Da Brugine (PD)

I 80 ani del gran tenore veneto Giuseppe Giacomini

El tenore Giuseppe Giacomini in Aida.

Sto mese vojo parlare de Giuseppe Giacomini (Bepi par i amissi) parché el 7 Setenbre el ga conpìo 80 ani, essendo nato nel 1940 a Veggiano (PD).
Giacomini xe stà de securo uno de i pi grandi tenori de eà storia de la lirica, parché no el xe stà on tenore qualsiasi, ma on gran tenore, de quei, come diseva i nostri veci de na volta, che faseva dondolare i lanpadari e s-ciopare i biceri de vero.
Dopo de gavere scoverto che la natura ghe gaveva donà na vose fata aposta par cantare, el se ga messo a studiare prima par conto suo e dopo seriamente a Conservatorio “Cesare Pollini” de Padova co’ la maestra Elena Fava Cenati, diplomàndose co’ el massimo de i voti.
Par scominsiare, el ga partessipà a de i concorsi de canto lirico, vinsendo coeo de Adria, Vercelli, de la Scala de Milan e del San Carlo de Nàpoi. El debuto lo ga fato a Vercelli ne la Madama Butterfly de Puccini, soto el maestro Ino Savini. Par fare justamente on poca de “gaveta” el ga preferìo bàtare eà provincia veneta, cantando davanti a on pùblico pi “amigo”: Lonigo, Legnago e dopo Trento, Vittorio Veneto, Sirmione, tute sitadine che on tenpo i faseva òpare liriche, e nel zenaro del 1969 el se ga presentà a i temìbii pùblici de Parma e Modena, cantando Turiddu de la Cavalleria Rusticana de Mascagni, e De Grieux de la Manon Lescaut puciniana co’ Magda Olivero. Subito dopo el xe stà ciamà al Regio de Torino, al San Carlo de Nàpoi, a Torre del Lago, scumissiando cussì na gran cariera.
In sti primi ani el se ga sagiamente mantenùo nel repertorio tenorìe co’ i pi famosi personaji de le òpare: il Duca del Rigoletto de Verdi; Cavaradossi de la Tosca e Rodolfo de eà Bohème de Puccini.
Giacomini se ga fato conóssare da subito par dó doti: na bona tenùa sènica e da quaità vocài straordinarie, na vose grande, e chi ga vudo èa fortuna de sentirlo cantare dal vivo, xe stà colpìo, sentendo, non el sòito tenorin, ma na vose de coele che te fa saltare da la carega.
Intanto co ’l tenpo la so vose gaveva ciapà on tinbro scuro; giusto par cantare personaji pi inpegnativi e cussì lo trovemo a Lisbona nel 1973 a cantare Manrico nel Trovatore ’nsieme a Piero Cappuccilli e Fiorenza Cossotto. Subito dopo, Giacomini ga scominsià de èssare ciamà a l’estero e dopo le irlandesi Dublino e Cork, ècolo nel 1974 al teatro Colon de Buenos Aires, a le Monnaie de Bruxelles, a l’Opera de Vienna dove dal 1977 a el 1992 xe stà senpre presente, a l’Operà de Parigi, Berlino, Köln, Düsseldorf, Francoforte, Amburgo, Monaco, Wiesbaden, Budapest, Barcellona, Lisbona, Zurigo e Boston e nel 1975 debuta al Metropolitan de New York e in sto teatro deventarà uno de ’e stele del Met, perfessionàndose so opere dove la so potente vose eroica no’ gaveva tanti rivài, daséndoghe ’e giuste sfumature, come par esempio Radames in Aida, cantàndola anca in Arena de Verona ne i ani 1980, 1985, 1986 e 1996; Don Alvaro ne La forza del destino e nel 1983 dopo ’e rèssite, l’Arena ghe ga dà el prestigioso Premio Zenatello. Altri cavài de batalia xe stà Tosca, Norma, Turandot, Andrea Chenier, Fedora, Ballo in Maschera, Pagliacci. Gioconda, Otello, ec.
Recordare tuti i sucessi de Giacomini xe inpossìbie, però vojo segnalare coalche curiosità: el xe stà l’ultimo a cantare el Lohengrin de Wagner in lingua italiana e nel 1981 el ga fato parte de la ressuression de na òpara de Donizetti, “Fausta”, mai pi rapresentà dal 1832 co’ a fianco Raina Kabaivanska, e I Medici de Leoncavallo a Francoforte nel 1993. El ga cantà anca par la fameja reàe al Covent Garden de Londra nel 1988, e par Gorbaciov a Mosca.
El ga fato parte de la storica Aida a le piramidi del Cairo nel 1987, e Calaf a Seul in ocasion de l’apertura de i Giochi Olimpici del 1988.
Giacomini xe stà el prototipo de on artista de na cariera fata tuta sora a ’e tole de i palchi, stando distante da ’e ribalte discografiche e televisive, come faseva serti so coèghi, daventài famosi proprio par coesto, disendo che on cantante lirico se ga da giudicare in sèna dal vivo.
Personalmente go vudo l’onore de sentirlo pi volte a l’Arena de Verona, soratuto me lo ricordo in Aida e so na stupenda edission de La Forza del Destino. In pi conservo on bel ricordo de na bèa serata passà ne ’a cesa Eremitani de Padova el 1° majo del 1994 coando el ga cantà la Messa di Gloria de Mascagni co’ a fianco el so “conpaesano” Renato Bruson e conpagnài da “I Solisti Veneti” direti da el conpianto Claudio Scimone: come se vede tuti grandi artisti veneti.
Naltro bel ricordo de Giuseppe Giacomini lo go ’vudo la sera del 7 lujo 2006 a Monséese dove jera stà organisà on conserto lirico par festejare i so 40 ani de cariera artistica, restando meravejà de sentire na vose ’ncora intata, da vero tenore dramàtico e mi timidamente me so’ avissinà par farghe i conplimenti e dimandarghe na foto ricordo, ma sicome in quel momento no ’l ghe ne gaveva, el ga vossùo el me indirisso e qualche dì dopo me xe rivà na busta co’ drento na so foto vestìo da Calaf de la Turandot puciniana co’ tanto de dedica.
Sò che da coalche ano no ’l stà tanto ben de salute, ma me permeto de dire che Giuseppe Giacomini meritarìa ben altra considerassion da parte de la "critica togata italiana", parché sarìa ora che lo rivalutasse, dàndoghe el giusto posto che ’l merita ne ’a storia de l'opera lirica.
Par chi voesse scoltare eà so gran vose, consilio de scoltarlo in dischi, CD, DVD dal Met de New York so La forza del destino de Verdi o su You Tube.

[torna sopra]