Da la Bassa Veronese

Na mama del ’900

29 aprile 1950. La fameja Guerra al sposalizio de Livia.

Ghè stà da poco la “Festa de la Mama” e parlare de na mama, anca se staolta no l’è mia la mia, me fa senpre tanto piaser; me pare de catare le me raise parché anca questa l’è vissùa al me paese.
Sta mama la se ciamava Aurelia Carli; la s’à sposà con Giulio Guerra nel 1922, quando la gavéa apena 18 ani, e lu el ghe n’avéa 30; on matrimonio tipico de na olta, intrezà con tanto amor e fede cristiana: i ga avù 10 fiói, propio on bel s-ciapo de buteleti, 9 viventi.
Quando i s’à maridà i è ’ndè a stare de casa in fameja vecia, quela del vecio Michelangelo Guerra, par inténdarse, con i suoceri e du fradèi za sposè, e perciò con altre do nuore e relativi fiói. Ne fratenpo s’à sposà altri du fradèi, e cussì le spose in casa jera zinque. In sta fameja granda nasséa du o tri fiói a l’ano: i è rivà a èssar quasi 30 persone ne la stessa casa. L’Aurelia e Giulio i s’à stufà de sta situazion, e nel ’30, quando i gavéa za tri fiói, i s’à deciso de proar a fàrghela par conto soo.

Pietro Guerra (cl. 1943), più volte canpion del mondo, categorìa diletanti, ne i 100 km cronometro a squadre.

Come n’à contà so fiola Irma (classe 1932), so papà Giulio el faséa el murador e so mama la se dava da fare par jutare el marì: la faséa i vestiti par so fiói, la tegnéa in corte galine, ochi, ànare, coneji, e dopo anca el mas-cio, par el sostentamento de la fameja. In più la laorava in orto che ’l ghe dava verdura e fruti. La dumìnica matina sta brava dona la ’ndava a messa prima, a le 6, fin che i fiói pìcoli i dorméa. Cussì, dopo, la gavéa el tenpo par inasiare da magnare. A la festa no mancava mai el bigoloto. Sta mama l’era contenta de védar la so fameja tuta unita. Tuti sentè a tola i ridéa anca par le robe pìcole. A mama Aurelia no ghe pesava i sacrifici che ghe tocava fare; ela la savéa de èssare el perno de la fameja e l’era pronta a organizarse in tuto e par tuto parché so fiói i cressesse sani e ne la fede cristiana: però par primi sti du genitori i dava el bon esenpio.
Aurelia la ghe insegnava a so fiói a réndarse utili, a jutare ne i laori de casa e a badare a i fradelini piassè pìcoli; po’ la ghe insegnava, spece a le done, a laorare a uce, a cusire e a stirare. A chei tenpi el fero da stiro l’era na piastra che se scaldava sul fogo, opure ghera quelo che drento se ghe metéa le brase de carbon, e bisognava stare atenti, senò se ris-ciava de sporcare la biancarìa.
Cussì i fiói i inparava ’sa vol dir pazienza e sacrificio… quasi come quei del dì de ancó!!!
Eco sta bela mama che à savù trasmétare a i fiói le mode e le usanze de chel tenpo, poareto de schei, ma pien de valori.

12 setenbre 2010. I fradèi Guerra tuti insieme.

Ano dopo ano Aurelia l’è rivà a ’verghe l’ultimo fiólo, el dècimo.
Nel 1950 la ga avù la gioia de védar sposà la prima fiola (Livia), el 29 aprile. L’era contenta assé, ma la felicità l’è durà poco. Sta santa mama l’è morta el 5 giugno, poco pi de on mese dopo le nozze de so fiola. La gavéa solo 46 ani.
Comunque l’Aurelia l’à continuà a far la veja a so fiói anca dal celo, parché grazie a Dio, i è cressùi tuti ben, i s’à formà la so fameja sana; in più, uno l’è stà un canpion de ciclismo e el penultimo l’è deventà prete stimatino.

[torna sopra]