Da la Bassa Padovana

Storie d’amore, de cani e de cristiani

El vecio ponte in fero so ’l fiume Frata (1915).

El novo ponte in cemento (1991).

Cagneti de Marega che studia… come rivare de là del Frata, a San Salvaro.

So le rive del Frata, a San Salvaro de Urbana, ’ne la Bassa profonda, a ghe xe stà storie d’amore vissude a l’onbra del Monastero e che ga ’vudo come testimone principale el ponte che ghe xe da mile ani so sto fiume.
Lassemo stare coelo che xe riportà in te i libri de storia locale e che riguarda el conportamento de zerti frati, ’on poco mascalzoni, come coel fra Andrea da Este che: “Rese gravida una fanciulla del posto”, ma concentrémose so fati riportà a voce e mai scriti.
La “storia desmentegà” la ricorda che coando, in tel 1915, a xe stà fato el novo ponte de fero so ’l fiume Frata, on zentenaro de metri destacà da coelo vecio che el se catava proprio de fronte al Monastero (e che el jera soto controlo, anca economico, de i frati e, dopo, de i Conti Carminati), el spostamento de òmani e de bestie el xe stà pi fàzile e pi lìbero. Paja, fen, vin e pomi i passava da ’na parte a l’altra, anca verso la veronese Marega e verso Legnago, solo con el controlo del daziaro, ma de sera, so sto novo ponte destacà da la cesa, i òmani zóvani de Marega i ga scomizìa a “pascolare” in te ’l paese de San Salvaro. Alora i contati umani i jera pi difìzili e le tose tegnù soto controlo da le mame, ma istesso i tosi del paese i ga scomizìa a preocuparse che le tose da marìo non le nesse a finire a Marega, in te ’l Veronese, anca se el xe on paese lì tacà. Cossì, in te on grupeto, i se xe messi d’acordo par “pressidiare” el ponte de fero, de sera, armà de forche e de manare, par introdare verso casa sóa ’sti pretendenti “stranieri” e farghe passare la voja de tentare de catarse la morosa de coà del ponte.
I ponti che unisse e che divide. Division che i cani non ga mai sentìo, parché i cani de Marega i ga senpre passà el ponte par vegnere a morose a San Salvaro, có jera el so periodo. Ma coando che la Provincia de Padova la ga deciso de canbiare el ponte de fero, ormai vecio e streto, in te ’l 1991, a xe sucesso che de i cagneti de Marega i se catesse a morose da le cagnete de San Salvaro, proprio coando che, on bel giorno, a xe stà tirà via el ponte de fero par scomiziare i laori par coelo novo de cemento.
Có xe finìi i amori, sti cagneti, uno a la volta, i xe nà verso el ponte de fero, ma non i lo ga pi catà, e alora, riunìi in grupo e on poco confusi e disorientà i se xe interogà tra de lori e i ga deciso de caminare drìo l’àrzare verso Merlara, ma de ponti gnanca l’onbra; stessa roba verso Bevilacqua, drio el Molinelo. Ormai a jera sera e sti cagneti i xe tornà a San Salvaro, indove che i ga catà calcossa da magnare e i ga deciso de passare la note in te ’l boscheto de la “Bringi”. Storia ripetù anca el giorno dopo, e cossì via, fin che i paroni de sti cagneti de Marega i ga ciapà la màchina e, fasendo el giro par Bevilacqua, non i xe vegnù a tòrseli.
No savemo se dopo sta aventura a ghe xe stà on incremento demografico de cani a San Salvaro, fato sta che i paroni de i cani de Marega i ga pensà de farli sterilizare par paura che i ghe vaga oncora via da casa, traversando el ponte novo de cemento!

[torna sopra]