Da San Giorgio in Bosco (PD)

Veci mati in orto

Cossa fàeo chel mato là! Fresare ’a tera ’desso…

Curi de verda drento nu i ze conpati e tènari come i nostri, ma duri e tuti suìvi fà fiuri de bròcoeo.

Ma intanto "aspetta e spera che la salata s'avvicina!"

Altrodì, inte 'l me sòito giro dietetico in bicicreta pa ’e strade del paese, càpito rente ’a casa de Bruno C. e ’o vedo co ’a freseta drio laorare so l'orto:
<<Cossa fàeo chel mato là! Fresare ’a tera ’desso, in genaro, moja marzha e creosa! Se so na jornada de soe gnen sù vento, ’e zhopete se indurisse come jara! Coà ’e teste d’i veci no sta pi a posto! (semo de classe)>> Me fermo, el me vede, el stua ’a màchina:
<<Jera on tòco che no te vedéa passare!>>
<<E so’ passà oncò pa védarte ciaparte ’vanti cu i lauri de l'orto! (no ghe go dito coéo che pensavo prima parché a paròe no me inpazho mai d’i fati de chealtri).>>
<<’O sò che te pinsi che mi sia deventà mato tocare ’a tera de sta stajon, ma ’desso ghe buto sora foje seche, bruscaura trincià e lozha parché no ’a se inpetrissa e dopo ’a passo da novo.>>
<<Ma come mai tuta sta pressa?>>
<<No stàmine parlare che ze on tòco che, cò magno verdura, anca cota, so’ senpre narvoso. St'ano passà go doesto operarme ’a spàea e te sparagno i particoeari parché no so’ come zherti veci baucoti che, cu' i ga on problema fisico, i te fa tuta ’a cronaca minuto par minuto de ’a so rogna, voéa sòeo dirte che dopo, come che sa tuti, me ga tocà fare ’a riabiitazhion co ’a pissina e pa on tòco no fare lauri. Ma in lulio romai stazéa ben, no sentìa pi fastidio so l'operazhion e ’lora go pensà de tacar fare coalche pocio inte l'orto. No 'o ghesse fato! La fémena e ’e tose ga tacà fare el demonio: − Vàrdeo là! No te si gnancora goarìo del tuto! Se te te fè mae da novo, no te vegnemo pi drio e te te rangi stavolta! Sito senzha schei che no te pui conprarte ’a verdura! Varda che l'orto el ghe ze anca al supermercato! − e ’vanti cussì. Mi go proà spiegarghe che ’a verdura del supermercato ’a ze bea da védar, ma porcarìa da magnare in confronto a 'a nostra. L'unica concession che ’e me ga fato ze stà: − E cò te vè magnare fora, te pòrtito drio ’a verdura da casa? ’Lora pa na volta te pui magnare anca coéa cronpà, almanco fin che te stè mèjo del tuto! − Pa farla curta, no digo che no ’e ghesse rajòn co sto "star mèjo del tuto", però intanto ze passà i misi justi par metar-dò ’e verde, i radici e chealtra roba invernàe e mi che me piaze ’a verdura, me toca ciuciarme par ’desso coéa cronpà che no soporto: i radici crui i ga gusto da carton, coti i deventa palteca, a 'a piastra i se seca medi prima de spassarse. I curi de verda drento nu i ze conpati e tènari come i nostri, ma duri e tuti suìvi fà fiuri de bròcoeo, i ga pi vodo che pien. Coanta urèa no ghe bùtii so sta roba da orto che magna chealtri! Ze par coésto che me go za messo in onda. Vui védare mi se presto no magno verdura bona! No ’a go mai sospirà come ’desso.>>
<<Sì, sì. Ma intanto "aspetta e spera che la salata s'avvicina!" − ghe go cantà mi, − a te ghè ncora da semenarla!>>
<<Vèro! Ma ’pena che go na gonbina pronta, no speto de sicuro santa Poeònia pa semenare soto ’l nàilo, dopo giro da i vivaisti a védare se ghin’è gnanca uno che gapia za ’e piantine de saeata o radici bonorivi in vascheta e, se ’e cato, me ’e rancuro al caldo in lavanderia.>>

[torna sopra]