Da Legnago (VR)

Calcossa par rìdare

Al circo
El diretore de on circo, el ghe dà órdene a on can de cantare, balare e de fare de i altri nùmari in modo de dimostrarghe a la gente che ’l pol tegner sù da lu solo on spetàcolo par on’ora. Fin che ’l can el sta pareciàndose a montarsù in te la sóga par fare on salto mortale, spunta de colpo on can sambernardo e l’è nà de corsa verso chel’altro can.
Co la boca el lo ciapa par el copin e el lo strapega ’ìa. El paron del can el s’à scusà co ’l diretore del circo:
“Me despiase tanto, son propio restà male anca mi. El sanbernardo l’è so mama…, la vole che ’l faga l’avocato!”

A teatro
’Na copia de sposi jè nà a teatro e i s’à sentà in platea; la mujere la ga dito a so marì:
“Sta’ ’tento che tra poco riva on gran monologo.” El marì:
“Dal bon? Spero che no ’l vègna sentarse davanti a mi!”

El trenin
On pastore el va in paese a lamentarse parché on treno el ghè nà ’dosso e ga copà on s-ciapo de le so pégore. El passa davanti a ’na vetrina de zugàtoli e el vede on modelin de on treno. De colpo el va drento, el ciapa ’l trenin, el lo tra in tera e po’ co ’na rabia mora el lo pesta soto i piè.
“Cossa falo?” ghe sbraja la comessa.
“Eh, cara” risponde ’l pastore, “bison spacarli fin che jè oncora picenini ’sti desgrazià chì!”

Dal dentista
El dentista rabià e rosso come on pearon, el sbraja con so mama de Pierino:
“Signora, la me faga el santo piasère de dirghe a so fiolo de vèrzar la boca!”
“Pierin” ghe fa so mama, “verzi la boca in modo che ’l dentista el tira fóra la man!”

Al cinema
Al cinema, on veceto el se alza de colpo e po’ ’l se sbassa par vardare soto la poltrona, disturbando la gente. On spetatore el se alza, el ghe va rente e ’l ghe domanda:
“Cossa falo? Coss’èla tuta ’sta confusion?!”
“Caro sior, m’è cascà par tera ’na caramela che a mi la m’è cara!” ga risposto ’l veceto.
“Ehhh, par ’na caramela tuto ’sto bordelo?”
“Sicuro!” el bróntola ’l veceto ’rabià come on matonzelo. “In te la caramela ghè tacà la me dentiera!”

Amore e gelosia
On zzentanin el s’à inamorà de ’na zzentanina; l’èra geloso e tuti i giorni el ghe tendéa, el vardava indo’ la naséa e lu daromài maniaco, sempre adrìo fin che on giorno el l’à fermà:
“Eh, giovanota… se no te te decidi a dirme de sì, mi me còpo!”
“Alà, matooo! Come feto coparte che te strissi par tera, te vivi soto tera, te rampéghi so i àlbari e su par i muri senza far tanta fadiga!”
“Come fao? Me buto davanti a ’na galina!”

Pierino
Pierino el ghe dise a so opà:
“Opà, vòto che te conta ’na barzeleta, scomiziando da la fine?” E so opà, pien de curiosità par la invenzion de so fiolo:
“Gnanca bon!... Próa, e dopo te digo brao!” E Pierino:
“Intanto scomizia a rìdare!”

Tra gati
On gato el va a spasso co la so moroseta gatina, el la varda da inamorà, e po’ ’l ghe dise:
“Cara, coanto te vui ben!” e lì el ghe dà on baso.
“Te ghè on bon profumo, ghe sito stà oncora i mezo a le ’mondizie?”

[torna sopra]