Padova che canbia e che resta

La “drogheria”

La Drogheria Preti in Pra de la Vale.

El sior Daniele Bettella, titolare de la storica drogheria padovana.

Na serie de cassetini co tuti i colori del mondo in pólvare.

’Na volta, i casoini, prima de èssare ciamài botega de generi alimentari, salumerìe… e ’desso Supermercati o Megamercati, i se ciamava tuti “drogherie” o mèjo “boteghe de spezie”.
Passejando par el centro, in ocasion de le Feste de Nadale, me son acorto che, soto i pòrteghi, in angolo co la stradela che porta drento al Gheto, la famosa “Drogheria Raccanello”, in piassa de le Erbe, la xe stà trasformà in te uno de chei negossi de i telefonini. Incuriosìo, a so’ passà a védare in via Oberdan se la stessa fine la ghesse fata la “Drogheria dal Zio”, dove da tosato, quando ghe passavo davanti, me fermavo a cronpare la ligurissia o i bastonsini de dulcamara. Sì, la ghe xe ancora, là nel “Canton de le busìe”, in angolo col Volto de la Corda, ma la xe deventà “ex Dal Zio” col nome de “Ai due catini d’oro”. No’ contento, co’ l’ocasion de ’ndare a védare el presepio al Santo, so ’ndà a ciapare el tran in Prà de la Vale par védare se anca la “Drogheria Preti” ghesse fato ’na fine conpagna de quela de Racanelo. Có so’ stà davanti, a me so’ fermà fora da i porteghi; el tabelon de la publicità, sfondo rosso antico, el diseva: “1936” e soto “Drogheria Preti di Zuin Luigi”. Go tirà un bel sospiro e me son dito: “Questa resiste ancora.” A sto punto no’ so’ stà bon de no’ ’ndare drentro e me so’ trovà davanti el paron de ’desso: Daniele Bettella. Dal 1999 el gestisse la Drogheria co amore e dedission, tanto da èssare stà nominà “Padovano Eccellente” par come el tira ’vanti la botega, nominà “drogheria storica padovana”, adiritura riconossùa soto el vincolo de le Belle Arti.
Me xe vegnudo in mente quando che studiavo al “Marconi”: quante volte me fermavo par ’ndare drento a cronpare le ”Pasticche Leone” su ’na scatoleta de lata, o le siete de anice e menta a eti! Me se ga verto el core védare tuti chei scafaeti ben alineài, i vari stipeti che ricorda la vecia farmacia in origine nominà de “Santa Giustina”, passà da st’altra parte de la strada có i ga verto la via Luca Belludi. La gheva cronpà co tuto l’aredo, nel 1936 Giuseppe Preti, paron de l’oleificio Zivieri, che ’l faseva oji e saoni par véndare i so artìcoi che ’l produseva su ’na fabricheta a Altichiero. Ste notissie le go vude da Daniele, che no ’l finiva altro de farme védare i cartèi esposti che mostrava i veci prodoti in vendita ancora prima che vignesse fora “Carosello”: Kranebet, China Cola, Cioccolato Suchard, Biscotti Osvego, Caramelle Doufur, Pastiglie Leone, Sapone di Marsiglia e tante altre robe, introvabili in qualsiasi altra botega. Vardando in giro me ga colpìo, in bela mostra, na serie de cassetini de legno, dove se cata tuti i colori del mondo in pólvare, e se se serve come un tenpo, co’ ’na sessoleta de aciaio. De òbligo la se inscartossa su la carta zala da becari o su quela celeste aviassion, che se doparava par el sùcaro. Qua te cati veramente tuti i colori del mondo: la tera de Siena, el cadmio, el cinabro, l’ocra, el blu oltremare, el rosa magenta, el cobalto, el verde smeraldo… Tuti colori che i artisti pitori ’ndava a torse par le so òpare. Penseve che i vendeva parfin la tinta “onbra de canpanile”, che ’na volta i inbianchini mandava a torse da i principianti aprendisti:
“Tonin, te vè in Prà de la Vale, in drogheria, te domandi de Ménego e te te fè dare dó quintài de pólvare ‘onbra de canpanile’ che ghemo da dare el colore al cesso. Ah, ricòrdate de tor sù un fiasco e te te la fè métare drento!”
Cussì, el poro tosato, oltre che el viajo fin in Prà de la Vale in bicicleta el doveva pagare dó litri de grinton come batiso al lavoro. Opure i lo mandava senpre là a cronpare ’na lata de “onto de gumio”, se el tosato jera un posa-piano o un scansa-fadighe.
El Daniele el jera orgolioso de farme védare tuti i prodoti in mostra: i ciuceti “teracatù”, granèi de ligurissia, el citrato e el tamarindo de Carlo Erba, e el ghe ga tignù a farme notare che chei prodoti ghe ’i forniva el nostro indimenticabile Gianni Maritan, sostenitore e amico de “Quatro Ciàcoe”. Un profumo indefinìo inpregnava tuto l’anbiente, pareva de èssare in te un santuario. “Xe propio sto profumo che me fa èssare in linea co i tenpi!” me dise Daniele. “Se pol trovare tuti i prodoti par la pulissia, par la cura de la casa e de la persona, da la pomice al talco, la pajeta de aciaio, le spugne naturali, tratamenti par el legno e i marmi, le cere, le resine, la gomalaca, i saoni, i colori, i inpregnanti, la parafina, el petrolio e par finire el famoso carburo de calcio par la cacia de le tonpinare e de le talpe. Saludàndome, Daniele el me ga dito che el resiste parché no’ vègna perse le tradission che dà valore da senpre a la nostra “Vecia e splendida Padova”.
Pensare che ’pena scuminsià a sercare calcossa sul web su le “Droghe”, me salta fora ’na finestrela che voleva savere i me dati personali! A me so’ sùito spaventà, a go pensà che i me ghesse ciapà par un spaciatore o un venditore de morte, opure i me ghesse scanbià par un drogato in crisi de astinensa, che sercava qualche dose par farse chela sera.

[torna sopra]