Da Maran Lagunare (UD)

Nasrudin e la mujer

Man ocupàe
Nasrudin el xe drio partì par un viaso de afari. So mujer, Fatima, la ga tanto insistìo parché el se portissi drio le armi in caso de bisogno. E cussì, ciolta la pistola in man e la siàbola in quel’altra, Nasrudin el xe partìo de casa con le man ucupàe. Par la strada un ladro lo ferma portàndoghe via duto. Tornò a casa e contò a so mujer quel che ghe gera capitò, ela la ghe fa:
«Ma, Nasrudin, el gera armò?»
«Orpo, mujer, fin a i dinti!»
«E ti, ti no te ga fato gnente par difèndete?»
«E come podevo, se vevo le man dute dò ucupàe.»

Custodì le virtù de la mujer
Mulà Nasrudin el se troveva in viaso insieme el so amico Hussein. Camina, camina e rivò scuro, i se ferma e Nasrudin el ghe disi a Hussein:
«La to conpagnìa la xe stada un piasser. Stassera go intension de passà la note soto le stele, ma ti va pur, no xe bisogno che te staghi con mi. Romài la to cità no la xe tanto untan de qua.»
«Co’ te disi Nasrudin? Volarà ’ncora mèsa zornada pa’ rivà. E po’, preferisso fate conpagnìa, pitosto de ’ndà casa a pìe, con el scuro.»
«Te xe sicuro de esse sicuro?» ghe fa Nasrudin. «Te ga nominò qualche­dun pa’ protege le virtù de to mujer intanto che te manchi de casa?»
«Sì, Mulà. Ghe go domandò el me bon amico Hamza, el me vissin de casa. Ghe go dito a elo de tignì conto le virtù de me mujer nel mentre che son via.»
«Ma… posso domandate» ghe fa Nasrudin. «E te ga nominò un che ’l vardà le virtù del to amico vissin de casa?»

In tribunal con la gniova mujer
Dopo un ano che ghe gera morta la mujer, Nasrudin el ga maridò ’na vedova.
Distirài in leto, la prima note, ’pena stuada la luce la dona la ghe disi a Nasrudin:
«Te sa che el me primo marìo el gera ’na persona esenplare.»
Secò de sintila parlà del so primo marìo invissi de… Nasrudin el ghe rispundi:
«Beh, se xe par quel, la me prima mujer la gera bela, prosperosa e tanto gentile.»
«Ah!» rispundi subito ela: «El me primo marìo el gera un casseton dolse, favoloso.»
«Me mujer ’na cuoca bravissima» ribati Nasrudin.
«El me primo marìo el gera un brilante matematico.»
«La me prima mujer la gera na organisatrice magistral.»
«El me primo marìo el gera un omo straordinariamente forte.»
Dopo mèsa ora che i se bateva con elogi de i marìo e mujer decadùi, Na­srudin el se gera inervosìo e, brun­tada la mujer fora del leto e, cascando, ela la se gera fata mal a ’na man. Infuriada e volendo giustissima, la ga portò Nasrudin davanti el giudice del giogo, e la ghe ga spiegò duto quel che gera capitò.
Sintìa la versiòn de la dona el giudice el se rivolsi a Nasrudin:
«Ok, ’desso sintimo la to version de come che xe ’ndàe le robe.»
«Vostro onor» scuminsia a dì Nasrudin, «vemo un leto che ’l se adata a sol dò persone. Ma la note passada, co vemo zontò la me prima mujer e el primo marìo de ela, de tanto strinti e par vè giogo, la me gniova mujer la xe stada sbruntada, e cussì la se ga fato mal.»

Notissia dada con delicatessa
«Nasrudin» ciama el sindaco. «’Nte l’incidente in piassa de stamatina xe morto el marìo de la Shahrzad Rahman. Vidi de ’ndà fin casa sua a visala, ma serca de daghe la nutissia pian, con dilicatessa, che ela la xe ’na dona pitosto fràzile.»
’Ndò a casa sua e bussò a la porta:
«Signorina, la vedova Shahrazad la vivi qua?» domanda Nasrudin a la dona ’pena vignùa fora.
«Sì, me ciamo Shahrzad e vivo qua» la ghe rispundi, «ma no son vedova.»
«Beh» fa Nasrudin, «la xe la xe, son pronto scomete sento dòlari, che la xe!»

[torna sopra]