Curiosità venessiane

El profumo a Venessia

(foto dal Museo del Costume e del Profumo a Palazzo Mocenigo, Santa Croce, 1992 - Venezia)

Sta cità de incanto tra i tanti fati storici, artistici, sientìfici, marinareschi, de costume, comerciài e ancora na infinità de tanti altri, ’a se pol vantar de ’ver portà par prima el profumo in Europa.
Tuto xe cominsià quando ne l’XI sècoeo el doge Domenico Selvo el ga sposà na dona bizantina, Teodora Ducas, ’a dogaressa, unica fémena che in cità in chel tenpo ’a se sparseva el corpo de profumo.
Da sta novità subito apressada da tanti venessiani, i marcanti i ga cominsià a importar da Persia, Egito e Costantinopoi quantità de profumi e de essense.
Quando nel 1200 Marco Polo torna da i so viagi in Cina, el porta casa altre novità su come far i profumi e da eora comissia na storia inportante e longa tra ’a cità de San Marco e i profumi, cussì Venessia a xe costantemente a l’avanguardia anca su ’e mode fin a crearle.
Despiase che sto primato venessian a i giorni nostri no el sia ricordà come dovarìa èssar da tanta zente, anca se da tre ani, primo in Italia, xe stà verto a Paeasso Mocenigo, el museo del profumo, viagio interessante e pien de sorprese come quelo de far un percorso tuto pien de emossion che no se se spetava.
Ancora ’e done venessiane ’e se presentava come parte fondamentàe par ’a vita economica de ’a Repùblica, parché el fiorir de el comercio de i profumi par tuto el resto de l’Europa el passa par Venessia.
In cità se inventa anche el saon come ’o usemo a i giorni nostri, nasse novi profumi, se inventa l’aqua de Coeonia.
Insoma se move tuto el mondo de ’a cosmetica. E pensar che prima de l’uso de i profumi e del saon, nel vecio continente se considerava pecà lavarse tuto el corpo insieme e lavarse ogni giorno. No vojo imaginarme i odori che se podeva sentir ’dosso ’e persone.
Ma ’a cità de San Marco ’a saveva e ghe piaseva èssar ’vanti; usi e costumi de altri Paesi i vegneva apressài al pari de i sui.
Co l’amor de i venessiani par i profumi se xe ’ndài oltre el vaeor de na roba bona, parché i ga savesto dopararli come gesto de sfida e de gran sfrontatessa, usàndoi in abondanza de giorno e de note, in casa e par strada, e fasendo questo i se divertiva tanto, fin a èssar copiài nel tenpo da tuti, anca se mai egualiài.
L’estro de sto pòpoeo de marinai, comercianti, guerieri, artisti, no el se ga mai smentìo ne l’èssar unico ne ’a so storia tante volte aspra, dura, sensa mai desmentegarse el piasser quando che ’a situassion ghe ’o permeteva.
Far partir mude de navi par rancurar mercansìe, capindo ’a duplice inportansa de sto fato, queo manifaturiero e queo de l’efimero, dimostra che el spirito de i nostri antenati el gera queo giusto par vìvar al mèjo in chei sècoi.
Doparar profumi in chei primi ani de vita, secondo mi, ga contribuìo a far de un pòpoeo, un gran pòpoeo parché cussì se viveva in na aria più granda, conpletada anca da eà musica, spetàcoi teatrài, leteratura, insieme a eà scultura e a tute ’e forme che ’e gera el pan de l’anima.
Me so’ senpre domandà come gabia podesto i venessiani rivar tanto distante su i mari co el so inpero, co ’a so gran cultura e ’ver fato tante legi bone e giuste. Xe probàbie che tra i tanti elementi ’a storia del profumo e de ’a cura del corpo ’a sia stada un fator de significato, come ’a tinta che ’e fémene ’e se faseva su i cavéi, ciapando el sol su ’e altane, coverto el viso che el doveva restar el più bianco possìbie, creando el famoso coeor biondo venessian.
Me piase crédar ste robe parché xe da queo che pol parer un matesso che no serve a gnente, ma che pol far nàssar meravege come quee prosperàe ne ’a me cità. So’ rivà parfin a crédar che sprussarse un poco de profumo qua, no el gabia el stesso risultato che sprussàrseo chi sa dove.
Venessia ’a nasse in mezo a eà laguna insieme a l’odor de ’a salsedine, l’antenato de tute ’e fragranse che farà girar ’a testa fin a stordirne, come ’a nostra bea lingua dolse come uno de i tanti profumi venessiani. Se riussimo a conprèndar sti fati che i par fora de testa, semo stai boni de entrar ne ’a storia che go voesto contarve tra ’e aventure de trèdese sècoi de storia de ’a Repùblica, dove un leon e un santo i rapresentava nel 500 ’a cità più bea e potente del mondo eora conossùo.

[torna sopra]