Da San Stèfano de Zimela (VR)

La gioia de ritrovarse

Enzo Coltro

Mario Ceccarello

Guido De Nobili

Jera da poco tenpo che a gavéa scominzià a colaborare co’ Quatro Ciàcoe, quando che el me amico Enzo Coltro, che ’l gavéa la so pagina fissa, el me ga invità a nare co’ lu a la riunion anuale de i colaboratori, l’8 dicenbre, a Padova. Mi a go acetà, ma jera un poco in pensiero parché no conosséa nissun e no savéa mia come conportarme.
Quando che semo rivà a l’Isola de Caprera e Enzo el me ga presentà, a so’ restà maravejà da l’acolienza che me ga fato Mario Klein e Vittorio Ingegneri, che i me ga saludà co’ ’na cordialità e un calore come che fussimo stà amizzi da senpre. Me so’ sentio sùito come a casa mia e go scominzià a conóssare i autori de i vari articoli che a gavéa leto in te la rivista.
Se ghemo sentà a un taolin da quatro e dopo poco a xe vegnù a farne conpagnìa altri du colaboratori. Uno el jera Mario Ceccarello, che ’l gavéa un ano de pi de me popà, e chel’altro el jera Guido De Nobili. I jera du personagi l’uno l’oposto de chel’altro. Mario el jera vecioto, robusto, vestìo co’ eleganza co’ tanto de pancioto, de poche parole, ma co’ ’na bontà d’animo, ’na calma e ’na serenità che la ghe vegnéa fora dapartuti i pori. Guido invezze el s-ciopava de energia e de entusiasmo e el parlava come ’na metralia tanto che Mario el me vardava sornion e, soridendo soto i bafi, el me strucava de ocio.
Mario el jera un uficiale de i Alpini come mi, bancario come mi, ghe piaséa scrìvare in prosa e in poesia e piturare come mi e cussita a ghe ghemo messo gnanca un minuto a nare in confidenza e a far nàssare ’na gran amicizia. El stava a Venezia e el me diséa che el jera un alpin de quota zero, parché la so cità la xe a livelo del mare!
Ma anca co’ Guido, pilota civile, entusiasta de la vita, sprizzante energia, inpegnà in tante atività, no me ga volesto mia tanto a entrare in sintonia. Co’ Enzo invezze a jèrino da tanti ani buseta e boton e senpre in colaborazion, tanto che ’nantra colaboratrice, Lucia Beltrame Menini, la ne gavéa batezzà come Bibì e Bibò, che i jera du fradeleti terìbili che in te le pagine de Il Corriere dei Piccoli i ghin conbinava de tuti i colori, fasendo deventare mati Capitan Cocoricò e la Tordella.
Co’ Mario e Guido l’amicizia la xe continuà fin a la so morte, sia scrivéndose, sia telefonàndose. Par mi le xe stà dó persone inportanti parché le me xe stà de esenpio in te i momenti un po’ difìzzili, quando che te vien voja de molar tuto: Mario (1907-2008), co’ la so mente lucida che lo ga portà a èssare ativo fin a la fine de la so longa vita, e Guido, che a 85 ani el ga ’vu la volontà de riotenere el breveto de pilota e de tornare a volare e che, poche setimane prima de morire a 96 ani, el me ga telefonà, ancora pien de “voglia di volare”.
Mario, Guido, Enzo, Maria Da Monte e… tanti altri amizzi in ne ga lassà e ogni ’olta che se ritrovemo a l’Isola di Caprera a me pare che i sia ancora lì co’ noantri, a fare quatro ciàcole, insieme co’ tuti cheialtri che in tanti ani i ne ga lassà longo el sentiero de la vita. Me pare che i sia ancora lì parché le persone care no le more mai finché le continua a vìvare in te i nostri cuori.

[torna sopra]