| de Franca Isolan Ramazzotto |
|
Da Legnago (VR)
El sgolmarin
Da ’na ventina, forse anca ’na trentina de ani in coà, del sgolmarin ghe n’è a balù, basta tirare in coà e in là le balote de i oci se ghe ne vede dapartuto: so i giardini pùblici, so le piste ciclabili, so i orti, so le stradele de i prà e de i monti e del mare. ’Na olta invezze, parlo del me tempo dopo la goera finìa del 1945, mi jèro oncora picinìna e, el sgolmarin l’èra raro. Me ricordo che so le case de campagna, almanco indo’ staséa mi, là a Presina, frazion de Albaredo d’Adige, coasi tute le fameje gavéa ’na pianta de sgolmarin tacà al muro de casa. La supestizion diséa che ’1 sgolmarin l’èra ’na pianta portaben; la ’sorbéa i mali che voléa fare coalche striozza.
Anca a casa mia gavéa ’na pianta co ’1 tronco grosso tuto intorcolà; paréa che ’1 volesse tegnerse streto par stare ben in piè oncora par tanti ani, e po’ ’1 gavéa ’na chioma sempre ben messa che ’1 paruchiere del tempo el gavéa sistemà che gnanca el vento o che fosse vegnù zo saravale no i riusséa despetenare. I me cari i se lo tegnéa come i gavesse ’vù l’oràcolo: goài maltratarlo!, pitosto... ’na s-ciafa a mi se ghe tirava ’ìa male coalche fojeta. Cissà coanti ani ’1 gavéa e... cissà ci l’avéa piantà postà ’1 muro rente la porta de casa, cossi comodo e sempre pronto coando ’1 servéa.
Coanti ricordi me porto drènto ’1 me core de chela piantona de sgolmarin... So le matine de l’istà el se ’dobava la chioma con tute perline de rosà che slusiava al sole, coanto l’èra belo védarlo, e mi, ogni olta che naséa fora, ghe daséa ’na ocià, on soriso, ’na carezza so le fojete che le par tute tajuzzà, anzi, a vardarle ben, le par tute lancete tacà fisse, e, in cambio, so la man le me lassava on profumo... che ’1 tanto che coando naséa scola in coìnta ’lementare, la me compagna de banco la me domandava se gavéa messosù el ’rosto... anca coelo... raro a chei tempi. E... me ricordo che so ’1 libro de letura indo’ ghèra la pagina del presepio, ghèra disegnà anca on bel àlbaro de Nadale, ma in alora, so le case no ghèra gnancora l’usanza de farlo, anca parché i preti de alora i ne inculcava che l’àlbaro no l’èra catòlico ma pagano, forse par coelo che la gente no la lo faséa... Mi, védarlo disegnà in chela pagina, ghe moréa inzima... Sicome che la fantasia no la me mancava, go tolto chele tré caramele, chele dó caròbole e che la diesina de bagigi che m’avéa portà Santa Luzia... e po’, go tolto ’na ucia da cusire e con santa passienza go fato on buseto a tuto, go impirà ’na s-cianta de filo e go tacà tuto co ’n gropeto a le ramete del sgolmarin. Pian, no l’è mia finìa! Go tajuzzà de le cartine dorà de la gianduia e coela argentà de i formagini e spampanà sora le ramete, e po’ sempre co la fòrbese, go tajà de le strissiete e fato de le ciapolete e tacà in coà e in là, zontàndoghe anca coalche ciufeto de coton e... eco el me àlbaro de Nadale inventà da mi: on capolaóro mèjo de coel del disegno. Che belo e che figura el faséa davanti la me casa. Tuta la gente de la contrà vegnéa védarlo da gran che l’èra belo, i se passava parola... ciò, l’èra ’na novità par tuti e mi me godéa par la sodisfazion, e el sgolmarin paréa parfin che ’1 se stimesse anca lu! I buteleti i vegnéa ogni tanto a védarlo, i se metéa el déo in boca con tanto de baia (bava), se vede che ghe paréa de ’vèrghe za in boca che1 poco de bendedìo. Fatostà che l’àlbaro de Nadale l’è durà par du giorni, parché ’na matina, in parte la pianta, go catà le tré carte de caramele, le miòle de le caròbole e le sgusse de i bagigi.
Me domando adesso, fin che scrivo ’sti ricordi: “Che la sia stà colpa del prete dato che ’1 diséa che l’àlbaro de Nadale l’èra de religion pagana e i genitori i gabia dito a i buteleti de vegnèr desfarlo o la tanta ’oja de i buteleti a magnare la me roba?” Mi credo l’ultima, e cossì, i me furizzi che m’avéa portà Santa Luzia jè nà contenti a farse benedire in boca a ci ghe n’avéa manco de mi!
Me nona Rosi, che l’èra coela che gavéa el minestro in man (che comandava) e mi co i me genitori stasìino in casa insieme, vedéa che la ’doparava el sgolmarin dapartuto: so le patate lesse tajà a tochetini cunzà co l’ojo e sale o fate a purè, so la pastasuta, so la fritaja co i gàmbari, so i minestron, so ’1 bigoloto salà senza zzùcaro, so ’l ’rosto coando ’1 ghèra... insoma... dapartuto, anca drento i calti parché no tachesse le terme e la biancarìa no la saésse da cassin e tacà a i tacapani de l’armaron parché i àbiti no i saesse da umidità e l’udor da suòre.
A vien che ’na olta m’è vegnù l’influenza co la tosse; de chele sbossegade a fogo e me nona la m’à dito: “Caro el me coresin, senti che tosse che te ghè, stanote te seghitarè a girar galon!, a te fao subito el piropo cossita te dormi!” La ga tolto on goto de vin crinto, on bel cuciaro de miele e ’na rameta de sgolmarin e fato bojire par diese menuti e coando l’è deventà fredo, la l’à messo in te ’na butilieta scura da medezzine; ’na ’olta no se butava ’ìa gnente, e la me n’à dà on cuciarin. “Mmmm, che bon!” me son dita da par mi. “Te lo meto in te la cardenza e te ghe ne béi tri cuciarini al dì dopo magnà, seto?” “Tri cuciarini solo?”, el me piaséa cossì tanto che ogni tanto me tacava a la butilieta e gnanca du giorni a l’ò finìo. El siropo de sgolmarin, visto che ’l funzionava par la tosse, me lo fào oncora ’desso, però... no me taco pi a la butilieta... sto al dito de i tri cuciarini, senò... adìo linea!
Par far la pastasuta ghe vole: penete o dialòti, on spigo de ajo tajà fin, on rameto de sgolmarin tajà fin, sale, pepe, ojo de oliva o buro, e a la fine ’na bela informajada e... bon apetito!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Pecà che la Tv no sia pi coela
Quanti sogni, quante speranze la ga fato nàssare la “nostra” Television. Quanto materna, maestra e formativa che la xe stà, ciapando in man na socetà vegnù fora da poco da la guera. ’Desso, però, no la xe pi coela…
de Mario Klein
Atualità
“Il tempo è denaro”
de Luigi Frosi
Da Verona
Un amor grando
de Giacinta Dall’Ora
|
