Da Verona

El “Ghetto” ebraico

A Verona, volendo far quatro passi, de solito se scominçia da via Capel… Poco prima de rivar in Piassa Erbe, se gira a sinistra par via Massini, e dopo aver caminà, vardando file de boteghe, negossi e boutique, se riva finalmente in Piassa Bra. Giusto de fronte a l’Arena. Pochi i ghe fa caso, ma Via Massini (in realtà “Mazzini” con dó “zeta”) l’inissia con su la destra quatro grossi edifici squadrà, destachè uno da l’altro e con ’n stile che gnente ga a che far con la Verona medioevale.
El primo, quel che ghe fa angolo a Piassa Erbe, a parte i marmi al pianteren el podarìa anca ’ndar. Ma ’l secondo l’è proprio strano: el ga un stile vagamente tra el “liberty” e el neoclassico, colone finte “a bugnato” sul davanti e n’altessa quasi dó òlte le case vissin! Proseguendo, l’edificio che vien dopo visto de fronte el par ’na casa normale, ma ’l quarto de la fila l’è un scatolon de piera. Fin a pochi ani fà l’ospitava la filiale de ’na banca. Dove tra l’altro go laorà par ani anca mi.
Comunque par spiegar ’sti quatro edifici a l’inissio de via Massini bisogna saver ’na roba: lì, fin al 1924, ghèra el “Ghetto”. Creà (come in altre çità) dopo el Concilio de Trento, l’è stà dove che i Ebrei i gavéa l’òbligo de abitar fin a quando Napoleon nel 1796 no ’l ga dà finalmente la libertà de far come i voléa. Una de le poche robe bone che ’l Bonaparte l’à fato! Da quela data, e par tuto el resto de l’800, el “Ghetto” l’è ’ndà via via degradàndose. I Ebrei “siori” i à podù çercarse casa da n’altra parte e oviamente lì è restà solo quei pitochi. E i posti lassà liberi i è stà ciapà da quei ancora più pitochi. Indipendentemente da la religion.
Nel 1866, con l’euforia de la Verona italiana, s’à pensà ben de demolir ’ste brute case in pieno centro e i primi progeti i è datadi za da l’ano dopo, ma tra ’na roba e l’altra la decision la s’à tirà par le longhe fin a rivar a i primi ani ’20 del ’900. Un’epoca tuta diversa da quela de prima: la guera ’15-’18 l’era finida (e ben) e l’ltalia la se sentiva forte e con la voja (e el bisogno) de grandi opere. In più el Fassismo (a l’epoca solo a l’inissio) el çercava consenso e l’era pronto a sostegner i laori. Anca sta òlta però piconi e baili i à dovù spetar: ghèra artisti come Barbarani e Dall’Oca Bianca che i voléa salvar ’sto angolo romantico de la Verona vecia, e futuristi come Marinetti e Carrà che i insistéa par la demolission. La question l’è finì parfin su i giornài de tuta Europa e anca a Parigi ghèra ci partegiava par ’na solussion piutosto che n’altra.
Ma com’èrelo el “Ghetto“ ne i ani ’20? Par fortuna podemo fàrsene ’n’idea: Angelo Dall’Oca Bianca oltre che grande pitor l’è stà anca grande fotografo e così l’à documentà, in ’na serie de bele foto in bianco e nero, le stradine strete e le case-torri del quartier ebraico prima de la demolis­sion. Ancora mèjo: entrando in Piassa Erbe da via Capel, proì a vardàr le prime case su la sinistra: strete e alte. Le faséa parte proprio del “Ghetto” e le s’à salvà parché no se podéa çerto demolir ’n angolo de la piassa più bela de Verona. Ma tuto el resto l’è stà scancelà a partir dal 1924.
Dopo, al posto del “Ghetto” è stà costruì quei quatro edifici, che ve diséa a l’inissio: el primo l’à conservà le case-torri su piassa Erbe, rifaséndose el “look” ne i altri tri lati e el tèrso l’à inglobà la vecia sinagoga. Inissiada nel 1864, la sinagoga de Verona l’era da ani in restauro e con l’ocasion se l’à ingrandì e finì.
El quarto edificio l’è stà costruì fin da subito come sede de ’na banca e co ’l secondo s’à volù crear el “Superpalazzo”.
E dentro al “Superpalazzo” s’à volù far el “Supercinema”. A l’epoca la parola “super” la piaséa tanto (Super-man l’è del ’33) e ’l Supercinema “super” el d’era realmente: 1.100 posti in platea, più altri 1.200 in galerìa… sala da 25 metri de larghessa par 50 del longhessa e 16 de altessa: el tuto condì con un stile art-decò lussuoso e ’n inpianto de projession (con tanto de sonoro) a l’avanguardia su scala europea. Par l’inissio de i ani ’30 el cinema l’era pronto e nel ’38 el faséa el “tuto esaurì” con Biancaneve. E nonostante le bonbe de l’ultima guera, ne i ani ’60 el “Supercinema” l’era ancora el cine più belo de tuta Verona. Tanto che me lo ricordo ben anca mi. Oviamente ne i ani ’70 l’à fato la fine de tute le sale de centro: serà par un tòco e a la fine riciclà come negossio de vestiti. Comunque anche se el “Supercinema” no ’l esiste più, el “Superpalazzo” el ghè ancora: fasighe un giro intorno e vardì in su: merita!
Tornando al “Ghetto”, quanti èreli i Ebrei a Verona? Beh, no i è mai stadi tanti: nel 1599, quando l’è stà verto, nel gheto ghe n’èra solo 400, e quando Napoleaone el l‘à abolì i èra rivà a 900. El massimo se l’à tocà a l’inissio del XX secolo con 1.400, ma za nel 1931 i Ebrei veronesi i erà tornà a 400.
Nel ’38 i deportà ne i campi de concentramento i è stà 45 (e a tornar i è stà 15) e, ne i ani ’50, de Ebrei a Verona se ghe ne contava ’pena un çentenar. ’Na comunità pìcola, paragonada a altre çità, ma con nomi famosi ligà a la cultura, l’arte e l’industria.
Par conclùdar, come diséa a l’inissio, del vecio “Ghetto” è restà praticamente solo la sinagoga, e girando intorno a la casa co i muri arancio che vien dopo el “Superpalazzo” se ghe ne pol védar, sconta su ’na piasseta, la faciada neoclassica: un grande porton circondà da bassorilievi con sìnboli ebraici.
Da le parte del porton ghè dó targhe de marmo: una a ricordar Rita Rosani, partigiana copà a Verona nel ’45, e l’altra a memoria de tute le vìtime ne le deportassioni de l’ultima guera.

[torna sopra]