Dal Basso Venezian

La lissia

Lavare la roba grossa de casa jera na operassion che ciapava tute le fémene de la fameja e qualche volta anca i òmani. Nissioli, canevasse onte, braghe de laoro, maje e mudandoni invernài, te te i cavai in primavera duri che, se te i metéi driti, i stava in piè da soi.
"Se fa la lissia!" Fora, in parte de la casa, sora na soja tonda de piera, on gran calieron de aqua. Soto, fogo. Fassi de cane e fassine che brusava fin che vegnéa sù el bojo. Me mare l'andava soto el barco e la se metéa a strassinare fora el mastèo vodo.
− Nato d'on can de omo, dame na man, dame! − Rivava me pare:
− Bisogna propio che vègna mi? Cossa fale chele dó oche de tose co ’l bugarolo in man? Prima se porta el mastèo e dopo el bugarolo co la sénare. Dame qua!
El ciapava el mastèo par chealtra reciara e lo portava co me mare vissin al calieron. Via a tore la roba da lavare e dentro in te 'l mastèo, scominsiando da i nissioli de cànego pi onti, po’ le intimele, po’ le canevasse bianche, le maje, le mudande de felpa e, par ultime, le tovaje. Me sorele co 'l bugarolo, che ’l jera on teo fisso de cànego pien de sénare, le se metéa una parte par parte del mastèo. Me mare ciapava na secia, me pare el ghe la toléa da le man:
− Ocio che fasso mi!
El calava la secia dentro in te ’l calieron de aqua calda. La tirava sù pian pian. Na man so ’l mànego, chealtra so l'óro, el tacava a butare pianeto sora la sénare. L’aqua filtrava co ’n spissoleto senpre conpagno drento in te 'l mastèo. Sece e sece de aqua calda fin che ’l mastèo vegnéa squasi raso. ’Lora me sorele ghe posava sora el bugarolo co la sénare moja. Me pare ciapava na forca, el ghe inpirava el mànego so i busi da na reciara a chealtra. Lu da na parte, me mare e me sorele da st’altra, a brassi, i lo portava dentro in càneva, parché de note ghe jera senpre ladri che jirava.
A la matina drio, fora el mastèo, méteo vissin al posso. Via la sénare so ’l canpo e fora la roba par la prima descargada. Dó mastèi co aqua neta de posso, la tola da lavare posà so le reciare. Là te sentìi le fémene russare co la spasseta, ciacolare e sbàtere cussì forte che te vegnéa i sgiansi ’dosso a diese metri.
− Russa ben chei cantoni! − diséa me mare contro me sorele.
− No i vien!
− Vardè qua, se i vien! Cussì se fa, cussì! Basta che movì chee man!
Verso sera ghe jera el cavaleto de la roba co na goba alta senpre, pronto par la seconda lissia.
Staolta i tamisava la sénare sora la caliera e i la faséa bójere co l'aqua. Bisognava che la fusse bea neta, sensa gnanca on granèo de porcarìa. Po’ i passava, co ’l bugarolo, l'aqua de bojo, secia dopo secia, drento in te ’l mastèo.
Dapartuto vapore. Mi, là a méterghe el naso par vardare.
− Ocio, tìrte in là, bauco! − diséa me pare, spentonàndome. − Se te salta ’dosso on sgianso, te fè le vessighe, ’lora sì, te canti!
’Ncora tuto in càneva. Se ’ndava a magnare. Me sorele se lagnava che le ghea la schina rota e la pèe de le man infrapolà.
− Mi no me fa tanto mae! − diséa me mare mostràndoghe le sue.
− Par forsa! Te ghè la pèe come na vecia rospa...
− Snarociose! Inpararè anca voaltre cossa che xe la fadiga. E, po’, in fin de i conti, no fè altro che netare anca el vostro onto. ’Desso in leto presto che doman ghemo da fare ’nantra strussiada pèso, finir de lavare e resentare!
’Pena che vegnéa ciaro, te sentìi sbàtere i balconi e ciamare:
− Tose, sù! − E dopo ’nantra s-cianta: − E ’lora?
In tute tre le strucava la roba del mastèo, po’ le la metéa a sjossare so ’l cavaleto. So la lissia vansà, i ghe butava la roba de colore.
− Questo xe el lavoro par doman − diséa me mare.
Le partìa co ’l cavaleto de la roba sgiossà verso la peca del fosso. La peca jera na zàtara de legno, basso par la riva, a peo de l'aqua corente. In zenocion, co la tola da lavare, posà davanti, spasseta e saon, le scominsiava russare.
Na intorcolada al nissiolo, na sbatùa so la tola e drento so l'aqua del fosso. ’Nantra intorcolada, ’nantra sbatùa finché el nissiolo vegnéa bianco. ’Lora in dó, una da na parte, una da chealtra, girando in contrario, le ghe dava la intorcolada finale. Le ghe metéa tuta la forsa, le strucava parfin i oci. Su sora el cavaleto. Me pare, in fondo al cortile, partìa co na brassà de corda bianca da lissia. Mi ghe ’ndava drio. Rivàimo al moraro grando.
− Ciapa qua, che mi la ligo! Ghe ’a feto? Atento che la corda no russa par tera! − ’Pena ligà da on cao, el me la ciapava da i brassi. Desrodolàndola pian pian, ’ndàimo verso on selgaro distante, vissin al fosso. El passava chealtro cao so la braga de na rama, po’ el tirava par tènderla.
− Forsa, tira anca ti, dài! Eh, bisogna che te magni ’ncora tanta poen­ta prima che te tassi forsa...
Vegnéa le fémene co ’l cavaleto de la roba. Le tacava destirarghe sora nissioli e tovaje. La roba pìcola ’e la picava so ’nantra corda. A mesodì te vedéi tuta sta fia de roba bianca drita. Verso sera la tacava sventolare suta. Mi me la godéa da mati córere, a bissa, tra on nissiolo e chealtro.

[torna sopra]