|
Editoriale
Pecà che la Tv no sia pi coela
Quanti sogni, quante speranze la ga fato nàssare la “nostra” Television. Quanto materna, maestra e formativa che la xe stà, ciapando in man na socetà vegnù fora da poco da la guera. ’Desso, però, no la xe pi coela…
 | | Fulvia Colombo, la prima anunciatrice e condutrice televisiva italiana. |
Sessant’ani fà, el 3 genaro del 1954, la Rai-Radiotelevisione Italiana la scumissiava a mandare in onda le prime trasmission televisive. In chei ani pochi podéa permétarse de portare in casa chel casseloto luminoso, a valvole, col trasformatore par tera, che ’l ne spalancava na finestra so on mondo in bianco e nero mai visto prima. Na vera scoperta, na conquista de la tecnologia.
Par mezo secolo la Tv la ga dominà la vita sociale italiana, la xe deventà inportante e necessaria quanto el pan che se magna. Vardare la television voléa dire vardare on mondo novo, inparare tante robe nove, oltre che divertirse, straviarse, desmentegare pa ’l momento dolori, problemi, e tante rogne, che quele no le manca mai.
La ne ga ’jutà a formare e dare on’imàgine pi dignitosa e rapresentativa de quelo che jèrimo; la ne ga ga svejà fora dal coma provocà da la guera, la ne ga insegnà a caminare co le nostre ganbe e a rèndarse conto che da soli no se va da nessuna parte, parché semo on popolo, parché ghemo da èssare on “noi” formà da tutu i “io” par afrontare el bene comune, quelo de la ricostruzion, del svilupo, del progresso.
Nessun storico pole ricostruire la storia de i ultimi 60 ani del nostro Paese senza l’aiuto de la television, de tuto quelo che la ga fato nàssare e imaginare ne le nostre teste, a partire da “Lascia o raddoppia?” al Festival de Sanremo, da “Non è mai troppo tardi” a “Portobello”… par no parlare de “Carosello”.
Quando Fulvia Colombo, dal Centro de Produzion de Corso Sempione, a Milano, la ga anuncià: “La Rai, Radio- televisione italiana, inizia oggi il suo regolare servizio di trasmissioni televisive”, la Television la ga catà na popolazion par metà oncora analfabeta, quindi la se xe rivolta a on pùblico desideroso de savere, bisognoso de inparare, de conóssare. Quando che la se xe incorta che i bar no i jera pi incalcà de zente parché le fameje, firmando tante “tajadele”, le ghea liberà on canton de la cusina par métarghe l’aparechio televisivo, la Television la xe nà pi ’vanti: a dir el vèro, la xe senpre stà pi ’vanti de chi la vardava.
Solo che, ’vanti oncò e ’vanti doman… se ga l’inpression che la sia nà massa ’vanti! Da quando la politica se xe inpadronìa de la Television, la Rai-Radiotelevisione italiana no la xe pi maestra par tuti. Volgarità, parolaze de tuti i tipi, adiritura biasteme, sène de violenza, cronaca de fati de sangue che sarìa mèjo no savere, barufe, scontri, insulti, beghe politiche, scandali: tuti segni negativi del canbiamento del Paese, che la Tv ne propina… da la sera a la matina. Continuare a mostrare tuto questo, vol dire èssare deventà “cattiva maestra”, vol dire rinunciare al ruolo formativo e educativo, e no èssare pi “servizio pubblico”.
Par carità! No la fa védare solo questo, e esiste el telecomando, ma no la xe so mama: dal momento che “l’abbonamento Rai si deve”, anca “mamma-Rai” la ga da fare na riflession se no la vole cascare senpre pi in basso e ridurse a èssare vardà solo da anziani e da persone de cultura medio-bassa.
La ricorenza de i 60 ani de vita ga da servirghe a la Rai a rimétarse in càtedra, tirar fora la bacheta e scrìvare, a la lavagna, la lista de le robe bone e de quele cative.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Pecà che la Tv no sia pi coela
Quanti sogni, quante speranze la ga fato nàssare la “nostra” Television. Quanto materna, maestra e formativa che la xe stà, ciapando in man na socetà vegnù fora da poco da la guera. ’Desso, però, no la xe pi coela…
de Mario Klein
Atualità
“Il tempo è denaro”
de Luigi Frosi
Da Verona
Un amor grando
de Giacinta Dall’Ora
|
