|
El filò de i Wigwam
Mirka Cameran Schweiger
Siora del vin, de i giornaisti e de i… galeoti
 | | Un incontro ARGAV al Wigwam de Arzerello, con Efrem Tassinato (cuoco, a sx) e Mirka a dx (con in mezo altre due signore). |
Pare de inpossìbile che serte persone le riessa a tegnere insieme interessi e inpegni tanto difarenti. Epure, sta spece de mirabolessa la conpie eà Mirka che la xe na sommelier co tanto de diploma e gran pratica fata in tanti servissi, la xe segrataria de l’ARGAV, l’associassion regionàe de i giornaisti de agricoltura, alimentassion e anbiente de Veneto e Trentino Alto Adige, e, par finire, la fa la volontaria in tel carcere Due Palazzi de Padova. Enbè, fiòi, come che la fassa no se sa, ma lo fa co’ amore e ben e questo, in sti tenpi de slandroni, copagati, menabonìgoi boni da gnente, xe proprio na grassia del Signore.
Fémane che se intende de vin, incominsia a èssarghene assè, anca parché trovemo senpre de più adiritura tosate studià a parare ’vanti aziende vinìcoe inportanti. E anca in te ’l mondo del comercio te vedi fémane che gestisse enoteche e in te i ristoranti, sa se se poe métare in tola un vin de on serto valore, sensa na spiegassion. Eco che qua la Mirka la xe brava a dirte cossa e come.
Vegnemo ’desso a chea banda de giornaisti, anca un fià magna e bevi, che ghe so’ anca mi, che la ga selto de tegnere insieme, metendo a disposission le so capacità, la so passion e el so tenpo parché, anca qua, lo fa da volontaria. Difìssie sarìa pensare na ARGAV senza el so inpegno par el tesseramento, i avisi de ’e riunion, el tegnere de conto, i verbài e, se voemo, anca na tiradina de rece a i distrati e finti desmentegoni su che ’l minimo dovere de pagare eà so quota associativa, che ghe serve a la associassion par tirare ’vanti.
Da i so aceni de ’e storie del carcere, xe atraverso de éa, de prima man e a la bona, che savemo che ’sti desgrassiài che i xe drio pagare el so debito co la socetà i ga anca na ànema, sentimenti, fameje co mame, mujere e putèi anca picinini. La ghe xe de conforto, a scoltare le so storie e i so sfoghi e, par quanto possibile, insieme a i altri volontari, ’ndarghe incontro a le so necessità che magari xe solo de recuperarghe un vestito un fià da cristiani par presentarse con dignità a na udiensa de tribunàe o, pa i più giudissiosi, a na ussita-premio pa respirare l’aria de ’a libertà. Cussì pressiosa, quando che la manca. Padova +39 339 6184508 argav@fastwebnet.it
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Podaremo mai èssare felici?
Tuti se ghemo fato sta domanda davanti a giornate inturbià, a situazion che no promete gnente de bon o a incidenti de percorso. In ogni caso la sarà dura, ma no inpossìbile. Èssare felici vol dire avere speranza có ghe xe da conbàtare, sentirse forte davanti a la paura, saver perdonare, non coltivare ràdeghi e amare. Amare senpre!
de Mario Sileno Klein
El filò de i Wigwam
Mirka Cameran Schweiger
Siora del vin, de i giornaisti e de i… galeoti
de Efrem Tassinato
|
