Da Gavello (RO)

Par ricordare el me amigo Piero Casotto

Piero Casotto

Anche al “Brandolini” el se ghea cavà fora on tòco de tera par far l’orto, tirarse sù le gaìne e anche qualche bosegatèo.

A lo go cognossesto, Piero, quaranta ani fà (1949-2019), na olta ca so’ ’ndà a fare el comissario d’esame de maturità a Oderzo, ignonde che lu el faséa l’ecònomo del “Brandolini Rota”, on Colegio de i padri Giusepini del Murialdo, co tanto de Liceo, Rajonerìa e Scuola Media. E alora, a vien ca ghe domando ospitalità par on mese intiero, e lu el me la dà: colazion, pranzo e zena, la càmara par dormire e le pulizie ogni giornata, a on prezo onesto, da cristian.
E cussì discorendo, a sento che ’l parla el me dialeto. Sichè, domandando da ignonde che ’l vien, lu el me dise che ’l xe nato in te la Padoana, e che so mama Rita la sta a Anguilara, de là de l’Adese, che mi a stago de qua. Benon.
El me cunta anca che da putin el ghea perso so popà, e che so mama la lo ghea mandà in seminario. E al seminario el ghea studià fin a rivare al diploma magistrale, deventando on fradèo giusepino. Ma la so storia de fiolo de canpagna la ghe jera restà drento, e cussì anche al “Brandolini” el se ghea cavà fora on tòco de tera par far l’orto, tirarse sù le gaìne e anche qualche bosegatèo. E cussì, la sira, dopo zena, on dì da na parte, on dì da nantra, a ’ndemo a visitare tante citadine del Trevisan, da Vitorio e Folina a Conejan, da Àsolo a Gorgo al Montican: na tera, quela trevisana, bela come el sole, co zente bona e sinpàtica, e on vin ca no ghe n'è de mèjo al mondo del raboso de Piave: a Negrisia, Ponte, Oderzo, Salgareda, Canpo de Piera: on vin de bocato, rosso vivo rubin ca te inlùmina i oci, inbriagando de squisiteza el gargato, ca te vien vuoja de rìdare e cantare come na piva.
Ma Piero no ’l cantava. Lu el ridéa solamente, contento de catarse co uno de fameja, tanto che, anca dopo i esami, el vegnéa a catarme e insieme a ’ndàvimo a magnare pesse dal me amigo Aligi, opure, s'a jera inverno, a magnàvimo a casa mia che Piero ’ndava mato par i codeghini e par i tortelini ca ghe faséa aposta par lu. Insuma, la nostra la xe stà na amicizia che la ga continuà par senpre.
Par disdoto ani a go fato esami in te ’l Trevisan, bevaràndome de proseco có ’ndavo a Vitorio e Conejan, e de raboso có i me mandava a Oderzo. Ospite senpre de Piero e del “Brandolini”, se capisse. E quando ch’i lo ga mandà a laorare a Viterbo, al Colejo de San Piero, anca là el ga sistemà l'economato e fato miliorìe al stàbile e in più, da vèneto de na olta, el se ga fato l'orto e el ponaro. E alora a so’ ’ndà a catarlo anca là e ogni du-tri misi a se vedìvino, parchè el me ga catà na ocasion da conprarme co puòco na casetina de dó càmare sora el lago de Bolsena. E cussì a ghemo girà par tuta la Tuscia, ca ghè tanti posti beli ca ne sò, e lu el me parlava de la storia e de le specialità locali, propio come quando ca se ’ndava in giro par el Trevisan, che 'l cognosséa in longo e in largo. Ma quando che dopo on tòco i lo ga mandà a Albano Laziale, a se ghemo catà puòche olte. Però a se telefonàvimo, e senpre el vegnéa d’istà a catarme, par le ferie.
Questo, fin a on ano fa, che no ’l xe mai vegnù. E mi a go domandà com’èla. E lu el me ga dito che ’l ghea on qualche disturbo. No de più, parchè Piero no 'l parlava mai de lu e mai che 'l se gabia lamentà de gnente. Ma anca sto ano no ’l xe vegnù e alora a lo go ciamà e par telèfono a go sentìo che ’l parlava malamente, diséndome che ’l jera a l’ospedale de Rocca de Papa. E cussì a so’ corso sùbito a catarlo, e lo go visto in leto imobilizà e pien de male, che 'l ghea solo i oci come prima, lu, che ’l jera on omon grando come on paranco e co na forza da leon.
No me lo gheva dito, del so male, e lo go rinprovarà, ma gnanca a so fradelo Stefano lo gheva dito, tanto che mi a go pensà ben de avisarlo. Ma lu no ’l ga volesto, “par no crearghe soferenza”, cussì, el me ga dito. E alora a ghemo parlà de le tante robe ca ne ghea fato piazere in tuti sti ani, del magnare e del bévare ben ca ghemo fato insieme e anca el ga scherzà co mi, siben che 'l fusse pien de male; e po’ a lo go saludà, savendo, mi e lu, che questa la sarìa stà l’ultima volta ca se vedìvino.
E difati, on paro de setimane dopo, al quatro de otobre passà, el so amigo e colaboratore Maurizio el me ga telefonà par dirme che Piero el jera partìo anca lu, par i prà del zielo, senza lassare gnente de lu, parchè lu no 'l ga mai abù gnente da la vita, né schei, né sodisfazion, anzi el ga abù on qualche rinpròvaro parchè el ghea l'abitudine de jutare la zente in dificoltà.
E mi ancora adesso a lo penso senpre, ca me pare inpossibile de no védarlo più, co tuta la vitalità che 'l ghea, da resìstare par on ano e mezo al tumore al pancreas, e soportando ogni tipo de cure, anca sperimentali, pur de continuare a canpare.

[torna sopra]