Usanse nostrane

Spriss

Me vojo cavar na sodisfassion, scrivendo ’a storia de sto aperitivo come ’a vedo mi. El spriss el vien inventà a Venessia ne l’Otosento quando ’a cità ’a gera ocupada da i Austriaci. I soldài presenti in cità no i gera abituài a bévar el vin nostro che el gaveva na alta gradassion alcòica, e cussì i domandava a i osti de slongar el vin co un poca de aqua, disendo in tedesco “spritzen”, che voeva dir sprussar. Aqua e vin insieme i evitava che i soldài i se inbriagasse e i cascasse ne i canài.
Ne i primi ani del ’900, vien inventài ’e botilie co l’aqua de “seltz”, cioè aqua frizante, e da sto momento el spriss el comincia ’a so evoeussion legada a i vari teritori del Veneto e a l’estro del barista.
Mi bevevo a Venessia qualche sprisseto fin da toseto, quando no el gera tanto conossùo fora de ’a cità, e queo che se beveva eora su ’e finestre verte che dava su ’e cae, su i canpi e su ’e fondamenta el xe restà par mi ’a bevanda più bona e, in qualche maniera, quea uficiàe.
Girando par l’Italia e par el mondo, ’desso che el spriss el se trova senpre de più in tanti posti, go bevùo missioti de ogni genere che del spriss no ’i ze gnanca parenti lontani.
Intanto, ’a riceta a ze soeo questa: un terso de bon proseco, quasi altretanto de bitter Campari, na sprussada de “seltz”, dó o tre cubeti de giasso, na fetina de limon e na oliva verde. L’aperitivo el va senpre servìo conpagnà co patatine frite e “noccioline” tostàe.
A Vienna, ma no soeo, el vien ciamà aperitivo venessian. Nel Vicentin e a Trieste qualche locàe lo serve come ne l’Otosento: aqua, vin e anca co na fetina de limon. Da qualche ano, anca a Roma se trova quasi in ogni locàe el spriss che però i tentarìa de darte co l’Aperol e co na fetina de naransa. Vivendo ormai da tanti ani longhi periodi ne ’a Capitàe, go esportà ’a me idea de ’a riceta del spriss anca eà. Cussì no serve più che ogni volta che diga come che ’o vojo.
A l’estero, fortemente apogià da ’a me dolse metà che ’a condivide ’a riceta de i ani Setanta, prima de ordinarlo, disemo: “Spriss co proseco, Campari, na fetina de limon e dó cubeti de giasso”, cussì no coremo el ris-cio de ’assar eà tuto parché inbevìbie, come na volta a La Valletta, a Malta, dove davanti a un bar ghe gera un cartèo co scrito: “spriss veneto”, ma el xe stà fato soto i nostri oci co Coca Cola, vin nero, gin e aqua de rubineto.
Anca a Venessia no i ’o fa bon dapartuto come fin qualche tenpo fà, ma tegnemo ancora bòta.
Casa nostra gavemo ’a botilia che fa el “seltz”, cussì che quando che vien a trovarne amighi che vien da fora ghe fasemo sagiar el vèro spriss venessian, co patatine e nosèe conprese e riussimo ancora a meravejarli, contàndoghe ’a storia de sto aperitivo tuto venessian.
Semo tanto sicuri de ’a bontà de sto aperitivo fato da nialtri che podemo anca invitar, quando che semo tuti e dó casa, i amighi de Quatro Ciàcoe, che passarà a trovarne.

[torna sopra]