|
Editoriale
Che fadiga nare d’acordo!
Genitori che barufa co i fiòi, fradèi che se cagna da la matina a la sera, marìi che no soporta le mojere, morosi che se lassa prima de conóssarse, politici che oncò se promete amore e pace e doman i xe za in barufa: la xe tuta na guera!
 | | Butare el lamo e spetare… spetare… co pazienza… |
Tacando da indove parte la raza umana par rivare a i giorni nostri, a ghemo na caterva de scontri feroci storici che ne fa dire che, da che mondo xe mondo, no ghe xe mai stà acordo so sta tera.
Ga tacà Adamo che ’l s’à messo corni in crose co la so Eva, quando che ’l ga savesto dal Padreterno che la lo ghea bindolà co la scusa del pomo e del serpente.
Po’ xe vegnù Caino che no’l xe stà bon de métarse d’acordo so l’eredità co’ so fradelo Abele e el lo ga fato fora. E el bìblico Giusepe, vendùo par quatro palanche da i fradèi invidiosi; el stesso Re David el fa copare Uria, par portarghe via la belìssima Betsabea. E che dire de quel Tu quoque, Brute, fili mi! (Anche tu, Bruto, figlio mio!) pronuncià da Giulio Cesare, quando, in punto de morte, el ga visto che tra i congiurati che lo gavéa cortelà, ghe jera anca so fiolo Marco Giunio Bruto...
Fermémose a sti pochi casi de disacordo violento che òcupa pagine scolpìe tel libro de piera de la storia de la raza umana.
Da sta costatazion, nasse la domanda: “Come se fa a nare d’acordo co i altri, senza barufare tuti i santi giorni?…” Nare d’acordo co la mojere, co i fiòi, co i suòceri, co i conpagni de scola o de lavoro, co i paroni de botega, co i siori, co i poareti, co i “diversi”, co i governanti, con chi te taja la strada e no te dà la precedenza có te rivi a na rotatoria, con chi te parla male parché par sbalio te ghe ghè pestà on calo… La xe propio dura!
La xe dura, ma bisognà a tuti i costi rajonàrgane sora par scoprire come se pole vegnerse incontro, catare na via de mezo, parché nessun omo e nessuna dona xe on’isola. Se se vole vìvare e non solo esìstare, dovemo acetare de no stare senpre de sora d’i altri come l’ojo te l’aqua.
Oltre a i cativi esenpi de “scontro permanente”, gavemo anca quei boni che fa al caso nostro: basta saverli védare.
El scritore e sagista francese Eugène Marcel Proust el ga dito: “Il vero viaggio di scoperta non consiste nel cercare nuovi paesaggi, ma nell’avere nuovi occhi.” Proust no ’l parla de on viajo geografico, no se trata de fare nove scoperte geografiche: el viajo xe quelo de la vita, da fare a oci verti e curiosi, in modo che se pol vardare le stesse robe, ma védarle diverse da prima.
Se rifletemo so questo, voléndolo, le xe tante le robe che pole canbiare. In pràtica, no serve canbiare i altri, ma canbiare el modo de vardare i altri, de raportarse co i altri.
Ga da èssare come tufarse in un mondo novo, con persone, gesti, parole, colori, significati difarenti. Certo, farlo no xe come dirlo, ghe vole tenpo, forse ani, ma questo trasforma la nostra esistenza che no la sarà pi in “conflitto permanente” con tuto e con tuti, parché la gavarà inparà a con-vìvare e a nare d’acordo co i altri.
Fasendo on esenpio pratico, ciapemo, in generale, la fameja de oncò: la xe malà parché l’omo e la dona no i intende rinunciare a gnente de le so abitùdini, de i punti de vista, libertà de pensiero e de azion, dimostrando de no avere capìo gnente né de l’amore né de la vita. Se i du i decide de vardarse con oci novi e de vegnerse incontro, i ga catà par senpre el segreto par nare d’acordo: i ga catà la pazienza, el mèjo rimedio par ogni problema!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Che fadiga nare d’acordo!
Genitori che barufa co i fiòi, fradèi che se cagna da la matina a la sera, marìi che no soporta le mojere, morosi che se lassa prima de conóssarse, politici che oncò se promete amore e pace e doman i xe za in barufa: la xe tuta na guera!
de Mario Klein
Sagessa…
Il tempo prezioso delle persone mature
de Luigi Frosi
Da Thiene
El Circolo “S. Gaetano”
Un vanto pa ’l Patronato de i Giusepini de Thiene che da ben 100 ani lo òspita
de Bepin Daecarbonare
Da Verona
Filastroche de la nostra infansia
Quando no’ ghéra i videogames e no ghéra i zugàtoli tenològici de i nostri giorni, trionfava zughi e filastroche che infiamava la nostra infansia, parché èrimo poareti de schei ma siori de fantasia. Eco qua un pochi de ricordi.
de Wanda Girardi Castellani
|
