Da Adria (RO)

Siole in terassa

Chel’ano la vacansa al mare la jera scuminsià subito a rovesso. Jèrimo dopo Bróndolo, quando la strada par Sotomarina passava giusto in meso a la sabia: sabia paresà da na banda co’ mace de erbassi qua e là, montagnole a man drita che scondeva el mare, che, dal resto, el se faseva sentire istesso co ’l so s-ciafesare de onde su la riva. In sinque su ’n brussin: mi, mi sorela, mi madre co’ in brasso mi fradelin ’pena nato e mi zio ch’a tegneva le rédene. Jèrimo ancora inte ’l tenpo che par viagiare bisognava rangiarse, parchè el treno gnancora jera in grado de fare trati regolari da un posto a nantro e coriere sostitutive gnanca pensarghe.
De punto in bianco, intanto ch’andàvino co’ la nostra camoma, parchè savìvino d’èsser squasi rivà, patatrac! Fora na roda! El cavalo, inspaurì, el ciapa na curibèla da mati, tiràndose drio el brussin inberlà che duminti el ne spargujava su la strada a uno a la volta. Par fortuna che mi zio, ch’a se ’l pol dire nato in meso a i cavài, no ’l s’à perso d’ànema e intanto che ’l ne sigava a nantri de stare boni e al cavalo parole, parolone e parolasse, l’è riussì a farlo ’ndare in meso a i motoni de sabia e lì la bestia no l’è stà più bona de strapegarse avanti, cussì se semo fermà. Desmontà tuti co’ calma, se semo tirà in banda par magior sicuressa. Intanto mi zio ’ndava a rancurare sù la roda e a sercare el perno che ’l la tegneva ingansà. Sistemà tuto par ben a semo rimontà sù e senpre, tirando avanti pian pianelo, un passo drio st’altro, semo rivà a destinassion. Cussì è prinsipià le mi ferie inte ’l 1946.
Jèrimo senpre da la Giovanela, come l’ano prima, stessa càmara, stesse scale, stessa terassa: insuma tuto conpagno identico a l’ano prima. Veramente no tuto come l’ano prima. ’Desso gh’jera mi fradelin e, se mi mama la doveva ’ndare fin a tòre i fuminanti, cadéa che al boceta ghe vardàssimo nantri: mi e mi sorela, undes’ani, oto ela; bei sorveglianti! Na volta che apunto la jera ’ndà fora, la n’à dà dó inconbense: darghe n’ocià al pìcolo che dormiva pacìfico in ’eto, e n’antra: darghe n’ocià a na pegnata de siole che stava cusinàndose dessora d’un forneleto a carbonela su i scalini che menava in terassa. Inte l’andar via la s’jera racomandà:
“No stè farle cusinare massa, sinò le va tute in paparela. A me racomando!”
“Va ben, va ben! Sta’ sicura, mama.”
E ’lora, fora ela, emo scuminsià, na volta mi e na volta mi sorela a fare el giro: da la càmara a la scala de la terassa: na vardadina a nostro fradelin e n’ocià a la pegnata de siole. El bocia dormiva tranquilo e le pegnata brontolava pian pianelo. Tuto a posto! Passà un serto tenpo a fago mi:
“Che le sia cote?”
“A mi te me lo domandi?”
“L’è mèjo ch’a provemo a ’sajarle…” Ciapa na forcheta, inpira na sioleta, sùpiaghe dessora par no brusarse la lengua e po’ daghe un sgagnoto: un sgagnoto mi e nantro mi sorela.
“No i è cote, lassémole bùjere nantro tòco.”
E cussì emo scuminsià da novo el vàntene e vièntene da la càmara a i scalini. Passà nantro tòco de tenpo, altro assagio e altra decision de lassare le siole ancora sul forneleto. E la solfa l’è ’ndà avanti fin ch’è tornà a casa mi mama. La prima roba che l’à fato l’è stà quela de vardare el bocia che dormiva ancora da la grossa, sensa disturbare ninsun; la seconda quela de controlare la pegnata. E lì, al primo missioto la s’à incorto sùbito che le siole le navegava in aqua abondante. A forsa de sajarle se le jera cote al punto giusto a l’ìvino fate fora squasi tute. Solamente poche orfane continuava el bagno inte l’aqua de bujo in atesa de la cotura al punto giusto.

[torna sopra]