Da la Bassa Padovana

La vaca “fantasma”

Sta “giovenca” la xe nà a sistemarse te on traverso de polenta…

I carabinieri, parché non ghe fusse pericolo pùblico, i ga fato vegnere on elicotero da Bolzano…

In cità tuto fa notizia, ma in canpagna a pol sucédare el finimondo e nessun gh’in parla, gnanca so i giornài, parché nessun da noantri li conpra, cossì che el scritore Ferdinando Camon, nato coà a San Salvaro de Urbana, rancurando robe che tuti a se xe desmentegà el ga scrito i romanzi che i lo ga fato deventare giustamente famoso.
Anca sta storia vera la xe stà desmentegà coasi da tuti e cussì a ve la conto: ani idrìo, de istà, da na stala de on comerciante de bestie, a Montagnana, a xe scapà na “giovenca”, na vaca zóvane che vegnéa da la Francia, indo’ che la vivéa libera al pascolo. La ga saltà na recinzion alta on metro e setanta e la xe nà in giro par i canpi, come che la jera abituà, saltando fossi e scondéndose in mezo a la polenta alta.
La ga caminà par coalche chilometro e la se xe sistemà in mezo a on traverso de polenta de me suocero. Se vede che la se catava ben, magnando pagnoche fresche e nando a bévare in tel fosso de cao al canpo.
Intanto el comerciante el ga denuncià la “fuga” de sta “giovenca” francese, ma par setimane non se savéa dove che la fusse nà a finire, e par coesto i contadini i se portava drio la forca, coando che i naséa in canpagna a “tegoline”, par paura de èssare atacà da sta vaca salvàdega.
Coando che i ga catà de le “boazze” in cavezagna, de cao del traverso de polenta, me suocero e so fradelo i ga scomizià a tèndarghe, ma la polenta la jera cossì fissa e alta, e la vaca furba, che nessun la ga mai vista e, naturalmente, non i se contava de nare dentro a zercarla.
I carabinieri, parché non ghe fusse pericolo pùblico, i ga fato vegnere on elicotero da Bolzano, co on fuciliere. I xe rivà a le dó del dopodisnà de Agosto, col sole a pico parché la polenta non la fesse onbra, i ga xolà bassi, trimo par trimo, de traverso, e pi in alto par non mòvare la polenta col vento de le eliche de l’elicotero, ma la vaca non la se ga fato catare. I ga sparà anca on colpo de s-ciopo, ma par gnente. Intanto tuti coéi de la zona, che a chel’ora de istà i jera in leto a ponsarse, i xe vegnù a védare l’elicotero de i carabinieri e par védare se sta vaca la vegnéa fora dal traverso de polenta.
Dopo tri coarti d’ora l’elicotero el xe nà via, lassando la vaca al so posto, tra tute le ciàcole de la gente de la zona, ciàcole che le xe continuà a la sera in ostarìa al Borgo, indove che i caciatori i ga deciso de pensarghe lori a ciapare la vaca.
I pensava de ciaparla de note, magari dopo coalche goto de vin de ostarìa, circondando el traverso de polenta con le machine co i ciari inpizà, molando dentro i cani da cacia, spetando la vaca co i s-ciopi pronti a fare fogo a “baletoni”.
Intanto de i altri bontenponi de l’ostarìa i ga pensà de tòre in giro sti caciatori, inpinando de paja na pèle de vaca, inpiràndoghe on paro de corni e tacàndola a na corda par tirarla sù so la piopa pi alta, tacà al traverso de polenta indove ca jera sconta sta vaca, deventà ormai “fantasma”.
Non sò se i gabia mai messo in pratica ste idee, jutà dal vin, ma sta vaca fantasma la ga continuà a vìvare par pi de on mese in te chel posto, anca coando con ’na mietitrebia i xe nà in mezo a la polenta par smarazzarla e farla scapare. Dopo na note passà in te naltro posto, la xe tornà oncora lì.
El paron de la stala, da dove che la xe scapà, el ga dito che chi che riesse a ciaparla el se la tien. A ghe ga pensà coatro caciatori de Urbana a risòlvare el problema: “Cipirino”, “Puci Caifa” e altri du; i xe nà a le coatro de matina a spetarla in tel fosso indove che la naséa a bévare e, sconti in mezo a la polenta del canpo vizin, i la ga copà a “baletoni”, sparténdosela tra de lori.
A me suocero a ghe xe stà pagà la polenta che la vaca fantasma la ghea magnà, ma ghe xe restà on despiasere par non ’verla mai vista, come la fusse stà on straniero che el ga vivesto in te la so tera par pi de on mese, senza farse conóssare.

[torna sopra]