|
Da Adria (RO)
Cerimonie e celebrassion
 | | Insuma me so’ reso conto ch’a se tratava de la cerimonia de la prima comunion… |
Na volta le cerimonie religiose più inportanti le se riduseva a tre: crésema, matrimonio, funerale. Canbiando i tenpi è canbià anca el nùmaro e ’l modo de festegiare i diversi sacraminti. Un bateso el se fa co’ tanto de prucission de màchine, co amissi e parenti in ponpa magna, co’ sàntolo, sàntola, mama e papà, noni e zii e tuta ’n cortèo che dal piassale de la cesa riva fin al fonte batesimale. Crésema e comunion le se porta drio na coa granda squasi come un matrimonio, e cussì via.
Intanto anca la Cesa l’à dà più inportansa de na volta a le diverse cerimonie, e questo, in fondo, l’è de serto na roba bona. Che la zente, che anquò par quanto la pianza el vivo par ciavare el morto, la vole in ogni modo far festa a ogni ocasion, dàndoghe più inportansa a la cerimonia, ninte de male. Però, però…
Vago a messa doménega passà e m’incorzo subito ch’a ghè chelcossa de particolare: le prime file de banchi ocupà da ragassiti non più bocia; na gran s-cesà de zente; più de qualcuno vestì in grìngola; lanpi de machinete fotografiche e telefonini; musi mai visti soto i archi de i altari e persone che, a conossensa de tuti, pitosto de magnar na partìcola i preferisse un panin de mortadela in cesete sensa consacrassion; el pàroco in ponpa magna, co tuta na coà de chiericheti. Insuma me so’ reso conto ch’a se tratava de la cerimonia de la prima comunion pa’ i fiòi de la parochia. Va ben – ò pensà – la sarà na messa un tantin più lungheta: santa passiensa! Cato na carega libera tra le ultime file, in fondo a la cesa, e me còmodo. El mi vissin el me fa un soriseto de conpiacensa e mi rispondo a l’istesso modo, come p’r un’intesa: “Anquò a se pipemo na bela solfa.”
Taca la messa: el paroco dise dó parole su l’avenimento co tanto de fervorin pa i bocia e po’ scuminsia el coro ch’a fa da contorno, cantando: “Purificami o mio Signore…” E la messa va ’vanti co’ i interventi d’i bocia: leture dal Vecio Testamento, invocassion, leture dal Novo Testamento, vangelo, altre invocassion prima che scuminsia la consacrassion e ringrassiamenti finali: el tuto orchestrà da i cosideti catechisti, ch’jeva perso l’ànema p’r organisare la sacra rapresentassion. Su le navate, da le bande de quela centrale, continua un vàntene e vièntene che, tacà ancora prima del scuminsio de la messa, va ’vanti fin a cerimonia conclusa: chi porta fora un bocia pìcolo ch’el jera za in andamento par sigare o far casin; chi vien dentro e, rivà fin a i primi banchi, el se gira tornando indrìo e no se capisse el parchè; chi va, senpre co ’n bocia a man, a tacare un lumin a la Madona de la Salute; chi zonzona in serca de na carega libera par portàrsela indove che ’l vole lu; un pare che va ’vanti e indrìo co’ na carossina, parchè la mare ga da tegner d’ocio el fiolo più grande che ’l fa la comunion; qualchedun che ga caldo – ciò co’ tuta chela fola! – che ’l ciapa la porta p’r andare fora sul liston a brincare na bocata d’aria…: un gudiolo par quìi ch’i à catà posto da le bande, parchè la navata centrale la jera za tuta ocupà.
E insuma, a la fine, se conclude la celebrassion e tuti se basa, se saluda, s’invia fora de cesa, se pressìpita int’i bar par tirarse sù na s-cianta e la cerimonia, par i estranei, a pare che la sia fenì lì. Eh no, cari amissi. Tra na ciàcola e l’altra se tira fin a mesogiorno par concludere la festa co’ tanto de magna e bivi in ristoranti, agriturismi, ostarìe, bétole e postesini vari, dove ch’a s’jera fato prenotassion za da misi prima par no restare sensa posto.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Salvare el pianeta se pòle
Tuti parla, discute, studia su cossa fare par salvare l’anbiente e el clima, se no volemo finire su la gradela de san Lorenzo. Tuti nel mondo (o quasi) xe d’acordo che ocore canbiare le nostre abitudini: prima tra tute, quela del consumare.
de Mario Sileno Klein
|
