Da Verona

Careghe

Vao a spassesar, scuriosando, al mercatin de l’antiquariato de San Zen…

Bona parte de la me colession de ‘Piatti di Natale’ l’ò cronpà là…

El ciapa la so carega de fero (che l’è a prova de un lato B esagerato), el me dise che l’è massa streta par lu…

… el le sostituisse con la poltronsina del saloto, che l’è solo da vardar… senò la se strussia.

Come ogni prima domìnica del mese, vao a spassesar, scuriosando, al mercatin de l’antiquariato de San Zen che el se desròdola da denansi a la basìlica, drio i vìcoli par tuto el quartier. Me fermo senpre al banco ’ndo i vende le porcelane de la Royal Copenaghen. Conosso la parona da tanti ani che oramai semo buseta e boton. Bona parte de la me colession de ‘Piatti di Natale’ la me l’à procurà ela che la va avanti e indrìo da la Danimarca come nar sù e zo dal Liston.
“Ciao, bela!” Me cato davanti la me amiga che la me se taca al col… Sòliti tri basi, s-cioco, stanpo.
“Destrìghete fora che te speto al bar” la me comanda, inviàndose verso l’ùnico taolin lìbero a l’aperto.
“Che bela coincidensa! Te piàselo sto marcà?” la me domanda prima ancora che me senta zo.
“Ghè bela robeta, ma anca ghéte, ratatuja” ghe rispondo.
“Son vegnùa in serca de un restaurador” la ritaca ela. “Go mostrà la foto de un mòbile da sistemar e lu el m’à parà sù un conto che me fiol el saréa stà mèjo che l’avesse fato quel mestier lì invesse de studiar da ingegner. A proposito de mòbili veci, ghe n’ò una de bele da contarte” e la parte con n’altra de le so storie. “Donca, na copia de amici che semo tanto lighè, anca se adesso i vive a l’èstero, i telèfona che i è rientrè par na vacansa in Italia e i gavaréa piaser de passar a saludarne; de quela via i invido a sena. Ghe piase magnar ben e tanto a tuti du, ma, mentre ela l’è una che se moe e la smaltisse, lu el se le mete ’ntorno dato che el laora co ’l conpiuter e el passa el tenpo lìbero con i pié soto la tola inpegnà a brocar o destirà sul sofà par digerir. Mi, intanbusà in cusina, spignato a brusabalon; el me omo in sala el parecia da le feste.
Vao de là a controlar: ghè tuto a posto, ma… De colpo me vien in mente che l’òspite mas-cio, che l’è un buelon de prima, le ùltime ’olte che l’è stà a casa nostra l’à descancanà tre careghe de l’Otosento su le quatro che gavemo e n’è costà na cifra a farle sistemar e el restaurador el n’avéa consilià de no dopararle ma de tegnerle solo par belessa. ’Sa femo, ’sa no femo… Sona el canpanel, i è lori. Fin che i fa i 50 scalini par rivar sù, me marì el ga n’iluminassion come san Paolo su la via de Damasco.”
“Cioè?” ghe domando.
“El scanbia le quatro careghe antiche de la sala con quele de fero de la cusina.”
“Benon” salto fora mi.
“Maché, bela. I vien dentro, el me struca la man che dopo du mesi la me fa ancora mal, el me consegna un fasso de fiori che no te digo, el ghe dà n’ocià a la tola parecià, el sghima anca le careghe e po’ el seto ’sa el ga el corajo de far?”
“Cossa?” voi saver mi.
“El me domanda qual l’è el so posto, el ciapa la so carega de fero (che l’è a prova de un lato B esagerato), el me dise che l’è massa streta par lu e el le sostituisse con la poltronsina del saloto, còmoda, ma che l’è solo da vardar e anca da lontan parché senò la se strussia, e el se ghe senta sora fasendo sigar parfin la tapesserìa!”

[torna sopra]