|
Atualità
“Il tempo è denaro”
 | | … e vedo sora la tola i fiori che ’l toso gheva portà a so mare par la so festa. |
Seneca diseva che el tenpo ne la vita el xe senpre poco e che bisogna vìvarlo tuto sensa sprecarlo. In poche parole xe quelo che dise anca i nostri proverbi: “Il tempo è denaro” opure “Chi ha tempo non aspetti tempo”, sinò anca “El tenpo passà e no ’l torna pi indrìo” par dire che bisogna èssare senpre ativi e no’ far vignere sera sensa ’vere conbinà gnente. Ve conto alora cossa che me xe capità tenpo fà, parché có te ghe na serta età a ghi ne sucede de tuti i colori, e anca de pèso.
Na matina, a decido de lavare la màchina; fin che vago zo par tirarla fora dal garage a vedo, sora al mobileto in entrata, che ghe xe la posta. La ciapo in man, la verso e lasso le ciave de la machina sora la console par butare la busta voda nel sacheto de la carta de recupero. Me incorso che ’l sacheto el xe pien e decido alora de portare la carta nel cassoneto de la racolta diferensiata, in strada. Visto che vago fora a penso de fare na corsa anca in banca a pagare la boleta de l’aqua che scade el dì dopo. Ciapo in man el libreto de i assegni e me incorso che ’l xe finìo; vago alora in càmara par tòre st’altro nel casseto de i calseti, sora a al comò, a vedo che ghe xe na latina de aranciata che ghevo tacà bévare prima e che la ghevo lassà là. La sposto par tòre el libreto de i assegni e me incorzo che l’aranciata xe calda, alora torno in cusina par métarla in frigo e vedo sora la tola i fiori che ’l toso gheva portà a so mare par la so festa. Me vien alora in mente che la me gheva dimandà de métarli in fresca: poso la latina de aranciata su la tola pa’ ’ndare a tòre un vaso, torno in studio e sora la scrivanìa vedo i ociaeti par lèsare che sercavo prima e co la coa de l’ocio vedo, soto a de le carte, el telecomando che ghevo sercà tuta la sera prima. Decido cussì de portare el telecomando in sala, al so posto, poso i ociài sul divano e no cato gnente par métare i fiori, torno in cusina, ciapo alora na pignatela alta, la inpinisso de aqua e penso de métare i fiori là dentro. Sorapensiero torno in càmara col pignatelo pien de aqua, inpiro el masso de fiori nel pignato e spando na s-cianta de aqua, coro subito in cusina par tore na strassa e sugare el malan, poso el telecomando che me jero tignù in man su la tola e no me ricordo più parcossa che lo ghevo tolto sù. Ciapo la strassa par sugare l’aqua e me incorso che la xe massa onta, la porto in bagno par métarla nel contenitore de la biancheria da lavare, verso el mobileto par sercare na strassa pi neta e me incorso che el pomelo de la portesina el xe molo. Torno alora in studio par tòre, nel casseto dove tegno i atressi del pronto intervento, un cassavide, ma nel pi belo casca fora la strissa de i feltrini da métare soto i pié de le careghe; me vien in mente che in studio dovarìa canbiarli soto na carega, vago alora in studio, poso sora la libreria la strissa de i feltrini parché un libro no ’l xe al so posto…
Conclusion: xe passà pi de do ore e no go lavà la machina, el sacheto de la carta el xe ancora là, no so’ stà in banca a pagare la boleta, la latina de l’aranciata la xe ancora sora al comò che la speta de èssare messa in frigo, i fiori xe ancora provisori dentro al pignatelo, el libreto de i assegni el xe senpre nel casseto del comò, no cato più dove che go lassà el telecomando e i ociài da lèsare, ghe xe na pissinara de aqua in càmara, el pomelo de la portesina in bagno speta ancora de èssare invidà, i feltrini da tacare soto le ganbe de la carega in studio e più no go idea dove che xe le ciave de la machina!
Me fermo alora a pensare: xe rivà mesodì e no go conbinà gnente in tuta la matina, epure no so’ mai stà fermo, no go vudo un minuto de respiro, a so’ stufo morto e…
Questa la xe na malatìa che ciapa chi vol córare massa ne la so vita, chi vol fare massa robe in te na volta sola par guadagnare tenpo, ma, có te rivi a na serta età te pol sucédare questo e anca de pèso. I dise che sta malatìa la se ciama “S.C.M.D.E.”, “Sindrome de Confusion Mentale Dovuda a l’Età”.
Feme un piassere, conteghe sto fato a tuti parché, mi a no me ricordo pi a chi ghe lo go za contà, e no ridì, parché, se no ve xe gnancora capità, stè pur serti che prima o dopo la ve pol capitare, proprio quando manco ve la spetè, e ricordeve che, l’unica roba che no se pol riciclare el xe proprio el tenpo!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Pecà che la Tv no sia pi coela
Quanti sogni, quante speranze la ga fato nàssare la “nostra” Television. Quanto materna, maestra e formativa che la xe stà, ciapando in man na socetà vegnù fora da poco da la guera. ’Desso, però, no la xe pi coela…
de Mario Klein
Atualità
“Il tempo è denaro”
de Luigi Frosi
Da Verona
Un amor grando
de Giacinta Dall’Ora
|
