Da Lugo de Vicensa

Me xe esplosa l'autostima

Uno de i raduni anuali a Paderno del Grappa de i ex-aluni e sinpatizanti de l'Istituto "La Salle" de Tripoli.

Da quando che ’l nostro Diretore ga sbatù in copertina de Quatro Ciàcoe la me “Sìngana”, me xe esplosa dentro l'autostima, na epidemìa del nostro tenpo che, se al termometro la passa i 40°, la pol far dani. E mi ghe son vissin!
El primo efeto de sta malatìa par mi xe quéo de métarme in mostra co ’l parlarve de serti me aluni un fià speciali che ’l caso me ga posà su i banchi quando ca gero Maestro a le Elementari, na scola... sparìa! Ghe gavarà messo le sate magari anca ’l Padreterno, parché serti casi i me par fora dal normale pa’ on maestro normale, adiritura... elementare!
Parto da Milan, primi ani Sessanta. I me insegnanti de le Magistrali, i "Fratelli delle Scuole Cristiane", persone che me ga regalà cultura e gusto par tute le forme de l'arte, i me ga considerà in grado de stare in càtedra a l'Istituto Gonzaga che al tenpo, co ’l "Leone XIII" de i Gesuiti, el rapresentava el riferimento scolastico par gran parte de l'alta borghesia milanese. Da lì infati xe saltà fora personagi de gran rilievo in tuti i canpi, sia a livelo locale che nassionale.
Ano 1960, IV Elementare: me trovo in classe, tra i altri, el fiolo del Diretore nassionale de la Coca Cola, quéo de la famosa pelicerìa Combi e ’l nipote de Arnaldo Fraccaroli, nativo de Villa Bartolomea, ne la Bassa Veronese, giornalista, scritore, comediografo, sinquanta ani al "Corriere della Sera", grande amico de Montanelli... Da le nostre parte gira ancora la so comedia in dialeto "Òstrega, che sbrego!" E so nipote che se ciamava Fausto? On spetàcolo de toseto, furbo, spontaneo e generoso come i milanesi DOC. Ma no basta. Sicome che i scolari ghe insegna senpre tante robe a i maestri, Fausto me ga insegnà, so le piste de l'Aprica, el truco de l'antìcipo che, có te ’o ghé digerìo, el te risolve quasi tuti i problemi del siare.
Adesso, co on salto in longo da far spavento, rivo da Milan a Tripoli. I "Fratelli", presenti in Libia dal 1913, savendo ca me la cavavo ben come organisatore sportivo, i me domanda s’a son disponibile, oltre che a far scola, anca a ciapare in man le atività sportive, dal momento che le rapresentava da senpre un momento fortissimo de agregassion par la gioventù de Tripoli e, aspeto inportante, l'Istituto gaveva spassi adati pa' ste atività.
"M'ama o... Parto o no parto?" me domando. L'incossiensa giovanile me ga ’ito "Parti!" e son partìo.
So’ ’ndà for de tema e torno a i me aluni foriserie, dopo aver sotolineà che anca chéa scola, l'Istituto "La Salle", la gera super richiesta da italiani, libici e de altre nassionalità e religion.
La me prima coà de aluni la ghin contava 38 (!) e uno de i 38 el gera... − squilo de tronba! − Hassan Waiss, nipote del re de l'Afganistan in esilio a Roma. Come xela sta storia? Anca sènplice s’a volì: el re de l'Afganistan el ga fato studiare so fiolo, el Principe ereditario, a l'Università La Sapiensa e sto principe se ga laureà in medicina. A Roma el ga sposà la nobildonna Luciana Pignatelli e da i dó xe nato Waiss. Dopo, no sò né parché né parcome, la fameja se ga trasferìo a Tripoli e ’l papà faseva el mèdico a puchi metri da la me scola.
No lo go fato aposta, par vantarme de èssare stà curà da on prìncipe, ma xe sucesso che ’l me ga jutà a risòlvere i me guai el giorno che, viajando a sento a l'ora so la corsia de sinistra del canpo da calcio, i me ga steso de bruto e go scainà tuta la note parché ’l zenocio se gonfiava come on balon, faséndome on male can.
Diagnosi: menisco in tòchi; rimedio programà quasi a l'istante: operassion pa' giustarlo ne la clinica privata del Sig. Barbera che ’l gavéa so fiolo ne la me scola e se gera in amicissia. Ma, contro tute le prevision, de petepèo petepèo, el zenocio xe nà a sgonfiarse giorno par giorno, el male ga ciapà altre strade e son tornà a zugare. Miracolo? On dotore che no savéa ’l nostro dialeto ga dichiarà: "È ipotizzabile che in un corpo giovane e sano (el mio!) la cartilaggine in non ancora compiuta formazione abbia potuto rigenerarsi e operare il restauro." Manco male! Waiss, el nipote del re in esilio, co ’l tenpo ’l me xe scapà de vista, ma tanti in Italia lo ga visto come atore so le prime serie de “Don Matteo”. El gera moro de caviji e mori e furbi gera anca i oci.
Al prossimo giro porto in canpo altri me aluni parfin straordinari, ma pa' sbassare on fià le ale e darghe na bastonà a l'autostima go da confessarve che tra i me tanti scolari ghe xe stà anca un fianchegiatore (come dirlo in dialeto?) de i "Banditi de la Uno bianca!" Che schersi la vita!

[torna sopra]