|
Da Verona
Grassie!
 | | ...sul pato, davanti a la me porta, cato un ficus beniamina piassè grando de mi... |
Mi e la me amiga semo drio nar dal fiorista a cronpar na pianta par far un regal. Ghè un caldo béco e sul ponte Piera ghe manca un trato che la me volta ’ia. Za la porta la pression basseta e in più no la tase gnan par morte morir. La m’à contà de so fiol, de so mama, de so sorele, fin a rivar, ’desso, a la so specialità, cioè dir sù del so omo.
“Varda” ghe digo mi, “che se no te la mochi, te molo qua e vao a casa. No son bona de capir parché te ghe l’è senpre con to marì che invesse el stravede par ti e la to fameja. Se penso che el ga da nar d’acordo con vintisinque ànime, tute con el so cargo de difeti, e se le te someja a ti...” La se ferma de boto, la àrbina un poco de fià e la me sopia:
“Son derenà dal caldo e da le to parole. Vègneme drio. Nemo ne sta gelaterìa a sorarne.”
Ne sentemo zo davanti a dó cope de gelato ‘artigianale’ da sinquemila calorìe a l’una. Ela, finalmente, la tase! Ne brochemo le nostre quatro balete a testa, ingiotendo da angorde. Co ’l gotior ben rinfrescà, me sòssolo a l’arieta fresca spuà dal condissionator. Sèro parfin i oci. Son invià a rivar in cel... Ma la so ’osse la sassina tuto.
“No te sarè mia drio indormensarte, era?” la taca ela, che, forsi, la vol scaldarse de novo el canalusso. “Par tegnerte desmessià te ne conto una de bele” la seita, oramai lancià.
“Donca, vint’ani fà, propio de lujo, me soreleta, che la podaréa èssar me fiola e invesse l’è el fruto de la menopausa de me mama, la s’à diplomà in lingue. I à messo fora i voti come ancó, come doman ela l’è partìa par el mar e come dopo doman è vegnùo fora un concorso in banca, solo che bisognàa far domanda in du e du quatro, parché el scadéa sùbito. Me marì l’à portà a casa el bando e el m’à comandà a ‘mi’ de darme da far par arbinar i documenti che servéa (alora no ghera gnancora la lege su la ‘privacy’) e par rintraciar la butela che l’avéa dito solo che la saréa nà al mar con le so amighe e la saréa vegnùa de ’olta quando l’avéa finìo i schei. Mi son deventà mata a sercarla (alora no ghera gnancora i telefonini); ela no ghera perìcolo che la telefonesse e alora, dopo na riunion con tuta la fameja, son stà autorisà ‘mi’ a presentar la domanda e delegà ‘mi’ a far la firma falsa de la butela che de sicuro l’era stravacà al sol del mar e no la gavéa gnan par i sète sentimenti de farse sentir e ancora manco de catarse da laorar. Solo che par mi l’era grosseta falsificar na firma e perciò son stà indecisa fin a n’ora prima che scadesse el bando, consegnando le carte solo dopo che el me confessor el m’à assicurà che sto falso no l’era na mancansa grave ‘perché compiuta a fin di bene’.”
“E la butela quando ela rivà?” ghe domando mi, oramai desmessià del tuto.
“Nel mentre che ‘mi’ s’era in coa par presentar la domanda, ela l’à telefonà da la gabina de la stassion de nar a torla parché l’avéa magnà fora anca i schei del tassi” la me risponde ela e la seita: “El l’à portà a casa me marì e, sicome el l’à vista lustra, abronsà e anca un fiantin esaltà par la prima vacanza sensa mama e sorele, no ’l ga avùo el corajo de parlarghe del tramacio del concorso e l’è stà morta lì.”
“Ma no ghe l’à dito gnissuni che ‘ti’ te t’avéi dato da far par ela?” ghe stao soto mi, curiosa de saver ’ndo la va a parar con sta storia.
“No, cara, gnissun s’avéa aldegà a informarla... Fato sta che la butela, dopo aver risposto a anunci e telefonade, l’avéa scominsià a far la ‘bebi-siter’ ma, dopo che el picenin de tri ani che la gavéa da tèndarghe el l’avéa serà fora in terassa na matina intiera, l’era nà a far la comessa ne na gelaterìa. La laoràa da dopo disnar fin a le dó de note e la vegnéa a casa in motorin, ma me mama no la ghe ne podéa più.”
“Te credo” salto fora mi. “Cissà che pensier, pora dona, averghe na fiola in giro par Verona a quele ore lì.”
“Maché, me mama l’era preocupà parché la neo-diplomata el dì dopo la dorméa fin a ora de nar a laorar de novo e no la faséa altro gnente” la me dà sù ela e la séita: “Ma Quel-de-Sora l’à vardà in zo. Ga telefonà quei de la banca,’ndo ‘mi’ avéa presentà la domanda, parché la nesse a far el colochio. Ben, par fàrtela curta, el giorno dopo i ga scrito che, se a ela ghe comodava, i l’avaréa assunta co ’l primo de setenbre.”
“Ma ala mia domandà ci era stà a preparar e a spedir le carte?” insisto mi.
“Sì, bela. La ga domandà a me marì, ma gnanca dopo che la l’à savùo, la s’à degnà de ringrassiarme” la me risponde ela, che la se insusta come vint’ani fà.
“L’è propio vera che no ghè più riconossensa” ghe digo mi par consolarla.
“’Speta, no l’è mia finìa qua” la me interonpe ela e la va avanti: ”Donca, riva el 31 de agosto e ‘mi’ ghe fao i auguri par el dì dopo e ela... gnente. A la matina del primo de setenbre ghe fao i auguri de novo ma ela... gnente. A disnar vao a casa e sul pato, davanti a la me porta, cato un ficus beniamina piassè grando de mi, con un bilietin che m’à fato piànsar e rabiar. Pensa che sta pianta ghe l’ò ancora, dopo vint’ani: de inverno in sala al caldo e de istà in vacansa su pontesel. Ghe tegno dato el concime, ghe fao qualche doceta, ghe caresso le foje, ghe parlo. Ghe voi ben come a na creatura.”
“Ma dime del bilietin. Ci te l’à mandà, ’sa ghera scrito?” farfojo mi, confusa e curiosa.
“Donca” la me risponde ela giràndoghe ’torno come el so sòlito, “ò vardà sta smaraveja de pianta; da granda che l’era ò ciamà el portier che el me le strapeghesse dentro, go dato la mancia, m’ò cavà le scarpe, me son messa le savate e ò léto ancora el bilieto e par la seconda ’olta ò pianto, rabià.”
“Alora, me ’l dito sì o nò?” ghe sigo mi, tuta sudà dal nervoso.
“Bela, chiètete; ò pianto parché ghera scrito ‘Grazie per il mio primo giorno di lavoro’ e me son rabià parché al posto de la firma ghera scrito ‘Fìrmetelo ti, falsaria’!”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Ghe vole pi corajo e speranza
Sicome le xe massa le robe che no va, bisogna farse corajo e vardare avanti, volere a tuti i costi che la se canbia, che no ’i sia senpre tenporài e tenpesta: chissà che ’l celo se stufa de “cicloni” e “anticicloni” e possa rivare finalmente el seren!
de Mario Sileno Klein
Robe de Ciósa
I primi stabilimenti balneari a Sotomarina
a cura de Angelo Padoan
|
