Da la Bassa Veronese

Al tenpo de i papàvari…

Quando da buteleti sparpajàvene fojete de papàvari a la procession del Corpus Domini.

Le done de canpagna, fin che la pianta de i papàvari l’è picolina, iè use a narla tor sù co el zestelo da erba.

Solo a nominar sto mese, eco che me vien in boca de dire: Giugno co la falce in pugno, on vecio proverbio che desso no ga pi la falce in pugno. Ma a mi el mese de giugno el me fa piassè ricordar le me caminade tra le stradele de canpagna del me paese, somenà de papàvari rosso-slusenti in mezo al verde del formento, pronto a deventar de oro.
Quante olte me son fermà davanti a sta maraveja de la natura, a sto spetàcolo color rosso-fogo, belo assè, che slusegava al sol come na fiama.
Da buteleta, pi de na olta portava a scola on mazzeto de papàvari a la me maestra, Igea Bettili, che la vegnéa in coriera tute le matine da Verona; ela la se godéa e la me ridéa co i oci, po’ la metéa subito i fiori in te na carafina piena de aqua sora la so càtedra.
Alora in mezo a i canpi se catava anca tanti bei fiordalisi, de color celeston.
Nantro bel momento de tor sù i papàvari l’era quelo par la procession del Corpus Domini: insieme a le me conpagne, tute vestìe co l’abito bianco de la Prima Comunion, gavéene tra le man i zestelini tuti fodrè de carta crespa bianca co drento tanti fiori e, davanti al baldachin del Signor, sparpajàvene fojete de fiori e la pi parte i jera papàvari de on rosso-gajardo, propio parché a chei tenpi ghe n’era on sterminio.
Quando da buteleti se podéa nare par i canpi, no come ’desso che, par el coronavirus semo reclusi, faséene anca tanti zughi co i papàvari ancora serè: toléene sù i bòcoli e, prima de vèrzarli, zercàene de indoinar de che colore i jera: bianco, rosso o rosa.
E quando ghera la lira, prima de l’euro, su de le palanche ghera stanpà sora on papàvaro co na ava drento. Quante olte emo cantà e ancora cantemo la canzon de Sanremo: Lo sai che i papaveri… in un campo di grano che dirvi non so…
’Desso, molto prima de Giugno, l’è facile catar i papàvari drio le rive de i fossi e par le strade o in calche pra’ vegro, ma no inte i canpi ’ndo’ ch’i ghe buta i diserbanti…
Le done de canpagna, fin che la pianta de i papàvari l’è picolina, iè use a narla tor sù co el zestelo da erba. Le dise che ste piantine (le ròsole) iè bone assè da magnare e po’ le rinfresca el corpo.
Anca tanti pitori i ga avù la passion de disegnar sti fiori ne i so quadri, soratuto i inpressionisti, come Claude Monet (con el so Campi di papaveri a Vétheuil), come l’olandese Vincent van Gogh (con Vaso con papaveri – Vase of Poppies, 1886) e anca el finlandese Simo Olavi Nygren de Padenghe (BS), conossùo come el pitor de i papàvari.
Anca mi in casa a go, in sala, on quadro de Michele Cascella, pitor de fiori e paesagi, che l’à ritrato na destesa de papàvari a tuto mànego.
Anca se i jè ricordi, mi vao ancora ’desso, quando go l’ocasion, in zerca de sto re del color rosso.

[torna sopra]