Da la Bassa Veronese

La passion de balar

Se balava a le galzeghe co la fine de i laori de stajon ne i canpi…

Se balava ne le case private…

Par noantri butèi bastava on giradischi… par fare el festin.

Ancó, co tuta sta reclame che i fa a la television de “Ballando con le stelle”, me vien da parlar anca mi del balo.
Se sa che balare l’è senpre stà on gran divertimento; a mi subito me vien in mente me nono Santo Beltrame, cavalier de Vitorio Veneto, (mancà el primo de marzo de 40 ani fà). Quando l’era in vita, anca se el gavéa za 90 ani, ogni tanto in cusina el se godéa minzonar, co na piroeta, on calche passo de sanba.
L’avéa inparà in Mèrica a balar; el ghera ’ndà co la so fameja a 9 ani, da buteleto. Dopo diese ani de Brasile iè tornè de olta, ma a lu, el balo, el ghè restà nel sangoe. Difati, a la festa, dopo le funzion in cesa, el se fermava da Bio Osto e, dopo on goto de vin, el faséa on baleto anca co so fioleta Santina, opure co la Teresona da le còtole longhe. Na dona bigota, la Filizeta che la stava de casa a i Oni, passando, la le criticava a ozze alta par farse sentire e la diséa tuta maravejà, riferéndose a Santo Beltrame: “E sì, che l’è la mèjo fameja de paese!…”
La prima festina da balo, mi l’ò vista da i Lanza, spalancando i oci par la novità. Me ga portà me zia ’Gusta: ghera gente ben vestìa, done da i cavéi ossigenà, modi de fare da siori…
Po’, cressendo, se balava a i festini de conpleano, in conpagnìa de butèi de la nostra età, ma mi e me moroso, pi del balo de la matonela no faséene; invezze chialtri i era tuti descadenè ne i bali, co musiche tipiche da i ani ’60-’80.
Me ricordo che, in passato, sia la Cesa che me zio prete, i era contrari al balo, parché l’era ritegnùo pecaminoso, cussita i zóeni i balava descondon. A guera finìa, però, se balava a l’aperto dapartuto: sul sélese quando s’avéa finìo de desgarbujare, a le galzeghe co la fine de i laori de stajon ne i canpi, ne le case private a Carnevale; bastava na fisarmonica o on giradischi e tuti: veci, buteleti, butèi e butele, i balava.
Anca me zia Rita la me contava del so primo balo in corte: el l’avéa ciapà sotobrazo Bepi Scàtola, vizin de contrada, però so mama Vitoria, quando la l’à vista balare, la ghè ’ndà incontro co ’l scoleto de mélega par darghe bòte in testa e farla desmétare: “Rita, te pari strania. Vien casa tua!”
Anca mi, siben a i festini, faséa solo tapezzeria, go bei ricordi de le musiche romantiche del me tenpo: tipo la canzon de Michele che cantava Ti senti sola stasera… o Una rotonda sul mare… o ’ncora Non essere geloso se con gli altri ballo il rock.
Mi me piaséa balare co el cerchio de l’ulahop… de pi no savéa fare.
Na olta, se balava in copia: walzer, tanghi, mazurche; ’desso, se costuma de pi balare in grupo, fasendo magari ginastica ritmica.
I pi zóeni i va a balare in discoteca, ma qua el discorso se farìa pitosto serio par via de tante reson: musica che te inzuca, luci che te cava i oci e te dà le stornisie… Bisogna che i zóeni i staga piassè atenti, parché oltre a scoltare la musica e a bere calcossa, ghè calche polvarina strana che gira e savemo come che dopo la va a finire… magari tornando a casa quando za canta el galo. Ocio ghe vole, e tanto!
E a casa i genitori i speta con preocupazion… parché quelo che dovarìa èssare on sano divertimento, a i giorni nostri, l’è deventà on zugo pericoloso che ’l sarà fadiga métarghe rimedio.

[torna sopra]