Da la Bassa Veronese

Reliquie de guera

El caporal magiore Beltrame Sante (cl. 1885).

Cartolina postale spedìa da Sante Beltrame a so papà Pietro el 12-5-1917 e rivà a S. Pietro de Morubio el 15-5-1917.

Nona Vitoria co i fiói Rita, Giuseppe, Pietro e la pìcola Maria: foto mandà a nono Sante al fronte, parché ’l vedesse l’ultima nata (12-3-1916).

Ghè ’pena stà, el mese passà, la festa de i angeli custodi (2 Otobre) e, insieme, anca la festa de i noni. Son sicura che tuti quanti semo ricordà de lori. Par mi, basta un gnente, come ’ndare ne la casa indo’ che i stava lori e, alora, l’è tuto on tornar indrìo nel tenpo.
Come verzo la porta, sul meal, eco che se presenta la nona Vitoria, co la so ozze tremolante:
“Cara la me butina, sito rivà? Ven drento che te te scaldi fora…”
Vao a vèrzare le finestre de la sala e là in soaza, tacà al muro, taco a lézare: Onorificenza conferita a Beltrame Sante, cavaliere di Vittorio Veneto”. Postè li vizin ghè le so medaje-ricordo pontè co un ucin e decorè da on nastrin tricolore. Te nantro coadro li tacà ghè scrito: “Cavaliere della Repubblica” par èssare stà par trent’ani presidente de l’E.C.A. (Ente Comunale di Assistenza).
Come vao in cusina me lo rivedo sentà al taolin, indo’ che l’à leto el giornal de Pace a questa famiglia o altri. Lo vedo che ogni tanto el se mete la testa fra le mane:
“Mariavèrgene!” el dise; e alora no ghe vol mia tanto a capire cossa che ’l pensa, soratuto quando la nona, indrìo a preparare el magnare, la pesta el sale grosso co on sasso de selze: “Te ghè da saver, cara Lucia, che chel sasso lì, belo lustro, strià de colori, me l’ò portà casa mi, in tel zaino da soldà, quando son vegnù casa da la guera, nel 1918. Pensa che me sorela Otavia, l’óndese de novenbre del stesso ano, zóena come che l’era, l’è morta de spagnola e… mi ò pianto tanto…”
Po’, ingossà come che l’è, el tase, ma mi vao avanti co i pensieri… Lu l’à fato tuta la Grande Guerra e, a casa, ghera so mojer con tri buteleti picenini e una in viajo, so papà, so mama e so sorela; l’è stà ferìo a Campomolon de Asiago; i lo credéa morto e i jera indrìo a butarlo nel buso pien de calzina. L’è stà fortunà che na crocerossina la ga tastà el polso e l’à sentìo che l’era ancora vivo, cussì la l’à salvà. El ga rimesso on ocio, ma a la fine l’è guarìo anca de quelo.
Ma quanti spegazzi che l’à visto: ghè morto un so caro amico tra i brazi: “El gavéa le buele fora”, el contava, tremando ancora, ma no ’l voléa mia farse védare.
Semo nel mese de novenbre: el giorno 4 i dise che l’è la Festa de la Vitoria… Quala vitoria!?
Pori soldè! Iè tuti da ricordare, zóeni e veci, vegnùi da tuta Italia, tuti co el so parlare dialeto, soratuto qua ne le trincee del nostro Veneto.
Tra i tanti libri vegnùi fora par el Centenario da la fine de la Prima Guera Mondiale, penso che possa aver contribuìo a réndarghe onor a sti soldè, anca el me libro TA-PUM - Lettere dal fronte, con i scriti che anca me nono Santo el mandava a casa.
Ò scominzià a parlare de lori fin dal 2001 e da alora no ò mai desmesso de ricordare in tute le ocasion quanto bruta e ingiusta l’è la guera, spece la “Prima” che à provocà pi de siezentomila morti, e altretanti invalidi e feriti nel corpo e ne la mente. Quanti “semi de guera”, poarini, par la prima olta ciamè cussì, sti soldè ne i manicomi, che i tremava come na foja, tontonando parole senza senso. Quanta soferenza e quanta miseria.
Dovemo veramente onorare sti conbatenti e reduci, sia de la prima che de la seconda guera, altretanto orenda, savendo che se ’desso gavemo on po’ de pace e libertà lo dovemo propio al so sacrificio.

[torna sopra]