fiòi, da me sorele, da n’amiga ’fessionà, da na cenacolina che me vole on ben can... Me fióla urta: “Buta via tuto, ’ssa ghin feto, mama? Te te inpieni de carte fin soto el leto...”
La ga rason, lo sò, ma me pianze el core. E po’, i me tati? I scominsia vardarle co oci inmagà, passàrsele da Dario a Michele, da Michele a la Doriana: “Nonna, sono bellissime, ce le regali?” Me fióla li varda co oci de fogo e mi, capindo l’antifona: “A no posso miga, savìo, regalàrvele, le xe de i ricordi massa inportanti par mi ma... le tegno qua, tute insieme, ligà co sto spagheto rosso e le meto in fondo al casseto in cusina. Có vegnì da mi, podì tórvele e vardarle fin che volì!”
“D’altra parte – a ghe fasso a la Silvia – no se sa mai, pol darse che on doman qualchedun inbastissa n’antra bèa Mostra in Basìlica e i scriva: Vecchie cartoline – collezione Ines Scarparolo; cussì, tati, a ciaparè anca i schèi de i bilieti d’entrata. Bon?” I me varda miga tanto convinti e mi ghe spiego che, propio ’te la nostra Basìlica Paladiana rimessa a novo, dopo de “Raffaello verso Picasso”, el 6 de marso i ga verto na beìssima esposission tuta co vece cartoine de Vicensa: “Vicenza, pensieri e sogni. Una città in cartolina”. La restarà verta pa' on meseto, o zo de lì, e ghe xe rancurà ben 700 cartoine stòriche de ’a sità, sernìe par ben fra le 1.800 de la colession Rossato.
El nostro Sindaco, Achille Variati, el la ga presentà a Palasso Trissino insieme al curatore de la Mostra Mauro Passarin; no podéa mancare Walter Stefani, in rapresentansa del Comitato Sientìfico, e ’l coessionìsta Antonio Rossato.
Chi che xe ’ndà védarla ga possudo amirare (e tuto sensa pagare on franco!) le lòje e la terassa superiore de la Basìlica rimessa a novo; ùnica spesa i 3 euri (2 euri i ridoti) pa’ ’ndar védar, te la sala granda dessora, sta esposission dedicà tuta a la sità e a la so jente.
Ste vece cartoine difati le mostra cantoni del paesajo visentin imortalà in maniera dal bon originàe, spassi ben conossudi e altri che no se savéa gnanca che i fusse tanto caraterìstici e che i xe stà ricatà quasi par caso. Se va dal Risorgimento a i ani dopo la seconda Guera Mondiàe: piasse e loghi che, co ’l passar de i ani, xe tanto canbià e pa’ i quài xe belo fare on confronto fra ieri e oncò.
Visitar “Vicensa in cartoina”, xe ’lora come fare on viajo par descovèrzar i tanti aspeti (architetònici, artìstici, culturài, econòmici) de na sità che, propio par la so belessa, la xe deventà “Patrimonio” par l’umanità.
L’esposission xe stà organizà dal Comune de Vicensa in colaborassion co ’l grupo AIM; sponsor tènico SEGNOBIT.
I me bocia, che de ste robe massa speciaìstiche serto no i se savària, i me gavéa intanto fato ’n deghejo, sparpanando ’torno par la sala tute le cartoine e zugando co quele, gnanca le fusse stà on masso de carte da brìscola.
Contenti lori... me la godo ’nca mi.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Fameja: problemi novi
No passarà tanto tenpo che anca qua in Italia vegnarà fato quelo che xe ’pena sucesso in Francia, dove xe stà aprovà la lege che legaliza i matrimoni tra persone del stesso sesso: dona con dona e omo con omo. E in nome de i diriti civili de l’individuo, dovaremo ciamare ste union: “novo tipo de fameja”
de Mario Klein
Da Rovigo
La casa de Mòmolo
de Gianni Sparapan
Da Vicenza
La me sità in cartoina
de Ines Scarparolo
|
