|
Editoriale
Salvare el pianeta se pòle
Tuti parla, discute, studia su cossa fare par salvare l’anbiente e el clima, se no volemo finire su la gradela de san Lorenzo. Tuti nel mondo (o quasi) xe d’acordo che ocore canbiare le nostre abitudini: prima tra tute, quela del consumare.
 | | Le preocupazion de i zóvani le xe pi che giustificà. (foto Agenzia Fo) |
In testa a le robe da fare a le preste ghe xe la question anbientale. Che piasa o no, la zóvane Greta la ga ’vudo el merito de svejare i Grandi del mondo su sto problema de prima necessità.
Poco inporta che sia o no sia vero, come sostiene i catastrofisti, che semo su l’orlo de on strapionbo par la salute del pianeta, e che el clima dipende in parte da l’omo, ma anca da i soliti cicli “riscaldamento-glaciazione”.
In realtà, le nostre cità le xe deventà de le càmare a gas; el giazo in montagna el xe drio desfarse parché la tenperatura la xe pi alta de quela de la pianura; l’aqua del mare la xe drio alzarse (l’aqua granda de Venezia insegna!); i oceani i xe deventà… mari de plastica; tante zone de la Tera xe drio deventare deserti; el 40% de le bestie le xe drio sparire par senpre (basta pensare a quele morte ne i disastrosi incendi de l’Australia!). Se po’ ghe metemo el nostro stile de vita, se capisse che so sta Tera no l’è pi on balar de carnevale.
Dunque, le preocupazion de i zóvani de dover vìvare in te on mondo in via de esaurimento e pien de velen, le xe pi che giustificà. Le continue manifestazion de piaza pa ’l clima e par l’anbiente le xe on segnale d’alarme da capire e da tegnere in considerazion.
La socetà, la scola e la fameja i ga da fare la so parte, parché ormai lo ga capìo anca i tonti: el nostro pianeta no ’l pole pi èssare sfrutà come ghemo fato fin ’desso. Dovemo tratare mèjo la Tera par tratar mèjo noantri stessi. On progeto el xe za partìo: quelo de Von der Layen per ridure entro el 2050 le emission de anidride carbonica che ’velena l’aria. Oltre a questo ocore canbiare l’industria, l’agricoltura e i trasporti.
A dire la verità, calcossa sta canbiando: la “raccolta differenziata” de le scoaze xe on bon segnale, come pure l’òbligo de no fumare ne i cinema, ne i bar e ne i loghi pùblici.
Questo conferma che xe e sarà le nostre abitùdini, el nostro pensiero a salvare el pianeta. Se fin ’desso semo senpre ’ndà via in màchina, par nare fin a messa o a torse el giornale, quatro passi a piè deventa calcossa par el canbiamento. Par consumare manco carne, no xe necessario deventare “vegani” o vegetariani, basta magnarla 2 volte al posto de 4 a la setimana. Par on grado de manco de calore in casa, basta métarse na maja pi grossa. Rinunciare a magnare le fràgole o na feta de anguria al posto de on senplice pomo, a fine pasto, te ’l mese de febraro, vol dire dare el propio contributo al canbiamento de on modo de vita che ghemo visto dove el ne sta portando.
Certo che, da qua in avanti, la lista de le robe da fare la xe longa: par questo bisogna partire subito.
Calchedun ne ga domandà cossa la vol dire la copertina del nùmaro de genaro de Quatro Ciàcoe. Risposta: el riciclo. Basta butare via, xe ora de riciclare, come se faséa na volta.
Le nostre mame no le butava via gnente, le gavéa le man d’oro, le ne faséa nar ben on abitin da l’asilo a le elementari, no le gavéa a disposizion “pannolini anti-pipì”, ma panesèi che ’ndava e vegneva: mastelo, aria, sole o cusina economica, e i tornava a fare la so funzion assorbente. Le camise da omo, del marìo o del suocero, a furia de cavare stofa dal fondo par rifare colo e polsini, le deventava senpre pi curte.
Me ricordo che, nel dopoguera, desfando on vecio paletò e faséndolo incolorire, el deventava on vestito da omo, braghe e jacheta dopio pèto, che mi go portà quando naséa studiare da maestro, a Montagnana.
Sì! I ricordi ne pol jutare a riflètare so on mondo manco consumon, on mondo che no ga da ritornare a èssare quelo de na volta, ma che ga da insegnarne a ridure la velocità de la corsa del progresso che ne ga portà a esagerare in tuto.
Démose na regolada, dunque, senza spetare ordini da l’alto, parché se volemo, podemo salvare el pianeta, nando ’vanti insieme: on poco a la volta e on poco tuti.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Salvare el pianeta se pòle
Tuti parla, discute, studia su cossa fare par salvare l’anbiente e el clima, se no volemo finire su la gradela de san Lorenzo. Tuti nel mondo (o quasi) xe d’acordo che ocore canbiare le nostre abitudini: prima tra tute, quela del consumare.
de Mario Sileno Klein
|
