Da la Bassa Padovana

Dal “zingo” a i “tupinaròi”

Le vegne le jera tegnù sù da pali de legno in piè e de traverso, unìe col “zingo” da on cao a l’altro…

La tràpola par le tupinare.

Solo l’ultimo tupinarolo el ga risolto i so problemi.

El fil de fero el xe oncora insostituibile in canpagna. Gavìo mai sentìo dire: “El xe giustà col zingo”? Opure: “El se tien sù le braghe col zingo”? Forsi in cità nò, ma in canpagna non ghe sarìa stà svilupo tecnologico senza l’invenzion del “zingo”.
Se ghe ciama “zingo” al filo de fero, forsi parché i primi “spaghi” de metalo i xe stà rivestìi de zinco; fato sta che el “zingo” el xe na materia prima insostituibile in canpagna: par giustare, zontare, ligare. De “zingo” a jera ligà le bale de paja, có le vegnéa fora da la pressa, se giustava i finimenti del cavalo, le fogare de teracota, in te le sgiàvare a se ghe metéa a volte i cordoni de “zingo”, se zontàva cadene, corde, pali de legno col “zingo”; le vegne le jera tegnù sù da pali de legno in piè e de traverso, unìe col “zingo” da on cao a l’altro e tirà col trainelo. Adesso i vigneti moderni, fati par rancurare la ua a màchina, i xe sostegnù da pali de fero laorà al laser e da fili de aciajo inossidabile, ma che vien ciamà oncora “zinghi”.
On problema grosso in canpagna le xe senpre stà le tupinare, che le fa de le mote de tera in tel canpo apena somenà. Na volta i faséa fadiga ciaparle, ma con l’arivo del “zingo” a xe stà inventà le tràpole. Le tràpole par le tupinare le jera fate de legno e de “zingo bon” (acciaio), e de “zingheto”.
E cussì, ne la “Bassa” a xe nato i “tupinaròi”, i caciatori de tupinare. La jera gente che se rangiava a sbarcare el lunario, sti òmani i naséa a pescare de scondon, i ciapava lièori con le tràpole e i savéa le abitudini de le bestie selvàdeghe de pi del can da cacia.
Par métare zo le tràpole par le tupinare i studiava i passagi e le galerìe, i tastava co on bacheto de legno se la galerìa la jera utilizà par nare e vegnere, e dopo, co on sculiero de legno, i tirava via la tera par tuta la lungheza de la tràpola e fin a filo de la galerìa. I se sporcava le man de tera, par confóndare i odori a la tupinara, e i metéa zo la tràpola càrica e pronta a scatare, so sto posto, coerzéndola con la tera, lassàndoghe fora la susta. La tràpola par le tupinare la gavéa na susta, o mola, inpiantà so on tocheto de legno, e so coesta a ghe vegnéa tacà do “zingheti” fati a anelo come on lazzo, giusti par far passare la tupinara che, però, non vedéndoghe, la sbatéa el museto contro on tochetin de legno che, cavàndose da la trapola, el faséa partire la susta che tirava sù de colpo i zingheti, picando la tupinara. A se vedéa se la tràpola la jera scatà coando la susta la jera verso l’alto, fora de la tera.
Alora el tupinarolo el ciapava sta pora bestiola, el ghe cavava la pèle, el la destirava so na tola, con coatro ciodi, al sole par secarla. Le pèle de le tupinare le vegnéa vendù, anca nel dopoguera e fin a i ani ’50, par fare pelice, o el colo del paletò o borsete, cossì el tupinarolo el se ciapava da vìvare, anca parché el paron del canpo el lo pagava in base a le tupinare ciapà.
Mi a go conossù l’ultimo tupinarolo, uno da Merlara, drio la Frata, che, fin a pochi ani fà, el se dedicava a ciapare le tupinare ne i giardini e ne i canpi da calcio e come referenza el contava a tuti che el jera riussìo adiritura a ciapare le tupinare del giardin del primario de l’ospedale! Primario che come tuti coéi che ga sto problema el gavéa provà de tuto: da i ultrasuoni, a le botilie roersà e inpirà nel giardin, al velen e a le erbe antitupinara, ma senza risultati. Solo l’ultimo tupinarolo el ga risolto i so problemi. E cussì el se vantava de èssere stà pi bravo del primario de l’ospedale, almanco a ciapare le tupinare!

[torna sopra]