Da Maran Lagunare (UD)

I cunsili de Nasrudin

Sensa schei

Un zorno Nasrudin, tro­vàn­dose sensa schei el va al mercò in serca de lavor. Rivo là el vidi tre fachini che i xe drio parlà con un sior. El va vissin, el sinti el sior che ’l disi:
«Go na cassa piena de piati e de scuele, chi che me la porta a casa, come paga ghe dago tre buni cunsili.»
Nissun se fa ’vanti, Nasrudin el pensa: «Roba come i schei se pol vadagnali ’ncora, ma i buni cunsili i xe più difìssili de trovà. Forsi xe ben sintili, chissa che no inparo qualcossa de gniovo!» E cussì el aceta elo la proposta.
Strada fasendo Nasrudin el ghe propuni al paron:
«Parché no ’l me dà ’desso un de i tre buni cunsili?»
El sior l’aconsinti e el ghe dà el primo:
«No sta’ crèdeghe a nessun, co ’l disi che xe mèjo patì la fame che vé la pansa piena!»
«Xe veramente un bon consilio!» se disi el Mula. E i continua caminà. Fato naltro tòco de strada, Nasrudin el ghe domanda al paron che ’l ghe diga el secondo bon cunsilio. Elo el cunsinti e:
«No sta’ crèdeghe a nessun, co ’l disi che xe mèjo caminà a pìe pitosto che ’ndà a caval!»
«Orpo, anca questo no ’l xe mal!» pensa Nasrudin, e i continua a fa strada. Prima de rivà Nasrudin el vol sintì anca el terso cunsilio.
«No sta’ crèdeghe a nessun, soraduto co i te disi che no esisti fachini più stupidi de ti!» ghe parla con modo ironico el paron, ma el Mula no lo veva gnanca lassò finì che molada la corda, el fa cascà la cassa par tera.
«E ti no sta’ crèdeghe co i te disi che le scuele e i piati drento la cassa i xe restài intieri!» ghe fa osservà Nasrudin, scanpando de corsa.

Mastio o fèmina

Nasrudin el gera a corte de Tamerlan el Conquistaor, co riva la nutissia che so mujer la ga vesto un fio.
«Co' la ga partorìo to mujer sta volta?» domanda el Domina­dor del Mondo a Na­srudin.
«Diversamente de Elo, so maestà, un omo umile no ’l pol che esse deventò pare de un mastio o de na fèmina» rispundi el Mula.
«E co' te pinsi che un inperador come mi el possa generà?» domanda el Tamerlan, con un soriso.
«Tirani, opressuri, ditaturi, despoti… no xe limite de insielta» rispundi Nasrudin.

[torna sopra]