Da Thiene

El Circolo “S. Gaetano”
Un vanto pa ’l Patronato de i Giusepini de Thiene che da ben 100 ani lo òspita

La copertina del nùmaro unico stanpà nel 90° de fondassion.

Festa granda sto mese al Patronato de i Padri Giusepini in ricorensa de i 144 ani de vita de l’Assion Catòlica, el Circolo “S. Gaetano”, uno de i primi in Italia, fondà el 29 giugno 1869 e ancora presente co un bel grugo de zòvani e putèi (l’A.C.R. Ragazzi).
Te ’l nùmaro ùnico stanpà in ocasion del 90° da na “intervista” fata a Sante Amatori, ex presidente (1927-1934) tra l’altro el conta le peregrinassion de “sede” dove i soci se catava, prima de ’vere un posto stàbile... “E quando nel 1913 (il Circolo) passò nei nuovi locali del Patronato dei Giuseppini, ivi piantò le sue tende e più non le traslocò”, come xe scrito te na “cronistoria” de l’Associassion de A.C. del Patronato “S. Gaetano” che ga vinto el 1° premio assoluto a la Gara Diocesana categoria Associassion Ansiane, presentà a Padova nel setenbre del 1936.
I primi ani, i xe stà ani de “angoscia”.
Nel 1917 i gera più de sinquanta i zòvani del Circolo San Gaetano inpegnà sul fronte italian de’a prima guera mondiale su l’Altopian de Asiago, sul Grapa, sul Pasubio, sul Carso. La morte no ga risparmià la so giovinessa.
Ne i ani dopo guera se ga masenà a la granda sul canpo de ’a formassion cristiana e sociale. Bisognava pareciare un laicato responsabile e ativo che no ’l fusse in tuto e par tuto apiatìo su le diretive e el spirito del regime al potere.
Ani difìssili seguìi da la tragedia de la seconda guera mondiale. E fin che i Seniores gera inpegnà al fronte o ne la lota par la liberassion, la vita de l’Asssociassion gera in te le man de i Juniores. I punti cardine restava condensà ne la sigla PAS: Preghiera, Azione, Sacrificio.
Ani Sinquanta-Sessanta: i xe i ani de ’a ripresa e de i grandi nùmari fin a l’epoca de ’a contestassion del ’68.
I grupi sente un poco streti i orisonti de l’Associassion e i se buta in esperiense spontanee e inovative co “spinte” ardite sul piano de l’inpegno ne ’a solidarietà e nel sociale.
I xe i ani de i Grupi Giovanili.
I riva parfin a dare inissio a un progeto, in parte atuà, de na “Casa Famiglia” a favore de alcuni giovani restà sensa nessun punto de riferimento, parché l’Istituto Nordera, che li ospitava, “aveva chiuso i battenti”.

Copertina del volumeto CENTO GIOVANI ANNI, ilustrà da Vico Calabró.

I nomi, un poco “esotici”, de quei grupi podeva conpetere con quei de i complessi musicali del momento: Clan, Gen Forum, Clanetto, Mini Gen, Oxy Gen...
Ghe gera, però, el ris-cio de finire ne la polverisassion, e alora, ne i ani ’80, se ritorna ne “l’alveo” de l’Assion Catòlica co le nove sigle A.C.R. e A.C.G. Se privilegia alora esperiense forti de formassion e soratuto de spiritualità: Spello e Taizè xe le sorgenti “a cui attingere nuova linfa”.
Chissà se i “Acierrini” e i “Giovanissimi” de ancò, animatori conpresi, sa de èssare eredi de na storia cossì inpegnativa e contrastà.
Forse no ocore. La so batalia xe ne l’ancò, drento le generassion del “consumismo” fàssile e de l’incertessa in tuto.
No i ga divise e gnanca i distintivi de na volta da métarse a “l’occhiello” de la giacheta.
In tuto “uguali” a i so coetanei.
El so “cammino” formativo xe in presa direta co la vita, e par questo i lo ciama “esperenziale”.
I xe un poco come ’l lievito che se confonde co la pasta secondo le parole del Vangelo.
I ama stare in grupo, confrontarse, lèsare ’l presente, cantare, dedicare del tenpo al silensio, a la riflession, a la Parola de Dio, al “cammino” de la Cesa, animare i centri estivi, “entrare in sinergia” co i grupi de le altre opere giusepine.
Riafiora, cossì, el senso forte de parole che le pare “stantie” e invesse le xe carghe de vita: Preghiera, Azione, Sacrificio.
Prové a rilèsarle con el core.

Da: CENTO GIOVANI ANNI, stanpà in ocasion del centenario del Patronato S. Gaetano de i Padri Giusepini de Thiene, 1913-2013. Testi de P. Fidenzio Nalin

[torna sopra]