|
Da Rovigo
La Providenza
 | | A me vedo vegnere zo dal zielo carte da diese, vinti e zinquanta euri, che mi in te on gesumarìa a le go brincà. |
“Mi no ghe credo in te la Providenza, e manco ancora in te la fortuna – a ghe digo na olta a Menegòto de Gavelo, che ’l sta ’rente casa mia, longo el Scolon. − E par tante robe che no sto chì a cuntarte, anca parchè, cuntando le to robe, gnissun te pol jutarte, e comunque indrìo no se torna più.”
“Ma sì che la esiste – a me fa Menegòto – e guai se no la ghe fusse!”
“Comunque, se la ghe xe, co mi la fa finta de no esìstare – a ghe fago. − Vòto ca te cunta l’ùltima? E alora a te sa da saére che ogni tanto, quando che la me gira, a invento sù qualcossa par no passare inutilmente el me tenpo e anca par tegnerme el zervèo in andamento. E dóncana, on mese fà, a mucio na vinténa de persone in casa mia par farghe on spetàcolo e co mi a vien Walter co la fisarmònica e Sandro co la piva.
E dopo, par finire in beleza, a li tegno a zena co tante robe bone e de casa che a gheva za preparà: tajadeline in brodo de capon, codeghini e purè, salami rosti e poènta, brazadèa e vin a volontà.
Prima de andare via, a dividemo le spese e sta zente la me dà el so contributo par vegnerne incontro so ’l costo del magnare. E mi a ciapo sti schei e li meto so la tola. Ma prima de andare in leto, a la me amiga Ana a ghe vien vuoja de spareciare e cussì la ciapa la toaja e po’ la porta fora a scorlarla che sta toaja, anca par el vento forte ca supiava, la se lìbara de ogni roba, schei conprisi, ch’i jera tuti de carta.
Vien matina e mi a zerco i schei, e zerco e zerco, ma i schei a no li cato da gnissuna banda. E alora, domandando a ela, a vegno a savere del fato che la sira prima la ghea scorlà la toaja, ca no xe mina la prima olta ca me sparisse orolojo, uciài, fotocopie, pene biro, gome, insuma tuto quelo che mi sbadatamente a meto so la toaja e che la Ana sbadatamente la scorla al vento.
E questa, la ciàmito Providenza?” – a ghe fago a Menegòto.
“A te darìa rason, s’a podesse, ma mi a la penso a l’incontrario. Parchè mi go propio fato caso che quando ca me cato in dificoltà, a me riva senpre la man divina a jutarme.
A te cunto l’ùltima. A te lo sa che mi a so on poareto insangôanà. A vivo co na pension da fame, ma cussì da fame che più de na olta a no so’ bon de cavarme la fame. A go la mujere in tòchi, piena de artrosi che la fa fadiga a lievarse dal leto; on fiolo disocupà, ma col so vizio del fumare che l’è senpre lì a domandarme schei par le sigarete. E po’ a ghè da pagare luce, aqua e gas e tuto quelo ca ghe va drìo ca go solo tre camarete in tuto; e vèndarle no se poe, e sinò, s’a le vendo, ignonde xe ca vago a stare? E po’ a go l’Equitalia che la me tormenta par via de na multa de diese ani fà che me fiolo no ’l ga mai pagà. A se trata de pagare la beleza de quatrozento euri entro diese giornate, e sinò i vien a pignorarme la casa, prima ca la possa vèndare.
Insuma, l’altra sira a no saeva dove sbàtare la testa e so’ ’ndà fuora de ca’ a pensare a cossa fare e par via del vento a me go messo a remòcia de la cantina a vardare in su se qualche santo el podeva jutarme. Par farla curta, vòto ca te diga? A sirà che lì a ghe jera bonaza, propio lì el vento el ga fato come na giraòlta par calmarse on fià, e intanto a me vedo vegnere zo dal zielo carte da diese, vinti e zinquanta euri, che mi in te on gesumarìa a le go brincà, rengraziando el Signore par la Providenza che ’l me ghea mandà e ancora lo ringrazio.”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Cara dona, te scrivo…
Te scrivo parché te sapi quelo che penso de ti. A te lo digo prima che te riva la mimosa de l’8 de marzo: no sta’ rifiutarla, ma zerca de farghe savere a l’omo che te vòi de pi, parché te vali tanto de pi!
de Mario Sileno Klein
Da Verona
Complicà come ’na Pasqua!
de Wanda Girardi Castellani e Mirco Castellani
|
